ວັນສ້າງຕັ້ງ ຄະນະສັນຕິພາບ ແລະ ສາມັກຄີ ຂອງ ລາວ ຄົບຮອບ 39 ປີ

ເຜີຍ​ແຜ່​ໂດຍ​: editor ເວ​ລາ: 03/08/2022 16:11:40 ຈຳ​ນວນ​​ຢ້ຽມ​ຊົມ 710 ຄັ້ງ ​

       ຄະນະສັນຕິພາບ ແລະ ສາມັກຄີ ຂອງ ລາວ ໄດ້ຮັບການສ້າງຕັ້ງຂຶ້ນໃນວັນທີ 1 ສິງຫາ 1983, ເຊິ່ງເມື່ອກ່ອນມີຊື່ວ່າ: ຄະນະກຳມະການລາວ ເພື່ອສັນຕິພາບ, ສາມັກຄີ ແລະ ມິດຕະພາບ ກັບປະຊາຊາດ (Lao Committee for Peace, Solidarity and Friendship with Peoples), ເຊິ່ງແມ່ນ ທ່ານ ສິງກະໂປ ສີໂຄດຈຸນລະມະນີ ເປັນປະທານຜູ້ທຳອິດ. ໃນເວລານັ້ນ, ຄະນະກຳມະການນີ້ ມີຖານະເປັນອົງການຈັດຕັ້ງມະຫາຊົນໜຶ່ງທີ່ມີພາລະບົດບາດໃນການປະກອບ ສ່ວນຕໍ່ສູ້ ເພື່ອປົກປັກຮັກາສາສັນຕິພາບໂລກ, ເສີມສ້າງສາມັກຄີ ແລະ ມິດຕະພາບກັບປະຊາຊາດຕ່າງໆໃນໂລກ, ສະໜັບສະໜູນການຕໍ່ສູ້ອັນເປັນທໍາ ຂອງ ບັນດາປະຊາຊາດ ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ, ຍຸດຕິທຳ, ການຮ່ວມມືເພື່ອການພັດທະນາ ແລະ ຄວາມກ້າວໜ້າທາງສັງຄົມ, ປະກອບສ່ວນສ້າງສະພາບແວດລ້ອມທີ່ມີສັນຕິພາບ, ສະຖຽນລະພາບ ມິດຕະພາບ ແລະ ການຮ່ວມມືເພື່ອການພັດທະນາ ຂອງ ພາກພື້ນ ແລະ ຂອງໂລກ ບົນພື້ນຖານແຫ່ງຫລັກການຢູ່ຮ່ວມກັນໂດຍສັນຕິ ແລະ ກົດບັດຂອງອົງການສະຫະປະຊາຊາດ.

