ສະມາຄົມ ລາວ-ໄທ ແລະ ສະມາຄົມ ໄທ-ລາວ ເພື່ອມິດຕະພາບ ຈັດພິທີມອບ-ຮັບ ອາຄານໂຮງຮຽນປະຖົມສົມບູນໄຊຍະບູລີ, ແຂວງໄຊຍະບູລີ
ເຜີຍແຜ່ໂດຍ: editor ເວລາ: 20/09/2022 16:33:56 ຈຳນວນຢ້ຽມຊົມ 518 ຄັ້ງ ໃນວັນທີ 19 ກັນຍາ 2022, ສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ ຮ່ວມກັບອົງການການປົກຄອງແຂວງໄຊຍະບູລີ ໄດ້ຈັດພິທີມອບ-ຮັບ ອາຄານໂຮງຮຽນປະຖົມສົມບູນໄຊຍະບູລີ, ເມືອງໄຊຍະບູລີ, ແຂວງໄຊຍະບູລີ. ໃຫ້ກຽດຮ່ວມພິທີດັ່ງກ່າວ ມີ ທ່ານ ພົງສະຫວັນ ສິດທະວົງ, ເຈົ້າແຂວງໄຊຍະບູລີ, ທ່ານ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ທ່ານ ນາງ ວະຣາທິບ ສຸພະຊະວະໂຣດ, ອັກຄະຣາຊະທູດທີ່ປຶກສາ, ສະຖານເອກອັກຄະຣາຊະທູດແຫ່ງຣາຊະອານາຈັກໄທ ປະຈຳ ສປປ ລາວ, ທ່ານ ຫຼີ ບຸນຄໍ້າ, ປະທານສະມາຄົມ ລາວ-ໄທ ເພື່ອມິດຕະພາບ, ທ່ານ ກຽດຕິຄຸນ ຊາດປະເສີດ, ປະທານສະມາຄົມ ໄທ-ລາວ ເພື່ອມິດຕະ ພາບ, ທ່ານ ສົມບັດ ເພັງພະຈັນ, ກົງສຸນໃຫຍ່ແຫ່ງ ສປປ ລາວ ປະຈຳ ຂອນແກ່ນ, ຣາຊະອານາຈັກໄທ, ບັນດາຄະນະບໍລິຫານງານສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ, ເຈົ້າເມືອງໄຊຍະບູລີ, ຫົວໜ້າພະແນກ, ຮອງຫົວໜ້າພະແນກ, ພໍ່ແມ່ປະຊາຊົນ, ຄູອາຈານ ແລະ ນັກຮຽນ ຈໍານວນໜຶ່ງເຂົ້າຮ່ວມ.
ໃຫ້ກຽດກ່າວມອບໂຮງຮຽນດັ່ງກ່າວ ໂດຍ ທ່ານ ນາງ ວະຣາທິບ ສຸພະຊະວະໂຣດ, ອັກຄະຣາຊະທູດທີ່ປຶກສາ, ສະຖານເອກອັກຄະຣາຊະທູດແຫ່ງຣາຊະອານາຈັກໄທ ປະຈຳ ສປປ ລາວ ແລະ ຕາງໜ້າກ່າວຮັບ ໂດຍ ທ່ານ ພົງສະຫວັນ ສິດທະວົງ, ເຈົ້າແຂວງໄຊຍະບູລີ. ໂຮງຮຽນປະຖົມສົມບູນໄຊຍະບູລີ, ເມືອງໄຊຍະບູລີ, ແຂວງໄຊຍະບູລີ ແມ່ນໂຮງຮຽນມິດຕະພາບ ລາວ-ໄທ, ໄທ-ລາວ ແຫ່ງທີ 11, ທັງເປັນສັນຍາລັກຂອງການສ້າງຕັ້ງສາຍພົວພັນການທູດລາວ-ໄທ ຄົບຮອບ 70 