ຄະນະຜູ້ແທນພັກ ປປ ລາວ ສຳເລັດການເຂົ້າຮ່ວມກອງປະຊຸມໃຫຍ່ຄັ້ງທີ 11 ຂອງບັນດາພັກການເມືອງໃນອາຊີ ຢູ່ອິດສະຕັນບູນ, ປະເທດຕວັກກີ ໃນລະຫວ່າງວັນທີ 17-20 ພະຈິກ 2022

ເຜີຍ​ແຜ່​ໂດຍ​: editor ເວ​ລາ: 22/11/2022 09:16:24 ຈຳ​ນວນ​​ຢ້ຽມ​ຊົມ 596 ຄັ້ງ ​

   ຄະນະຜູ້ແທນພັກ ປປ ລາວ ນໍາໂດຍ ສະຫາຍ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ ພ້ອມດ້ວຍຄະນະ ໄດ້ເດີນທາງໄປເຂົ້າຮ່ວມກອງປະຊຸມໃຫຍ່ຄັ້ງທີ 11 ຂອງບັນດາພັກການເມືອງໃນອາຊີ (11^th General Assembly of the ICAPP) ທີ່ອິດສະຕັນບູນ, ປະເທດຕວັກກີ, ໃນລະຫວ່າງວັນທີ 17-20 ພະຈິກ 2022, ພາຍໃຕ້ຫົວຂໍ້ “ບົດບາດຂອງບັນດາພັກການເມືອງໃນການສ້າງຄວາມເຂັ້ມແຂງແກ່ການປຶກສາຫາລື ເພື່ອສັນຕິພາບ, ຄວາມຈະເລີນຮຸ່ງເຮືອງ ແລະ ການຮ່ວມມື ໃນໂລກ”  ໂດຍການເປັນເຈົ້າພາບຂອງພັກຍຸຕິທໍາ ແລະ ການພັດທະນາ  ເຊິ່ງເປັນພັກກໍາອໍານາດຂອງປະເທດຕວັກກີ ແລະ ມີຜູ້ແທນ 70 ພັກການເມືອງ ຈາກ 31 ປະເທດ ເຂົ້າຮ່ວມ.
   ຫົວໜ້າຄະນະຜູ້ແທນພັກ ປປ ລາວ ໄດ້ປະກອບຄຳເຫັນໃນກອງປະຊຸມ ໂດຍໄດ້ຕີລາຄາສູງ ແລະ ຊົມເຊີຍຕໍ່ການເປັນເຈົ້າພາບຂອງພັກຍຸຕິທຳ ແລະ ການພັດທະນາ; ຍົກໃຫ້ເຫັນບົດບາດຂອງບັນດາພັກການເມືອງໃນການຮ່ວມມືສາກົນ ເຊິ່ງເປັນປັດໄຈສຳຄັນໃນການເສີມສ້າງການພັດທະນາຮ່ວມກັນ; ເປີດກວ້າງການຮຽນຮູ້ເຊິ່ງກັນ ແລະ ກັນ ແລະ ມີຜົນປະໂຫຍດຮ່ວມກັນ ເພື່ອຍົກສູງຊີວິດການເປັນຢູ່ຂອງປະຊາຊົນ, ທັງເປັນການຮັດແໜ້ນ ແລະ ເສີມຂະຫຍາຍການພົວພັນຮ່ວມມື ເພື່ອພາລະກິດສັນຕິພາບ, ຄວາມຈະເລີນຮຸ່ງເຮືອງ ແລະ ການຮ່ວມມື ໃນພາກພື້ນ ແລະ ໃນໂລກ. ພ້ອມນີ້, ຫົວໜ້າຄະນະ ກໍ່ໄດ້ແຈ້ງສະພາບການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ 11 ຂອງພັກ ປປ ລາວ ແລະ ແຜນການພັດທະນາເສດຖະກິດ-ສັງຄົມ 5 ປີ ຄັ້ງທີ 9; ແລະ ຢືນຢັນຈະສືບຕໍ່ຮັດແໜ້ນ ແລະ ເສີມຂະຫຍາຍການຮ່ວມມືກັບບັນດາພັກການເມືອງ ໂດຍຢຶດໝັ້ນໃນແນວທາງການຕ່າງ ປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປັນເຈົ້າການ ແລະ ຕັ້ງໜ້າເຊື່ອມໂຍງກັບພາກພື້ນ ແລະ ສາກົນ ບົນພື້ນຖານການເຄົາລົບ ຊຶ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ ເພື່ອຄວາມຈະເລີນຮຸ່ງເຮືອງ ແລະ ຄວາມສົມບູນພູນສຸກຂອງບັນດາປະຊາຊາດໃນພາກພື້ນ ແລະ ໃນໂລກ.