       ການເຄື່ອນໄຫວ ໄລຍະຜ່ານມາ ຄະນະສັນຕິພາບ ແລະ ສາມັກຄີ ຂອງລາວ ໄດ້ເຮັດໜ້າທີ່ໂຄສະນາເຜີຍແຜ່ກ່ຽວກັບການປົກປັກຮັກສາສັນຕິພາບ ແລະ ຜົນຮ້າຍຂອງສົງຄາມ ໂດຍຈັດກິດຈະກຳໃຫ້ຊາວໜຸ່ມ, ເຍົາວະຊົນ ແລະ ໃຫ້ປະຊາຊົນລາວບັນດາເຜົ່າໄດ້ຮັບຮູ້, ເຂົ້າໃຈ ແລະ ເຫັນໄດ້ເຖິງຄວາມສຳຄັນຂອງວຽກງານສັນຕິພາບ ເຊິ່ງຍາມໃດກໍຕິດພັນກັບການພັດທະນາ. ພ້ອມນັ້ນກໍ່ຍົກໃຫ້ເຫັນເຖິງຜົນຮ້າຍຂອງສົງຄາມ ກໍ່ຄືການແກ້ໄຂບັນຫາດ້ວຍກຳລັງອາວຸດ, ເຊິ່ງໄດ້ທຳລາຍຊີວິດຂອງປະຊາຊາດ ແລະ ຊັບສິນ ໃນໂລກຢ່າງມະຫາສານໃນໄລຍະຜ່ານມາ. ສໍາລັບການເຄື່ອນໄຫວໃນເວທີສາກົນ ຄະນະສັນຕິພາບ ແລະ ສາມັກຄີຂອງລາວ ໄດ້ພົວພັນສອງຝ່າຍ ແລະ ຫລາຍຝ່າຍກັບອົງການຈັດຕັ້ງສັນຕິພາບຂອງປະເທດເພື່ອນມິດ ໂດຍສະເພາະກັບ ສະພາສັນຕິພາບໂລກ (World Peace Council), ອົງການສາມັກຄີ ກັບປະຊາຊົນ ອາຊີ-ອາຟຣິກາ (OSPAA), ອົງການສາມັກຄີກັບປະຊາຊົນອາຊີ- ອາຟຣິກາ ແລະ ອາເມລິກາລາຕິນ (OSPAAAL), ຄະນະກຳມະການສັນຕິພາບ ຫວຽດນາມ,  ສະມາຄົມ ປະຊາຊົນ ຈີນ ເພື່ອສັນຕິພາບ ແລະ ຫລຸດຜ່ອນອາວຸດ,  ກອງທຶນຈີນ ເພື່ອສັນຕິພາບ ແລະ ການພັດທະນາ ແລະ ອົງການສັນຕິພາບໃນພາກພື້ນອື່ນໆ ທີ່ເປັນສະມາຊິກ ຂອງ ສະພາສັນຕິພາບໂລກ.

       ຜົນສຳເລັດອັນພົ້ນເດັ່ນໃນການເຄື່ອນໄຫວໃນໄລຍະຜ່ານມາ ໄດ້ຈັດກິດຈະກຳລະດົມປັດໄຈ ເພື່ອຊ່ວຍເຫລືອ ຜູ້ປະສົບໄພທຳມະຊາດທັງຢູ່ພາຍໃນ ແລະ ຕ່າງປະເທດດ້ວຍຫຼາຍຮູບແບບເຊັ່ນ: ຈັດຄອນເສີດຫາລາຍໄດ້ ເພື່ອຊ່ວຍເຫລືອປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມ ຢູ່ 3 ແຂວງພາກໃຕ້ ຂອງ ລາວປີ 2009, ຈັດຄອນເສີດລະດົມປັດໄຈຊ່ວຍເຫລືອ ປະຊາຊົນປະເທດໄຮຕິ ປະສົບແຜ່ນດິນໄຫວ ປີ 2010 ແລະ ຈັດຄອນເສີດລະດົມປັດໄຈຊ່ວຍເຫລືອປະຊາຊົນຍີ່ປຸ່ນປະສົບໄພສຶນາມິ ໃນເດືອນມີນາ ປີ 2011, ເປັນເຈົ້າພາບຈັດກອງປະຊຸມຂົງເຂດອາຊີປາຊີຟິກ ແລະ ກອງປະຊຸມຄະນະເລຂາຂອງສະພາສັນຕິພາບໂລກ ໃນປີ 2019, ປີ 2013-2021 ໄດ້ຂົນຂວາຍທຶນຈາກອົງການສັນຕິພາບເພື່ອນມິດ ມາສ້າງສາພັດທະນາຢູ່ ສປປ ລາວ ເປັນຕົ້ນແມ່ນສ້າງພື້ນຖານໂຄງລ່າງດ້ານການສຶກສາ, ເຊິ່ງໄດ້ສ້າງໂຮງຮຽນປະຖົມ ແລະ ມັດທະຍົມໄດ້ທັງໝົດ 12 ຫຼັງ ແລະ ອຸປະກອນການຮຽນການສອນ ລວມມູນຄ່າ 3.000.000 ກວ່າໂດລາ. ນອກນັ້ນ ຍັງໄດ້ເຂົ້າຮ່ວມກອງປະຊຸມສາກົນ ເພື່ອຕ້ານການຊ່ວງເສັງການປະກອບອາວຸດ, ຕ້ານການໃຊ້ກຳລັງທະຫານ ແລະ ສະໜັບສະໜູນຖະແຫຼງການຕ່າງໆ ຂອງ ສະພາສັນຕິພາບໂລກ, ອົງການຈັດຕັ້ງສັນຕິພາບພາກພື້ນຕ່າງໆ. ຍ້ອນການເຄື່ອນໄຫວ ແລະ ປະກອບສ່ວນຫ້າວຫັນເຮັດໃຫ້ສາກົນຮັບຮູ້ບົດບາດ ຂອງ ຄະນະສັນຕິພາບ ແລະ ສາມັກຄີຂອງລາວ ກໍ່ຄືບົດບາດຂອງ ສປປ ລາວ.  ເຫດການອັນພົ້ນເດັ່ນ ແລະ ເອກອ້າງທີ່ເປັນປະຫວັດສາດໃຫ້ແກ່ພວກເຮົາແມ່ນ ຄະນະກຳມະການຄ້ອງສັນຕິພາບໂລກ ອິນໂດເນເຊຍ ໄດ້ມອບລາງວັນອັນຊົງກຽດຄື "ຄ້ອງສັນຕິພາບໂລກ (World Peace Gong)" ໃຫ້ແກ່ ສປປ ລາວ ໃນປີ 2008, ເຊິ່ງເປັນປະເທດທຳອິດໃນບັນດາປະເທດອາຊຽນ ແລະ ເປັນປະເທດທີ 4 ໃນໂລກ (ຖັດຈາກ ຈີນ, ອິນເດຍ,​ ໂມຊໍາບິກ) ທີ່ໄດ້ຮັບລາງວັນອັນຊົງກຽດດັ່ງກ່າວຈາກ ຄະນະກໍາມະການສັນຕິພາບໂລກອິນໂດເນເຊຍ. ປະຈຸບັນຄ້ອງດັ່ງກ່າວປະດິດສະຖານໄວ້ຢູ່ສວນປະຕູໄຊ.

