ພິທີປະກາດຮັບຮອງ ຄະນະຊາວໜຸ່ມ 4 ບຸກ ຄັ້ງທີ 2 ໃຫ້ແກ່ ຄະນະຊາວໜຸ່ມ ຄະນະພົວພັນຕ່າງປະເທດສູນກາງພັກ

ເຜີຍ​ແຜ່​ໂດຍ​: editor ເວ​ລາ: 12/08/2022 10:46:29 ຈຳ​ນວນ​​ຢ້ຽມ​ຊົມ 696 ຄັ້ງ ​

       ວັນ​ທີ 11 ສິງຫາ 2022, ທີ່ສຳນັກງານ ຄະນະພົວພັນຕ່າງປະເທດສູນກາງພັກ ໄດ້​ມີ​ພິ​ທີ​ປະ​ກາດ​ຮັບຮອງ​ຄະ​ນະ​ຊາວ​ໜຸ່ມ ປະ​ຊາ​ຊົນປະ​ຕິ​ວັດ​ລາວ 4 ບຸກ ຄັ້ງທີ 2 ໃຫ້​ແກ່ ຄະ​ນະ​ຊາວ​ໜຸ່ມຫຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາ​ງ​ພັກ. ໃຫ້​ກຽດ​ເຂົ້າ​ຮ່ວມ​ໃນ​ພິ​ທີ​ຄັ້ງນີ້ມີ ສະ​ຫາຍ ທອງສະຫວັນ ພົມວິຫານ, ກຳ​ມະ​ການ​ສູນກາງພັກ, ເລຂາຄະ​ນະ​ພັກ, ​ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ສະ​ຫາຍ ມອນໄຊ ລາວມົວຊົ່ງ, ກຳມະການສຳຮອງສູນກາງພັກ,​ ເລຂາຄະນະພັກ, ເລ​ຂາ​ຄະ​ນະ​ບໍ​ລິ​ຫານ​ງານ​ສູນ​ກາງ​ຊາວ​ໜຸ່ມປະ​ຊາ​ຊົນປະ​ຕິ​ວັດ​ລາວ. ນອກນັ້ນ, ​ຍັງ​ມີບັນ​ດາ​ສະ​ຫາຍ​ເລ​ຂາ​ໜ່ວ​ຍ​ພັກ, ອົງ​ການ​ຈັດ​ຕັ້ງ​ມະ​ຫາ​ຊົນ, ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ, ຄະນະໜ່ວຍ​ຊາວ​ໜຸ່ມ ແລະ ສະ​ມາ​ຊິກ​ຊາວ​ໜຸ່ມ​ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ​ແລະ ພາກ​ສ່ວ​ນ​ກ່ຽວ​ຂ້ອງ ​ຂອງ​ສູນ​ກາງ​ຊາວ​ໜຸ່ມ ​ປະ​ຊາ​ຊົນປະ​ຕິ​ວັດ​ລາວ ເຂົ້າ​ຮ່ວມ​ຢ່າງ​ພ້ອມ​ພຽງ.

       ​ໃນພິທີ, ຕາງໜ້າຄະນະບໍລິຫານງານຊາວໜຸ່ມ ຄະນະພົວພັນຕ່າງປະເທດສູນກາງພັກ ໄດ້ຂື້ນຜ່ານບົດສະຫຼຸບ ການເຄື່ອນໄຫວຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈຳປີ 2020 ເຊິ່ງສາມາດປະເມີນທັງ 4 ດ້ານ ຄື: ດ້ານແນວຄິດ, ດ້ານຝຶກຝົນຫຼໍ່ຫຼອມຮໍ່າຮຽນ, ດ້ານວຽກງານການຈັດຕັ້ງ ແລະ ດ້ານວິຊາຊີບ-ສ້າງວຽກເຮັດງານທຳ ເຊິ່ງປະຕິບັດໄດ້ ສະເລ່ຍ 91%. ຈາກການປະເມີນຜົນການຈັດຕັ້ງປະຕິບັດຂໍ້ແຂ່ງຂັນດັ່ງກ່າວ ເຫັນວ່າ ຄົບມາດຖານເງື່ອນໄຂທີ່ ຄະນະບໍ ລິຫານງານສູນກາງຊາວໜຸ່ມ ປະຊາຊົນປະຕິວັດລາວ ວາງອອກ. ສະນັ້ນ, ສູນກາງຊາວໜຸ່ມປະຊາຊົນ ປະຕິວັດລາວ ຈຶ່ງ ຕົກລົງມອບໃບຢັ້ງຢືນຊາວໜຸ່ມ 4 ບຸກ ໃຫ້ແກ່ ຄະນະຊາວໜຸ່ມ ຄະນະພົວພັນຕ່າງປະເທດສູນກາງພັກ ເປັນຄັ້ງທີ 2.

