ສະມາຄົມມິດຕະພາບ ລາວ-ຫວຽດນາມ ແລະ ສະມາຄົມມິດຕະພາບ ຫວຽດນາມ-ລາວ ຮ່ວມກັນຈັດບຸນມະໂຫລານມິດຕະພາບປະຊາຊົນ ລາວ ແລະ ຫວຽດນາມ ຄັ້ງທີ 5 ເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ 2022
ເຜີຍແຜ່ໂດຍ: editor ເວລາ: 30/09/2022 14:58:57 ຈຳນວນຢ້ຽມຊົມ 559 ຄັ້ງ ເພື່ອເປັນການປະກອບສ່ວນສະເຫຼີມສະຫຼອງປີສາມັກຄີມິດຕະພາບ ກໍ່ຄືສະເຫຼີມສະຫຼອງສອງວັນປະຫວັດສາດ ຄື: ວັນສ້າງຕັ້ງສາຍພົວພັນການທູດລາວ ແລະ ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມືຄົບຮອບ 45 ປີ. ສະມາຄົມມິດຕະພາບ ລາວ-ຫວຽດນາມ ຮ່ວມກັບ ສະມາຄົມມິດຕະພາບ ຫວຽດນາມ-ລາວ ໄດ້ຈັດງານບຸນມະໂຫລານມິດຕະພາບ ລະຫວ່າງ ປະຊົນລາວ ແລະ ຫວຽດນາມ ຄັ້ງທີ V ຂຶ້ນ ຢູ່ ແຂວງກວາງຈິ, ສສ ຫວຽດນາມ ແລະ ແຂວງສະຫວັນນະເຂດ, ສປປ ລາວ ແຕ່ວັນທີ 27-30 ກັນຍາ 2022. ຄະນະຜູ້ແທນຝ່າຍລາວ ນຳໂດຍ ສະຫາຍ ບັນດິດ ສຈ. ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ແລະ ຝ່າຍຫວຽດນາມ ນຳໂດຍ ສະຫາຍ ເຈິນ ວັນຕຸ້ຍ, ອະດີດກຳມະການສູນກາງພັກ, ອະດີດປະທານກຳມະທິການວຽກງານຜູ້ແທນສະພາແຫ່ງຊາດຫວຽດນາມ, ອະດີດຮອງຫົວໜ້າຄະນະຈັດຕັ້ງສູນກາງພັກ, ປະທານສະມາຄົມມິດຕະພາບ ຫວຽດນາມ-ລາວ ແລະ ມີຄະນະຜູ້ແທນສອງຝ່າຍເຂົ້າຮ່ວມເຄື່ອນໄຫວ 120 ສະຫາຍ (ຝ່າຍລະ 60 ສະຫາຍ).
ວັນທີ 28 ກັນຍາ 2022 ໄດ້ມີພິທີເປີດ ບຸນມະໂຫລານມິດຕະພາບ ປະຊາຊົນ ລາວ-ຫວຽດນາມ ຄັ້ງທີ V ຢ່າງເປັນທາງການຢູ່ແຂວງກວາງຈິ, ສສ ຫວຽດນາມ ໃຫ້ກຽດເຂົ້າຮ່ວມພິທີດັ່ງກ່າວ ຝ່າຍ ຫວຽດນາມ ມີ ສະຫາຍ ເຈິນ ແທັງ ເມິນ, ກຳມະການກົມການເມືອງສູນກາງພັກ, ຮອງປະທານຜູ້ປະຈຳການສະພາແຫ່ງຊາດ ສສ ຫວຽດນາມປະທານຄະນະມິດຕະພາບລັດຖະສະພາ ຫວຽດນາມ-ລາວ, ສະຫາຍ ເລ ກວາງ ຕຸງ, ກຳມະການສູນກາງພັກ, ເລຂາພັກແຂວງໆກວາງຈິ, ສະຫາຍ ນາງ ຫງວຽນ ເຟືອງ ງາ, ປະທານສະຫະພັນບັນດາອົງການຈັດຕັ້ງມິດຕະພາບຫວຽດນາມ, ສະຫາຍ ເຈິນ ວັນຕຸ້ຍ, ອະດີດກຳມະການສູນກາງພັກ, ອະດີດປະທານກຳມະທິການວຽກງານຜູ້ແທນສະພາແຫ່ງຊາດຫວຽດນາມ, ອະດີດຮອງຫົວໜ້າຄະນະຈັດຕັ້ງສູນກາງພັກ, ປະທານສະມາຄົມມິດຕະພາບ ຫວຽດນາມ-ລາວ ຂັ້ນສູນກາງ. ຝ່າຍລາວ ມີ ສະຫາຍ ບັນດິດ, ສຈ ບໍ່ວຽງຄຳ ວົງດາລາ, ກຳມະການສູນກາງພັກ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ, ປະທານສະມາຄົມມິດຕະພາບ ລາວ-ຫວຽດນາມ ຂັ້ນສູນກາງ, ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ສະຫາຍ ແສງເພັດ ຮຸ່ງບຸນຍວງ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ, ມີບັນດາການນຳ ຂອງ ສະມາຄົມມິດຕະພາບ ລາວ-ຫວຽດນາມ ຂັ້ນສູນກາງ ແລະ ຂັ້ນແຂວງ, ສູນກາງການແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ, ອົງການຈັດຕັ້ງມະຫາຊົນຂັ້ນສູນກາງ, ສະຖານກົງສູນ ຂອງ ລາວ ແລະ ຫວຽດນາມ ເຂົ້າຮ່ວມ. ນອກນັ້ນຍັງມີແຂກຖືກເຊີນ ເຊິ່ງເປັນຕົວແທນໃຫ້ແກ່ປະຊາຊົນສອງຊາດ ລາວ ແລະ ຫວຽດນາມ ເຂົ້າຮ່ວມ 600 ກວ່າສະຫາຍ.
