ຫົວໜ້າຄະນະພົວພັນຕ່າງປະເທດສູນກາງພັກ ລາວ-ຈີນ ພົບປະຜ່ານວິດີໂອທາງໄກ

ເຜີຍ​ແຜ່​ໂດຍ​: editor ເວ​ລາ: 25/07/2022 16:03:43 ຈຳ​ນວນ​​ຢ້ຽມ​ຊົມ 576 ຄັ້ງ ​

       ໃນວັນທີ 22 ກໍລະກົດ 2022 ທີ່ຄະນະພົວພັນຕ່າງປະເທດສູນກາງພັກ (ຄຕພ), ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ພົບປະເຮັດວຽກຜ່ານວິດີໂອທາງໄກກັບ ສະຫາຍ ຫຼິວ ຈ້ຽນຊາວ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ.

       ໃນການພົບປະ, ສອງຝ່າຍ ໄດ້ເອກະພາບກັນຕີລາຄາສູງ ຕໍ່ ການພົວພັນຮ່ວມມື ລະຫວ່າງ ສອງພັກ, ສອງ ຄຕພ ລາວ-ຈີນ ໃນຕະຫຼອດໄລຍະຜ່ານມາ, ເຖິງຈະມີຄວາມຫຍຸ້ງຍາກ ເນື່ອງຈາກການແຜ່ລະບາດຂອງພະຍາດໂຄວິດ-19, ແຕ່ສອງຝ່າຍ ສືບຕໍ່ໃຫ້ຄວາມສຳຄັນໃນລະດັບສູງຕໍ່ການພົວພັນ ລາວ-ຈີນ ໃຫ້ການສະໜັບສະໜູນເຊິ່ງກັນແລະກັນ, ຮັກສາໄດ້ກົນໄກການພົບປະປະຈໍາປີ ລະຫວ່າງ ເລຂາທິການໃຫຍ່, ປະທານປະເທດ ແລະ ການນໍາຂັ້ນຕ່າງໆ ຂອງສອງພັກ, ສອງລັດ ລາວ-ຈີນ, ເຊິ່ງເປັນການເສີມສ້າງຄວາມໄວ້ເນື້ອເຊື່ອໃຈເຊີ່ງກັນແລະກັນຢ່າງເລິກເຊີ່ງ ແລະ ເປັນພື້ນຖານອັນໜັກແໜ້ນໃຫ້ແກ່ການຮ່ວມມືໃນຂະແໜງການອື່ນໆ. ພ້ອມດຽວກັນນັ້ນ, ພາຍໃຕ້ການນໍາພາຊີ້ນໍາຢ່າງໃກ້ຊິດ ຂອງ ການນໍາສູງສຸດ ຂອງ ສອງພັກ, ສອງລັດ ລາວ-ຈີນ, ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ ໄດ້ຮັບການຈັດຕັ້ງປະຕິບັດ ແລະ ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ; ການຈັດຕັ້ງຜັນຂະຫຍາຍບັນດາແຜນການ ແລະ ກົນໄກການຮ່ວມມືຕ່າງໆ ເປັນຕົ້ນແມ່ນ ແຜນການຮ່ວມມື ລະຫວ່າງ ສອງພັກ ແລະ ແຜນການຮ່ວມມືບໍາລຸງສ້າງພະນັກງານ ລາວ-ຈີນ ທີ່ສອງພັກ, ສອງລັດ ໄດ້ລົງນາມຮ່ວມກັນໃນທ້າຍປີ 2021 ຜ່ານມາ ແມ່ນພວມໄດ້ຮັບການຄົ້ນຄວ້າ ເພື່ອຈັດຕັ້ງປະຕິບັດໃຫ້ສໍາເລັດຕາມແຜນການ ແລະ ຄາດໝາຍ.

       ສອງຝ່າຍ ຍັງໄດ້ລົງເລິກແລກປ່ຽນຄໍາຄິດເຫັນ ແລະ ເປັນເອກະພາບກັນ ກ່ຽວກັບ ທິດທາງການຮ່ວມມື ລະຫວ່າງ ສອງຄະນະພົວພັນຕ່າງປະເທດສູນກາງພັກ ລາວ-ຈີນ ໃນການເປັນເສນາທິການໃຫ້ແກ່ການພົວພັນຮ່ວມມື ລະຫວ່າງ ສອງພັກ ລາວ-ຈີນ ໃນຕໍ່ໜ້າ, ໂດຍສະເພາະແມ່ນ ການຈັດຕັ້ງຜັນຂະຫຍາຍ ແຜນແມ່ບົດວ່າດ້ວຍການສ້າງຄູ່ຮ່ວມຊະຕາກໍາ ລາວ-ຈີນ, ການຈັດຕັ້ງປະຕິບັດແຜນການຮ່ວມມື ລະຫວ່າງ ສອງພັກ ແລະ ແຜນການຮ່ວມມືບຳລຸງສ້າງພະນັກງານ ລະຫວ່າງ ສອງພັກ ເພື່ອໃຫ້ສໍາເລັດຕາມຄາດໝາຍ.

       ໃນການພົບປະ, ຝ່າຍຈີນ ໄດ້ມອບປຶ້ມ “ສີຈິ້ນຜິງ ວ່າດ້ວຍ ການປົກຄອງລັດ-ບໍລິຫານປະເທດ ເຫຼັ້ມທີ 4” ໃຫ້ຝ່າຍລາວ ຈໍານວນໜຶ່ງ.

       ໃນໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍຕໍ່ ສະຫາຍ ຫຼິວ ຈ້ຽນຊາວ ທີ່ໄດ້ຮັບການແຕ່ງຕັ້ງເປັນ ຫົວໜ້າຄະນະພົວພັນຕ່າງປະເທດສູນກາງພັກກອມມູນິຈີນ ຄົນໃໝ່ ແລະ ເຫັນດີຈະສືບຕໍ່ຮ່ວມມືໃຫ້ແໜ້ນແຟ້ນຍິ່ງຂຶ້ນ ເພື່ອປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ທີ່ເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດ, ຮອບດ້ານ, ໝັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກຳ ລາວ-ຈີນ ໃຫ້ແຕກດອກອອກຜົນຍິ່ງໆຂືຶ້ນ; ພ້ອມທັງ ອວຍພອນໃຫ້ການກະກຽມດໍາເນີນກອງປະຊຸມໃຫຍ່ ຄັ້ງທີ XX ຂອງພັກກອມມູນິດຈີນ ໃນທ້າຍປີນີ້ ປະສົບຜົນສໍາເລັດຢ່າງຈົບງາມ.

---