ຄະນະພົວພັນຕ່າງປະເທດສູນກາງພັກ ເຜີຍແຜ່ເອກະສານສຳຄັນຂອງພັກ, ຂອງຊາດ

ເຜີຍ​ແຜ່​ໂດຍ​: editor ເວ​ລາ: 29/07/2022 14:54:45 ຈຳ​ນວນ​​ຢ້ຽມ​ຊົມ 665 ຄັ້ງ ​

       ໃນທ່າມກາງບັນຍາກາດທີ່ເຕັມໄປດ້ວຍຄວາມສາມັກຄີອັນດູູດດື່ມ, ມິດຕະພາບ ແລະ ຄວາມເບີກບານມ່ວນຊື່ນຂອງທັງສອງພັກ, ສອງລັດ ລາວ-ຫວຽດນາມ-ລາວ ແລະ ໃນໂອກາດລະນຶກວັນຄ້າຍວັນເກີດ ປະທານ ສຸພານຸວົງ ຄົບຮອບ 113 ປີ. ໃນວັນທີ 26 ກໍລະກົດ 2022, ຄະນະພົວພັນຕ່າງປະເທດສູນກາງພັກ (ຄຕພ)  ໄດ້ຈັດກອງປະຊຸມເຜີຍແຜ່ເອກະສານວັນສ້າງຕັ້ງສາຍພົວພັນການທູດ ຄົບຮອບ 60 ປີ,  ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ - ຫວຽດນາມ ຄົບຮອບ 45 ປີ  ແລະ  ວັນເກີດປະທານ ສຸພານຸວົງ ຄົບຮອບ 113 ປີ ໂດຍການເປັນປະທານຂອງ  ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ເລຂາຄະນະພັກ,  ຫົວໜ້າຄະນະພົວພັນຕ່າງປະເທດສູນກາງພັກ ແລະ ມີບັນດາສະຫາຍໃນຄະນະບໍລິຫານງານພັກ,  ສະມາຊິກພັກ - ພະນັກງານ ​ທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມຢ່າງພ້ອມພຽງ.

       ໃນພິທີສະຫາຍ ທອງສະຫວັນ ພົມວິຫານ ໄດ້ຫວນຄືນມູນເຊື້ອຊີວິດ, ການເຄື່ອນໄຫວ,  ຜົນງານ ແລະ ຄຸນງາມຄວາມດີ ຂອງ ປະທານ ສຸພານຸວົງ ໃນທຸກໄລຍະຂອງການປະຕິວັດ ທີ່ໄດ້ສຸມສະຕິປັນຍາ ແລະ ເຫື່ອແຮງເພື່ອນໍາພາ ປະຊາຊົນບັນດາເຜົ່າດໍາເນີນພາລະກິດປົດປ່ອຍຊາດ ແລະ  ສ້າງສາພັດທະນາປະເທດຊາດ.

       ຫຼັງຈາກນັ້ນ, ສະຫາຍ ໄດ້ສືບຕໍ່ເຜີຍແຜ່ເອກະສານວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ຊຶ່ງເປັນເຫດການທີ່ມີຄວາມໝາຍປະຫວັດສາດ ໃນການພົວພັນລາວ-ຫວຽດນາມ ເພື່ອຫວນຄືນເສັ້ນທາງປະຫວັດສາດແຫ່ງການຕໍ່ສູ້ອັນອົງອາດກ້າຫານ ຂອງປະຊາຊົນລາວບັນດາເຜົ່າໂດຍມີການຮ່ວມມື ແລະ ສົມທົບຢ່າງແໜ້ນແຟ້ນກັບການປະຕິວັດ ຫວຽດນາມ ສາມາດຍາດໄດ້ໄຊຊະນະທີ່ສໍາຄັນທັງດ້ານການເມືອງ, ການທະຫານ, ການຕ່າງປະເທດ ກ້າວໄປເຖິງການລົງນາມສົນທິສັນຍາເຊີແນວ 1962 ກ່ຽວກັບລາວ, ເປີດສັງກາດໃໝ່ໃຫ້ແກ່ການປະຕິວັດຂອງສອງປະເທດລາວ ແລະ ຫວຽດນາມ, ດ້ວຍກາລະໂອກາດ ແລະ ເງື່ອນໄຂເອື້ອອໍານວຍນັ້ນ, ສອງປະເທດ ໄດ້ສ້າງສາຍພົວພັນການທູດນໍາກັນຢ່າງເປັນທາງການ ໃນວັນທີ 05 ກັນຍາ 1962,  ພາຍຫຼັງສອງປະເທດໄດ້ຮັບການປົດປ່ອຍຢ່າງສົມບູນ ເພື່ອເສີມຂະຫຍາຍ ສາຍພົວພັນລາວ-ຫວຽດນາມ  ໃຫ້ມີການພັດທະນາຢ່າງຮອບດ້ານ ແລະ ນັບມື້ນັບກ້າວເຂົ້າສູ່ລວງເລິກ ສອງປະເທດ ໄດ້ລົງນາມສົນທິສັນຍາມິດຕະພາບ ແລະ ການຮ່ວມມື ໃນວັນທີ 18 ກໍລະກົດ 1977 ເປັນຕົ້ນມາ.

       ການເຜີຍແຜ່ໃນຄັ້ງນີ້ ເປັນໂອກາດທີ່ດີເພື່ອໃຫ້ພະນັກງານ ຄະນະພົວພັນຕ່າງປະເທດສູນກາງພັກ ໄດ້ຮໍ່າຮຽນເອົາຄຸນສົມບັດສິນທໍາປະຕິວັດ ແລະ ແບບແຜນດໍາລົງຊີວິດ ຂອງປະທານ ສຸພານຸວົງ ຜູ້ນໍາດີເດັ່ນທີ່ແສນເຄົາລົບຮັກຂອງປະຊາຊົນລາວບັນດາເຜົ່າ. ພ້ອມທັງໄດ້ຮັບຮູ້ເຂົ້າໃຈຢ່າງເລິກເຊິ່ງຕໍ່ຂະບວນວິວັດແຫ່ງການກໍາເນີດ ແລະ ຂະຫຍາຍຕົວຂອງສາຍພົວພັນພິເສດ ທີ່ຫາໄດ້ຍາກລະຫວ່າງ ສອງຊາດ ລາວ -ຫວຽດນາມ ທີ່ປະທານ ໂຮ່ຈີມິນ ພ້ອມກັບ ປະທານ ໄກສອນ ພົມວິຫານ, ປະທານ ສຸພານຸວົງ ແລະ ການນໍາຮຸ່ນຕ່າງໆ ຂອງສອງພັກ, ສອງລັດ ເປັນຜູ້ກໍ່ຕັ້ງ ແລະ ໄດ້ເພີ່ມພູນຄູນສ້າງ ກາຍເປັນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ - ຫວຽດນາມ.

---