ໃນການເຄື່ອນໄຫວກິດຈະກຳບຸນມະໂຫລານຄັ້ງນີ້, ຄະນະຜູ້ແທນສອງຝ່າຍ ໄດ້ເຂົ້າຢ້ຽມຂ່ໍ່ານັບການນໍາຂັ້ນສູງ, ຈັດໂຮມຊຸມນຸມສະເຫຼີມສະຫຼອງປີສາມັກຄີມິດຕະພາບ, ກອງປະຊຸມພົບປະມິດຕະພາບ, ມອບ-ຮັບ ເງິນຊ່ວຍເຫຼືອໃກ້ແກ່ບັນດາຄອບຄົວທຸກຍາກ ຕາມເຂດຊາຍແດນ ລາວ ແລະ ຫວຽດນາມ, ໄຕ້ທູບສັກກະລະບູຊາ ຢູ່ ສຸສານນັກຮົບນິລະນາມ ລາວ-ຫວຽດນາມ, ຢ້ຽມຢາມເມືອງເກົ່າກວາງຈິ, ຢ້ຽມຊົມເຂດອະນຸສອນສະຖານ ເລຂາທິການໃຫຍ່ ເລ ຢ້ວນ ຢູ່ແຂວງກວາງຈິ, ສສ ຫວຽດນາມ, ວາງກະຕ່າດອກໄມ້ ອານຸສາວະລີ ປະທານ ໄກສອນ ພົມວິຫານ, ອະນຸສອນສະຖານປະທານໂຮ່ຈິມິນ, ຢ້ຽມຊົມສະຖານທີ່ຮ່ວມສຳພັນສູ້ຮົບລາວ-ຫວຽດນາມ, ແລະ ຈັດພິທີປິດງານບຸນມະໂຫລານມິດຕະພາບ ລະຫວ່າງປະຊາຊົນລາວ ແລະ ຫວຽດນາມ ຄັ້ງທີ V ຢູ່ແຂວງສະຫວັນນະເຂດສປປ ລາວ ໃນວັນທີ 29 ກັນຍາ 2022.
ການຈັດງານບຸນມະໂຫລານມິດຕະພາບ ລະຫວ່າງປະຊາຊົນລາວ ແລະ ຫວຽດນາມ ໃນຄັ້ງນີ້ໄດ້ປະກອບ ສ່ວນເຜີຍແຜ່ຂໍ້ມູນຂ່າວສານ ແລະ ຄວາມເປັນຈິງ ຂອງ ການພົວພັນລາວ-ຫວຽດນາມ ໃຫ້ປະຊາຊົນສອງປະເທດໂດຍສະເພາະແມ່ນຄົນຮຸ່ນໃໝ່ໃຫ້ຮັບຮູ້, ເຂົ້າໃຈຢ່າງຈະແຈ້ງ ແລະ ເລິກເຊິ່ງເຖິງລັກສະນະພິເສດ, ຄວາມຈົງຮັກພັກດີອັນເປັນແບບຢ່າງ ທີ່ປະຊາຊົນສອງຊາດ ລາວ ແລະ ຫວຽດນາມ ໄດ້ສືບທອດກັນມາຈາກຫລາຍຮຸ່ນຄົນ.ຄຳເວົ້າທີ່ວ່າ “ເຂົ້າເມັດຫັກຜັກເສັ້ນດຽວກໍ່ບິແບ່ງ” ຈະກາຍເປັນຄຳສອນໃຫ້ຄົນຮຸ່ນຫລັງ ໄດ້ເຂົ້າໃຈແຈ້ງເຖິງສາຍສາຍພົວພັນມິດຕະພາບອັນໃສແຈ້ງ, ບໍລິສຸດຜຸດຜ່ອງ ແລະ ຫາຍາກໃນໂລກ ທີ່ປະທານໂຮ່ຈິມິນ, ຜູ້ນຳທີ່ຍິ່ງໃຫຍ່ ຂອງ ປະຊາຊົນຫວຽດນາມ ແລະ ປະທານ ໄກສອນ ພົມວິຫານ, ປະທານສຸພານຸວົງ ຜູ້ນຳທີ່ເຄົາລົບຮັກ ຂອງ ປະຊາຊົນລາວ ເປັນຜູ້ກໍ່ຕັ້ງ ແລະ ຝຶກຝົນຫລໍ່ຫລອມ ແລະ ໃຫ້ເຂົາເຈົ້າເປັນເຈົ້າການໃນການປົກປັກຮັກສາ, ເສີມຂະຫຍາຍ ແລະ ເພີ່ມພູນຄູນສ້າງໃຫ້ຫອມຫວນ, ສົດຊື່ນມີຊີວິດຊີວາ ແລະ ເປັນມໍລະດົກອັນລ້ຳຄ່າ ຂອງ ປະຊາຊົນສອງປະເທດ ເພື່ອໃຫ້ຄົນເຊັ່ນລູກເຊັ່ນຫລານໄດ້ສືບທອດຕະຫຼອດຊົ່ວກາລະນານ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20