       ສຳລັບທິດທາງແຜນການເຄື່ອນໄຫວໃນຕໍ່ໜ້າ ຄະນະສັນຕິພາບ ແລະ ສາມັກຄີ ຂອງລາວ ຈະສືບຕໍ່ສືກສາອົບຮົມໃຫ້ປະຊາຊົນລາວບັນດາເຜົ່າເປັນຕົ້ນແມ່ນຊາວໜຸ່ມເຍົາວະຊົນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບ ຄວາມສຳຄັນຂອງສັນຕິພາບ ເຊິ່ງເປັນເງື່ອນໄຂອັນພື້ນຖານໃຫ້ແກ່ພາລະກິດປົກປັກຮັກສາ ແລະ ສ້າງສາປະເທດຊາດ. ຄະນະ ຈະສືບຕໍ່ຮ່ວມມືກັບສະພາສັນຕິພາບໂລກ ແລະ ອົງການຈັດຕັ້ງສັນຕິພາບພາກພື້ນ ປະກອບສ່ວນເພື່ອບັນລຸການພັດທະນາແບບຍືນຍົງ ຕິດພັນກັບການປົກປັກຮັກສາສະພາບແວດລ້ອມ, ຫລຸດຜ່ອນຄວາມທຸກຍາກ, ລົບລ້າງຄວາມອຶດຫິວ ແລະ ຜົນຮ້າຍອື່ນໆທາງສັງຄົມ ເພື່ອເສີມຂະຫຍາຍບົດບາດ ຂອງ ອົງການສັນຕິພາບ ຂອງ ລາວ ໃຫ້ເດັ່ນຂຶ້ນຕື່ມໃນເວທີສາກົນ. ປະຈຸບັນປະທານຄະນະສັນຕິພາບ ແລະ ສາມັກຄີຂອງລາວແມ່ນ ທ່ານ ສົມມາດ ພົລເສນາ, ກຳມະການສູນກາງພັກ, ຮອງປະທານສະພາແຫ່ງຊາດ.

---