ຄະນະນໍາ ຄະນະພົວພັນຕ່າງປະເທດສູນກາງພັກ ເຂົ້າອວຍພອນ ສະຖານເອກອັກຄະລັດຖະທູດແຫ່ງ ສສ ຫວຽດນາມ ປະຈໍາ ສປປ ລາວ

ເຜີຍ​ແຜ່​ໂດຍ​: editor ເວ​ລາ: 02/02/2023 10:08:10 ຈຳ​ນວນ​​ຢ້ຽມ​ຊົມ 342 ຄັ້ງ ​

ເນື່ອງໃນໂອກາດ ວັນສ້າຕັ້ງພັກ ກອມມູນິດຫວຽດນາມ ຄົບຮອບ 93 ປີ (3/2/1930–3/2/2023), ໃນຕອນເຊົ້າຂອງວັນທີ  01 ກຸມພາ 2023, ສະ​ຫາຍ ສົມພອນ ສີຈະເລີນ, ຮອງຫົວໜ້າ ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້ນຳ​ພາ​ຄະ​ນະ​ເຂົ້າອວຍ​ພອນ ສະ​ຫາຍ​ເອກ​ອັກ​ຄະ​ລັດ​ຖະ​ທູດ ຫງວຽນ​ບ໋າ​ຮຸ່ງ ແລະ ພະນັກງານສະຖານທູດ ແຫ່ງ ສສ ຫວຽດນາມ ປະຈໍາ ສປປ ລາວ.

ໃນ​ໂອ​ກາດ​ດັ່ງ​ກ່າວ, ສະ​ຫາຍ ສົມພອນ ສີຈະເລີນ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຜົນສຳເລັດອັນໃຫຍ່ຫຼວງ ແລະ ຮອບດ້ານ ທີ່ ປະຊາຊົນຫວຽດນາມອ້າຍນ້ອງ ຍາດມາໄດ້ ພາຍໃຕ້ການນຳພາອັນຖືກຕ້ອງ ແລະ ສະຫຼາດສ່ອງໃສຂອງພັກກອມມູນິດຫວຽດນາມ ໃນຕະຫຼອດໄລຍະທີ່ຜ່ານມາ, ອັນໄດ້ເຮັດໃຫ້ ສສ ຫວຽດນາມ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ການປ້ອງກັນຊາດ, ປ້ອງກັນຄວາມສະຫງົບ ມີຄວາມເຂັ້ມແຂງ, ສ້າງພື້ນຖານເສດຖະກິດທີ່ເປັນເອກະລາດ, ເປັນເຈົ້າຕົນເອງ ແລະ ມີການຂະຫຍາຍຕົວຢ່າງ​ຕໍ່​ເນື່ອງ ແລະ ເພີ່ມ​ສູງ​ຂຶ້ນ, ຊີວິດການເປັນຢູ່ຂອງປະຊາຊົນ ໄດ້ຮັບການປັບ​ປຸງ​ດີ​ຂຶ້ນເປັນກ້າວໆ.

ພ້ອມນີ້, ສະຫາຍ ຍັງໄດ້ສະແດງຄວາມພາກພູມໃຈເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ລາວ-ຫວຽດນາມ ທີ່ໄດ້ຮັບການກໍ່ຕັ້ງໂດຍ ປະທານ ໂຮ່ຈິມິນ ຜູ້​ຍິ່ງ​ໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກ ແລະ ສືບຕໍ່ໄດ້ຮັບການ ຖະນຸຖະໜອມ ແລະ ​ເພີ່ມ​ພູນ​ຄູນ​ສ້າງ ຈາກບັນດາຮຸ່ນການນຳຂອງສອງປະເທດ ໂດຍຜ່ານການທົດສອບບົນແປວໄຟປະຕິວັດ ເປັນເວລາຫຼາຍທົດສະວັດນັ້ນ ໄດ້ກາຍເປັນມໍລະດົກອັນລໍ້າຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວ, ເປັນໜຶ່ງໃນປັດໄຈຕັດສິນໄຊຊະນະ ຂອງການປະຕິວັດ ໃນແຕ່ລະປະເທດ ແລະ ມາເຖິງປັດຈຸບັນ ຍິ່ງ​ໄດ້ຮັບການເພີ່ມພູນຄູນສ້າງ ແລະ ເສີມຂະຫຍາຍເຂົ້າສູ່ລວງເລິກ ໃນທຸກຂົງເຂດວຽກງານ ແລະ ແຕກດອກອອກຜົນຢ່າງບໍ່ຢຸດຢັ້ງ, ນໍາເອົາຜົນປະໂຫຍດຕົວຈິງ ມາສູ່ປະຊາຊົນສອງຊາດ ລາວ-ຫວຽດນາມ, ພ້ອມ​ທັງ​ຢືນ​ຢັນ​ວ່າ​ຈະ​ຮ່ວມ​ກັບ ສະ​ຫາຍຫວຽດ​ນາມ ພ້ອມກັນສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອຄວາມສາມັກຄີພິເສດ ລາວ-ຫວຽດນາມ ໃຫ້ໝັ້ນຄົງ ແລະ ເກີດດອກອອກຜົນຍິ່ງໆຂຶ້ນຕະຫຼອດໄປ, ປະກອບສ່ວນເຂົ້າໃນພາລະກິດເສີມສ້າງສັນຕິພາບ, ມິດຕະພາບ, ການຮ່ວມມື ແລະ ການພັດທະນາ ໃນພາກພື້ນ ແລະ ໃນໂລກ.

