ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ຕ້ອນຮັບການເຂົ້າຢ້ຽມຂໍ່ານັບຂອງ ເອກອັກຄະລັດຖະທູດ ແຫ່ງຣາຊະອານາຈັກ ກໍາປູເຈຍ ປະຈໍາ ສປປ ລາວ

ເຜີຍ​ແຜ່​ໂດຍ​: editor ເວ​ລາ: 09/02/2023 10:35:52 ຈຳ​ນວນ​​ຢ້ຽມ​ຊົມ 342 ຄັ້ງ ​

ໃນຕອນບ່າຍຂອງວັນທີ 7 ກຸມພາ 2023, ທີ່ ສໍານັກງານ ຄະນະພົວພັນຕ່າງປະເທດສູນກາງພັກ,     ທ່ານ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ນາງ ທອງ ສຸກົນເທຍຣີ, ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ຣາຊະອານາຈັກ ກໍາປູເຈຍ ປະຈໍາ ສປປ ລາວ.

ໃນໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບການມາຢ້ຽມພົບ ຂອງ ເອກອັກຄະລັດຖະທູດ ນາງ ທອງ ສຸກົນເທຍຣີ ແລະ ຊົມເຊີຍຕໍ່ການມາປະຕິບັດໜ້າທີ່ການທູດ ຢູ່ລາວ ໃນການເປັນຂົວເຊື່ອມ ມິດຕະພາບ ລາວ-ກໍາປູເຈຍ ໃນຕະຫຼອດໄລຍະຜ່ານມາ, ເຊິ່ງໄດ້ປະກອບ ສ່ວນສໍາຄັນເຂົ້າໃນການເສີມຂະຫຍາຍ ສາຍພົວພັນມິດຕະພາບ ອັນເປັນມູນເຊື້ອທີ່ດີງາມ ລະຫວ່າງ   ລາວ-ກໍາປູເຈຍ ຕາມທິດຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ໃຫ້ນັບມື້ນັບໄດ້ຮັບການເສີມ ຂະຫຍາຍ ແລະ ແຕກດອກອອກຜົນຍິ່ງໆຂຶ້ນ.

ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ຕໍ່ບັນດາຜົນສໍາເລັດອັນໃຫຍ່ຫຼວງ ແລະ ຮອບດ້ານ ທີ່ປະຊາຊົນ ກໍາປູເຈຍ ຍາດມາໄດ້ ໃນການປົກປັກຮັກສາ, ສ້າງສາ ແລະ ພັດທະນາປະເທດ ຊາດ ກໍ່ຄືການສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ໃນຕະຫຼອດໄລຍະຜ່ານມາ ໂດຍສະເພາະຜົນສໍາເລັດ ໃນການເປັນປະທານໜູນວຽນອາຊຽນ ໃນປີ 2022. ສະແດງຄວາມຂອບໃຈຕໍ່ ການສະໜັບສະໜູນຊ່ວຍເຫຼືອ ສປປ ລາວ ໃນການຕ້ານກັບພະຍາດໂຄວິດ-19.

ທ່ານເອກອັກຄະລັດຖະທູດ ນາງ ທອງ ສຸກົນເທຍຣີ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຊົມເຊີຍຜົນສໍາເລັດ ອັນສໍາຄັນ ທີ່ປະຊາຊົນລາວບັນດາເຜົ່າ ຍາດມາໄດ້ພາຍໃຕ້ ການນໍາພາອັນຖືກຕ້ອງ ແລະ ສະຫຼາດສ່ອງໃສຂອງພັກ ປປ ລາວ ໃນການສ້າງສາ, ພັດທະນາປະເທດຊາດ ຕາມແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ 9, ການຮັບມືກັບການແຜ່ລະບາດຂອງ ພະຍາດໂຄວິດ-19 ແລະ ອື່ນໆ.

ສອງຝ່າຍໄດ້ເປັນເອກະພາບ ແລະ ຍິນດີຮ່ວມກັນ ສືບຕໍ່ປະສານສົມທົບຢ່າງແໜ້ນແຟ້ນ ລະຫວ່າງຄະນະ ພົວພັນຕ່າງປະເທດສູກາງພັກ ແລະ ສະຖານທູດ ຣາຊະອານາຈັກກໍາປູເຈຍ ປະຈໍາ ສປປ ລາວ ໃນການ ເປັນຂົວເຊື່ອມມິດຕະພາບ ເພື່ອປະກອບສ່ວນເຂົ້າໃນການເພີ່ມພູນຄູນສ້າງ ແລະ ເສີມຂະຫຍາຍພົວພັນ ມິດຕະພາບ ອັນເປັນມູນເຊື້ອທີ່ດີງາມ ລະຫວ່າງ ສອງພັກ-ສອງລັດ ແລະ ປະຊາຊົນສອງຊາດ ລາວ-ກໍາປູເຈຍ ໃຫ້ແຕກດອກອອກຜົນ ແລະ ນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ກໍາປູເຈຍ ໃຫ້ຫຼາຍຂຶ້ນ.

---