ປີ, ເຊິ່ງໄດ້ຮັບການສະໜັບສະໜູນງົບປະມານການກໍ່ສ້າງ ຈາກກະຊວງການຕ່າງປະ ເທດແຫ່ງຣາຊະອານາຈັກໄທ (ສະມາຄົມ ໄທ-ລາວ ເພື່ອມິດຕະພາບ) ຈຳນວນ 02 ຫຼັງ 10 ຫ້ອງຮຽນ (ຫຼັງລະ 5 ຫ້ອງຮຽນ), ຫ້ອງການຄູ 1 ຫຼັງ, ຫ້ອງນ້ຳ 2 ຫຼັງ ( 10 ຫ້ອງ) ປະກອບເຄື່ອງເຟີນິເຈີຄົບຊຸດ ແລະ ປັບປຸງເດີ່ນພາຍໃນໂຮງຮຽນ ລວມມູນຄ່າທັງໝົດ 3,269,000,000 ກີບ (ສາມຕື້ ສອງຮ້ອຍຫົກສິບເກົ້າລ້ານ ກີບ) ຫຼື 7,000,000 ບາດ (ເຈັດລ້ານບາດ) ໂດຍມອບໃຫ້ສະມາຄົມ ລາວ-ໄທ ແລະ ໄທ-ລາວ ເພື່ອມິດຕະພາບ ຮ່ວມກັນຈັດຕັ້ງປະຕິບັດ ແລະ ສ້າງສຳເລັດແຕ່ທ້າຍປີ 2020, ແຕ່ເນື່ອງຈາກມີສະພາບການແຜ່ລະບາດຂອງພະຍາດໂຄວິດ 19 ຈຶ່ງບໍ່ສາມາດຈັດພິທີມອບ-ຮັບ ຕາມວັນເວລາທີ່ກຳນົດໄວ້.
ໃນພິທີດັ່ງກ່າວ, ທ່ານ ເຈົ້າແຂວງໄຊຍະບູລີ ໄດ້ຕາງໜ້າໃຫ້ຄູອາຈານ, ພໍ່ແມ່ປະຊາຊົນ ແລະ ນັກຮຽນ ສະແດງຄວາມຂອບໃຈເປັນຢ່າງສູງ ມາຍັງ ກະຊວງການຕ່າງປະເທດແຫ່ງຣາຊະອານາຈັກໄທ ກໍຄືລັດຖະບານໄທ ແລະ ປະຊາຊົນໄທ ໂດຍສະເພາະ ສະມາຄົມ ໄທ-ລາວ ເພື່ອມິດຕະພາບ ທີ່ເຫັນຄວາມສໍາຄັນ ແລະ ສະໜັບສະໜູນຊ່ວຍເຫຼືອດ້ານການສຶກສາ ຢູ່ ສປປ ລາວ ຢ່າງຈິງໃຈຕະຫຼອດມາ ເຮັດໃຫ້ນັກຮຽນໄດ້ຮັບການສຶກສາໃນເງື່ອນໄຂທີ່ດີ, ຖືເປັນການປະກອບສ່ວນສຳຄັນເຂົ້າໃນການພັດທະນາພື້ນຖານໂຄງລ່າງດ້ານການສຶກສາ ຢູ່ ແຂວງໄຊຍະບູລີ. ພ້ອມທັງໃຫ້ຄຳໝັ້ນສັນຍາວ່າ ຈະນຳໃຊ້, ປົກປັກຮັກສາອາຄານໂຮງຮຽນດັ່ງກ່າວໃຫ້ໝັ້ນຄົງຍາວນານ ແລະ ມີປະສິດທິພາບສູງສຸດ. ພ້ອມນີ້, ການຊ່ວຍເຫຼືອດັ່ງກ່າວຍັງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນອັນດີງາມ ຂອງ ສອງປະເທດ ແລະ ປະຊາຊົນສອງຊາດ ລາວ-ໄທ ໃຫ້ນັບມື້ໄດ້ຮັບການພັດທະນາ ແລະ ເສີມຂະຫຍາຍສູ່ບາດກ້າວໃໝ່.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20