ໃນ​ໂອ​ກາດດັ່ງກ່າວ, ສະ​​ຫາຍເອກ​ອັກ​ຄະ​ລັດ​ຖະ​ທູດ ຫງວຽນບ໋າຮຸ່ງ ໄດ້​ສະ​ແດງ​ຄວາມ​ຂອບ​ໃຈ ​ຕໍ່ສະ​ຫາຍ ສົມພອນ ສີຈະເລີນ ທີ່​ໄດ້​ນຳ​ພາ​ຄະ​ນະ ​ມາ​ອວຍ​ພອນ​ໃນ​ຄັ້ງ​ນີ້, ​ພ້ອມ​ທັງ ຕີ​ລາ​ຄາ​ສູ​ງຕໍ່ການພົວພັນຮ່ວມມື ລະຫວ່າງ ພັກກອມມູນິດຫວຽດນາມ ແລະ ພັກ ປະຊາຊົນ ປະຕິວັດລາວ ທີ່ນັບມື້ນັບກ້າວເຂົ້າສູ່ລວງເລິກ​ຢ່າງ​ບໍ່​ຢຸດ​ຢັ້ງ ແລະ ເປັນພື້ນຖານອັນສຳຄັນ ໃຫ້ແກ່ການພົວພັນຮ່ວມມືໃນຂົງເຂດຕ່າງໆ ລະຫວ່າງ ສອງປະເທດ ກໍ່ຄື ຕີລາຄາສູງຕໍ່ການຮ່ວມມືປະສານສົມທົບຢ່າງແໜ້ນແຟ້ນ ລະຫວ່າງ ສະຖານທູດຫວຽດນາມ ​ກັບ ຄະນະພົວພັນຕ່າງປະເທດສູນກາງ ພັກ ປປ ລາວ ໃນການເປັນຂົວຕ່ໍ່, ເປັນເສນາທິການໃຫ້ແກ່ສອງພັກ, ອັນໄດ້ປະກອບສ່ວນເຂົ້າໃນການເພີ່ມພູນຄູນສ້າງ ສາຍພົວພັນອັນເປັນມູນເຊື້ອ, ຄວາມສາມັກຄີພິເສດ ລາວ-ຫວຽດນາມ; ຊົມເຊີຍບັນດາ​ຜົນ​ສຳ​ເລັດ​ຂອງ​ ພັກ, ລັດລາວ ​ພາຍ​ໃຕ້​ການ​ນຳ​ພາ​ຂອງ ​ພັກປະ​ຊາ​ຊົນ ປະ​ຕິ​ວັດ​ລາວ ທີ່ຍາດມາໄດ້ໃນການສ້າງສາ ພັດທະນາປະເທດຊາດ ແລະ ຍິນດີສືບຕໍ່ປະສານສົມທົບຢ່າງແໜ້ນແຟ້ນກັບ ຄະນະພົວພັນຕ່າງປະເທດສູນກາງ ພັກ ປປ ລາວ ໃນການຊຸກຍູ້ການຈັດຕັ້ງຜັນຂະຫຍາຍ ບັນດາຂໍ້ຕົກລົງຂອງ ການນໍາຂັ້ນສູງສອງພັກ, ສອງລັດ ກໍ່​ຄື ສອງ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ລາວ-ຫວຽດນາມ ໃຫ້ບັນລຸຕາມເປົ້າໝາຍ, ມີປະສິດທິຜົນສູງ, ປະກອບສ່ວນເຂົ້າໃນການເພີ່ມພູມຄູນສ້າງ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ນັບມື້ແຕກດອກອອກຜົນຍິ່ງໆຂຶ້ນ.

ໃນໂອກາດດັ່ງກ່າວ, ສະຫາຍ ສົມພອນ ສີຈະເລີນ ຍັງໄດ້ຕາງໜ້າໃຫ້ ຄະນະພັກ-ຄະ​ນະນຳ ຄຕພ ສົ່ງສານອວຍພອນ ຈາກ ຄະນະບໍລິຫານງານສູນກາງພັກ ປປ ລາວ ເຖິງ ຄະນະບໍລິຫານງານສູນກາງພັກກອມມູນິດຫວຽດນາມ ແລະ ສານອວຍພອນ ຈາກ ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ເຖິງ ຫົວໜ້າຄະນະພົວພັນຕ່າງປະເທດສູນກາງ ພັກກອມມູນິດຫວຽດນາມ.

---