ພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຮົງກາລີ ຄົບຮອບ 60 ປີ

ເຜີຍ​ແຜ່​ໂດຍ​: editor ເວ​ລາ: 02/09/2022 15:29:21 ຈຳ​ນວນ​​ຢ້ຽມ​ຊົມ 673 ຄັ້ງ ​

   ໃນວັນທີ 31 ສິງຫາ 2022, ສະມາຄົມມິດຕະພາບ ລາວ-ຮົງກາລີ ໄດ້ຈັດພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຮົງກາລີ ຄົບຮອບ 60 ປີ ( 12/09/1962- 12/9/2022 ), ໂດຍການໃຫ້ກຽດເຂົ້າຮ່ວມ ຂອງ ທ່ານ ສີທົງ ຈິດໂຍທິນ, ປະທານສະມາຄົມມິດຕະພາບ ລາວ-ຮົງກາລີ, ທ່ານ ລາສະໂລ ຕໍກາສ໌, ອຸປະທູດ ສ.ຮົງກາລີ ປະຈຳ ສປປ ລາວ. ນອກນັ້ນ, ຍັງມີຜູ້ຕາງໜ້າຈາກ ຄະນະພົວພັນຕ່າງປະເທດສູນກາງພັກ, ກະຊວງການຕ່າງປະເທດ,ບັນດາທ່ານຄະນະບໍລິຫານງານສະມາຄົມ ແລະ ສະມາຊິກສະມາຄົມມິດຕະພາບ ລາວ-ຮົງກາລີ ແລະ ແຂກຮັບເຊີນ 60 ກວ່າທ່ານເຂົ້າຮ່ວມຢ່າງພ້ອມພຽງ.

   ໃນພິທີດັ່ງກ່າວ ທ່ານ ສີທົງ ຈິດໂຍທິນ, ປະທານສະມາຄົມມິດຕະພາບ ລາວ-ຮົງກາລີ ໄດ້ມີຄຳເຫັນວ່າ ລາວ ແລະ ຮົງກາລີ ໄດ້ຮ່ວມກັນສ້າງຕັ້ງສາຍພົວພັນການທູດໃນວັນທີ 12 ກັນຍາ 1962, ນັບແຕ່ນັ້ນເປັນຕົ້ນມາສອງປະເທດ ໄດ້ພັດທະນາ ແລະ ເພີ່ມພູນຄູນສ້າງເປັນແຕ່ລະໄລຍະເຖິງແມ່ນວ່າ ລາວ ແລະ ຮົງກາລີ ຈະມີທີ່ຕັ້ງພູມສັນຖານຢູ່ຫ່າງໄກກັນຄົນລະທະວີບ ແຕ່ສອງປະເທດກໍ່ໄດ້ພັດທະນາສາຍພົວພັນໃຫ້ນັບມື້ແໜ້ນແຟ້ນ, ມີການໄປມາຫາສູ່ກັນ, ມີຄວາມໄວ້ເນື້ອເຊື່ອໃຈ ແລະ ຊ່ວຍເຫຼືອເຊິ່ງກັນ ແລະ ກັນຢ່າງຈິງໃຈ.  ຕະຫຼອດໄລຍະ 60 ປີທີ່ຜ່ານມາ ປະຊາຊົນສອງຊາດ ລາວ ແລະ ຮົງກາລີ ມີຄວາມເຂົ້າອົກເຂົ້າໃຈ ແລະ ສະໜັບສະໜູນເຊິ່ງກັນ ແລະ ກັນທັງໃນຂອບສອງຝ່າຍ ແລະ ຫຼາຍຝ່າຍ ຢູ່ພາກພື້ນ ແລະ ສາກົນ. ຜ່ານມາ ຮົງກາລີ ໄດ້ໃຫ້ການຊ່ວຍເຫຼືອຫຼາຍດ້ານ ແກ່ ສປປ ລາວ ເປັນຕົ້ນແມ່ນ ດ້ານການເມືອງ, ດ້ານເສດຖະກິດ, ສັງຄົມ ແລະ ວັດທະນະທຳ ແລະ ໂຄງການພັດທະນາອື່ນໆ. ສິ່ງທີ່ພົ້ນເດັ່ນ ແມ່ນ ການພັດທະນາຊັບພະຍາກອນມະນຸດ, ໃນແຕ່ລະປີ ລັດຖະບານ ສ.ຮົງກາລີ ໄດ້ສະໜັບສະໜູນທຶນການສຶກສາ ໃຫ້ ລັດຖະບານລາວ ຈຳນວນ 150 ກວ່າທຶນ, ເຊິ່ງທັງໝົດນັ້ນແມ່ນເປັນການຢັ້ງຢືນໃຫ້ເຫັນເຖິງຄວາມເປັນເພື່ອນມິດທີ່ໃກ້ຊິດ ແລະ ເພື່ອນມິດທີ່ໄວ້ວາງໃຈເຊິ່ງກັນ ແລະ ກັນ ຈົນກ້າວໄປສູ່ການຍົກລະດັບການພົວພັນຮ່ວມມືຂອງສອງປະເທດຂຶ້ນເປັນ  “ຄູ່ຮ່ວມມືຍຸດທະສາດ” ໃນເດືອນ ມີນາ 2019 ຜ່ານມາ. ພ້ອມນັ້ນຍັງໄດ້ມີການແລກປ່ຽນຢ້ຽມຢາມ ຄະນະຜູ້ແທນຂັ້ນຕ່າງໆ ນັບແຕ່ວິຊາການຈົນເຖິງຂັ້ນສູງຂອງລັດຖະບານ, ເຊິ່ງເປັນການຢັ້ງຢືນເຖິງຄວາມຜູກພັນທີ່ໃກ້ຊິດ ແລະ ຄວາມເປັນເພື່ອນມິດຢ່າງແທ້ຈິງ. ສໍາລັບ ສະມາຄົມມິດຕະພາບ ລາວ-ຮົງກາລີ ທີ່ເຮັດໜ້າທີ່ເຄື່ອນໄຫວວຽກງານການທູດປະຊົນ ພ້ອມທີ່ຈະປະກອບສ່ວນສະໜັບສະໜູນ ແລະ ເຮັດໜ້າທີ່ເປັນຂົວຕໍ່ໃນການຊຸກຍູ້ການພົວພັນຮ່ວມມືຂອງຂະແໜງການຕ່າງໆ ຂອງ ລາວ ແລະ ຮົງກາລີ ໃຫ້ກ້າວຂື້ນສູ່ລະດັບໃໝ່ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ.