       ໃນໂອກາດອັນມີຄວາມໝາຍສຳຄັນນີ້, ສະຫາຍ ທອງສະຫວັນ ພົມວິຫານ ແລະ ສະຫາຍ ມອນໄຊ ລາວມົວຊົ່ງ ໄດ້ມີຄຳເຫັນສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ຂອງ ຄະນະຊາວໜຸ່ມ ຄະນະພົວພັນຕ່າງປະເທດ ສູນກາງພັກ ທີ່ຍາດມາໄດ້ໃນໄລຍະຜ່ານມາ ເຊິ່ງເປັນພື້ນຖານອັນສຳຄັນໃນການສືບຕໍ່ສູ້ຊົນຍາດໄດ້ນາມມະຍົດຊາວໜຸ່ມ 4 ບຸກ ຄັ້ງທີ 3 ປະຈຳປີ 2021 ແລະ ທຸງໄຊນຳໜ້າຂະບວນການ 4 ບຸກ ຂອງສູນກາງຊາວໜຸ່ມ ປະຊາຊົນປະຕິວັດລາວ ໃນຕໍ່ໜ້າ. ຄຽງຄູ່ກັນນັ້ນ, ກໍໄດ້ເນັ້ນໜັກໃຫ້ ສະມາຊິກຊາວໜຸ່ມ ຄະນະພົວພັນຕ່າງປະເທດສູນກາງພັກ ຕ້ອງໄດ້ສືບຕໍ່ເອົາໃຈໃສ່ໃນການຝຶກຝົນຫຼໍ່ຫຼອມຕົນເອງ, ເຊີດຊູ ແລະ ຮັກສາມູນເຊື້ອອັນດີງາມຂອງພັກ, ຂອງຊາດ, ຂອງຊາວໜຸ່ມລາວ; ຮູ້ອະນຸລັກຮັກສາ ແລະ ສົ່ງເສີມວັດທະນະທຳອັນດີງາມຂອງປະຊາຊົນລາວບັນດາເຜົ່າ, ຕັ້ງໜ້າຍົກລະດັບຄວາມຮູ້, ຄວາມສາມາດທາງດ້ານວິຊາສະເພາະ, ເຕັກໂນໂລຊີຂໍ້ມູນຂ່າວສານ, ພາສາຕ່າງປະເທດ, ສ້າງວິຊາ ການມືອາຊີບ; ຊຸກຍູ້ສ້າງສາຍພົວພັນຮ່ວມມືກັບຊາວໜຸ່ມປະເທດເພື່ອນມິດຍຸດທະສາດ, ບັນດາປະເທດໃນ ພາກພື້ນ ແລະ ສາກົນ ໃຫ້ນັບມື້ນັບຫຼາຍຂື້ນ ເພື່ອຍາດແຍ່ງເອົາການສະໜັບສະໜູນ, ຊ່ວຍເຫຼືອ ແລະ ແລກປ່ຽນບົດຮຽນ ໃນການພັດທະນາຊາວໜຸ່ມ ໃຫ້ນັບມື້ກວ້າງຂວາງຂື້ນໄປເລື້ອຍໆ.​

---