   ບັນດາຜູ້ແທນກອງປະຊຸມ ໄດ້ເປັນເອກະພາບກັນຮັບຮອງເອົາຖະແຫຼງການອີດສະຕັນບູນ, ເຊິ່ງມີເນື້ອໃນສຳຄັນວ່າ ໄອແຄັບກາຍເປັນເວທີທີ່ໝັ້ນຄົງ ແລະ ເປັນເວທີທີ່ເປັນເອກະລັກສະເພາະ ແລະ ເປີດກວ້າງ ໃຫ້ບັນດາພັກການເມືອງໃນພາກພື້ນ ທີ່ມີອຸດົມການທາງການເມືອງແຕກຕ່າງກັນເຂົ້າຮ່ວມ ແນໃສ່ເສີມສ້າງຄວາມເຂົ້າອົກເຂົ້າໃຈຊຶ່ງກັນ ແລະ ການຮ່ວມມືຕາມວິ​ໄສ​ທັດ​ຂອງ "ການ​ສ້າງ​ປະ​ຊາ​ຄົມ​ອາ​ຊີ" ແຫ່ງສັນ​ຕິ​ພາບ, ມິດ​ຕະ​ພາບ, ຄວາມ​ກົມກຽວປອງ​ດອງ​, ແລະ​ ຄວາມຈະເລີນຮຸ່ງເຮືອງຮ່ວມກັນ ເພື່ອບັນລຸເປົ້າໝາຍດັ່ງກ່າວບັນດາພັກການເມືອງຈະຕ້ອງເຊີດຊູຄວາມຮັບຜິດຊອບຮ່ວມກັນ ໃນການຮັບມືກັບສິ່ງທ້າທາຍຕ່າງໆ ປະ​ກອບ​ສ່ວນຢ່າງຕັ້ງໜ້າ​ເຂົ້າ​ໃນ​ການ​ສ້າງ​ສະ​ຖຽນ​ລະ​ພາບ ແລະ ຄວາມ​ໝັ້ນ​ຄົງ​ຂອງ​ໂລກ ໂດຍ​ຜ່ານ​ເວ​ທີ​ປຶກ​ສາ​ຫາ​ລື ແລະ ແລກ​ປ່ຽນ​ຄຳ​ຄິດ​ເຫັນ ກ່ຽວກັບສະພາບການພາກພື້ນ ແລະ ສາກົນ ເປັນຕົ້ນ ບັນຫາສະຖຽນລະພາບ, ຄວາມປອດໄພ ແລະ ຄວາມໝັ້ນຄົງ; ໂລກາພິວັດ, ການປ່ຽນແປງດິນຟ້າອາກາດ, ພະຍາດລະບາດ ແລະ ອື່ນໆ.
   ຄຽງຄູ່ກັບກອງປະຊຸມໃຫຍ່ຄັ້ງທີ 11 ຂອງບັນດາພັກການເມືອງອາຊີໃນຄັ້ງນີ້, ຍັງມີ 4 ກອງປະຊຸມປິ່ນອ້ອມຄື: 1) ກອງ​ປະ​ຊຸມ​ຄັ້ງ​ທີ 5 ຂອງ​ເວ​ທີ​ປາ​ໄສ​ສື່​ມວນ​ຊົນ ICAPP; 2) ກອງປະຊຸມຄັ້ງທີ 2 ສະພາສົ່ງເສີມການທ່ອງທ່ຽວ ແລະ ການຮ່ວມມືລະຫວ່າງນະຄອນ ຂອງ ບັນດາພັກການເມືອງໃນອາຊີ; 3) ກອງປະຊຸມຄັ້ງທີ 4 ລະຫວ່າງ ICAPP-COPPPAL-CAPP ແລະ 4) ກອງປະຊຸມຄັ້ງທີ 1 ຂອງຄະນະບໍລິຫານງານຂອງສະພາທຸລະກິດ.  

   ໃນໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນພັກເຮົາຍັງໄດ້ພົບປະສອງຝ່າຍກັບ ພັກກອມມູນິດຫວຽດນາມ, ພັກກອມມູນິດຈີນ, ພັກຣັດເຊຍເອກະພາບ, ພັກກອມມູນິດຣັດເຊຍ ແລະ ພັກອື່ນໆຈໍານວນໜື່ງ. ກອງປະຊຸມໃຫຍ່ຄັ້ງທີ 12 ຂອງບັນດາພັກການເມືອງໃນອາຊີ ຈະຈັດຂື້ນໃນປີ 2024 ຢູ່ລາຊະອານາຈັກກຳປູເຈຍ.

---