    ທ່ານ ລາສະໂລ ຕໍກາສ໌, ອຸປະທູດ ສ.ຮົງກາລີ ປະຈຳ ສປປ ລາວ ໄດ້ມີຄຳເຫັນຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມື ຮົງກາລີ ແລະ ລາວ ແມ່ນສາຍພົວພັນທີ່ມີຄວາມແໜ້ນແຟ້ນ, ສະໜິດສະໜົມ,ລັດຖະບານ ແລະ ປະຊາຊົນ ຂອງ ສອງປະເທດ ມີຄວາມເຊື່ອໝັ້ນ, ໄວ້ເນື້ອເຊື່ອໃຈ ແລະ  ເຂົ້າໃຈເຊິ່ງກັນ ແລະ ກັນ,  ຊ່ວຍເຫຼືອກັນຕ່າງຝ່າຍຕ່າງມີຜົນປະໂຫຍດ. ໃນໂອກາດດັ່ງກ່າວ, ບັນດາອະດີດນັກສຶກສາລາວ ທີ່ ຮຽນຈົບຈາກ ສ.ຮົງກາລີ ຈຳນວນໜື່ງກໍ່ໄດ້ຂື້ນມີຄຳເຫັນ ສະແດງຄວາມຮູ້ສຶກ ຂອງ ຕົນໃນໄລຍະທີ່ຮຽນຢູ່ ຮົງກາລີ ແລະ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງລັດຖະບານ ແລະ ປະຊາຊົນສອງຊາດ ລາວ ແລະ ຮົງກາລີ ໃນໄລຍະໃໝ່ນີ້ແມ່ນໄລຍະການພົວພັນທີ່ມີປະສິດທິພາບ ແລະ ປະສິດທິຜົນ.

---