ຫົວໜ້າ ຄະນະພົວພັນຕ່າງປະເທດສູນກາງພັກ ຕ້ອນຮັບການເຂົ້າຢ້ຽມຂໍ່ານັບ ຂອງເອກອັກຄະລັດຖະທູດ ສ. ຝຣັ່ງ ປະຈໍາ ສ ປປ ລາວ

ເຜີຍ​ແຜ່​ໂດຍ​: editor ເວ​ລາ: 15/07/2022 10:45:18 ຈຳ​ນວນ​​ຢ້ຽມ​ຊົມ 375 ຄັ້ງ ​

       ໃນວັນ​ທີ 07 ເມ​ສາ 2022, ທີ່ ​ສຳ​ນັກ​ງານ​ຄະ​ນະ​ພົວ​ພັນ​ຕ່າງ​ປະ​ເທດສູນ​ກາງ​ພັກ,​ ທ່ານ ທອງສະຫວັນ ພົມວິຫານ, ​ກຳ​ມະ​ການ​ສູນ​ກາງ​ພັກ, ຫົວ​ໜ້າ​ຄ​ະ​ນະ​ພົວ​ພັນ​ຕ່າງ​ປະ​ເທດສູນ​ກາງ​ພັກ ໄດ້​ຕ້ອນຮັບການ​ເຂົ້າ​ຢ້ຽມ​ຂ່ຳ​ນັບຂອງ​ ທ່ານ ນາງ ຊິວ​-ແລັງ ຊູ​ອອກ (Siv-Leng CHHUOR), ເອກອັກຄະລັດຖະທູດວິ​ສາ​ມັນຜູ້​ມີ​ອຳ​ນາດ​ເຕັມ ແຫ່ງ ສ. ຝ​ຣັ່ງ ປະຈໍາ ສປປ ລາວ ຄົນ​ໃໝ່.

       ​ໃນໂອກາດດັ່ງ​ກ່າວ, ທ່ານ ທອງສະຫວັນ ພົມວິຫານ ໄດ້ສະ​ແດງ​ຄວາມຍິນດີຕ້ອນຮັບອັນອົບອຸ່ນ ແລະ ຊົມເຊີຍທ່ານທູດທີ່ຖືກແຕ່ງຕັ້ງມາປະຕິບັດໜ້າທີ່ຢູ່ ສປປ ລາວ, ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສ. ຝ​ຣັ່ງ ຕະຫຼອດໄລຍະເກືອບ​ເຈັດ​ທົດ​ສະ​ວັດ (1953-2022) ແຫ່ງ​ການ​ສ້າງ​ສາຍ​ພົວ​ພັນ​ການ​ທູດ​ນຳ​ກັນຜ່ານມາ, ສະ​ແດງ​ຄວາມ​ຂອບ​ໃຈ​​ຕໍ່​ການສະ​ໜັບ​ສະ​ໜູນ ແລະ ​ຊ່ວຍ​ເຫຼືອ​ຂອງ​ລັດ​ຖະ​ບານ​ຝ​ຣັ່ງ​​ໃນ​ໄລ​ຍະ​​ຜ່ານ​ມາ, ຊຶ່ງໄດ້​ປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການ​ສ້າງ​ສາ​ພັດ​ທະ​ນາ ສ​ປ​ປ ລາວ. ພ້ອມກັນນັ້ນ, ໄລຍະການແຜ່ລະບາດຂອງພະຍາດໂຄວິດ-19 ລັດ​ຖະ​ບານ​ ແລະ ປະ​ຊາ​ຊົນ  ຝ​ຣັ່ງ ຍັງໄດ້ຊ່ວຍເຫຼືອຢາວັກແຊັງ, ການ​ຊ່ວຍ​ເຫຼືອ​ດ້ານ​ອາ​ຫານໃຫ້​ແກ່ແພດໝໍ ແລະ ຄົນ​ເຈັບທີ່​ຕິດ​ເຊື້ອ​ພະ​ຍາດ​ໂຄວິດ-19 ຢູ່ ​ບາງ​ໂຮງ​ໝໍ​ຂອງ​ ສ ​ປ​ປ ລາວ. ພ້ອມ​ທັງເຊື່ອໝັ້ນວ່າ ໃນໄລຍະທ່ານທູດມາປະຕິບັດໜ້າທີ່ຢູ່ ສ​ປ​ປ ລາວ ຈະມີການຮ່ວມມືກັນຢ່າງໃກ້ຊິດກັບຂະແໜ່ງການຕ່າງໆຂອງ ສປປ ລາວ ເພື່ອສົ່ງເສີມການພົວພັນຮ່ວມມືສອງຝ່າຍ ໃຫ້ນັບມື້ກວ້າງຂວາງ ແລະ ເປັນຮູບປະທໍາຫຼາຍຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຝ​ຣັ່ງ.

       ທ່ານ ນ. Siv-Leng CHHUOR ໄດ້​ສະແດງຄວາມຂອບ​ໃຈ​ຢ່າງ​ຈິງ​ໃຈຕໍ່ ການ​ຕ້ອນຮັບ​ອັນ​ອົບ​ອຸ່ນໃນຄັ້ງນີ້, ພ້ອມທັງຊົມເຊີຍ​ຜົນສຳ​ເລັດຂອງ ສປປ ລາວ ໃນການປົກປັກຮັກສາ ແລະ ການສ້າງສາ​ພັດທະນາ​ປະ​ເທດຕະຫຼອດໄລຍະ 46 ປີ ທີ່ຜ່ານມາ, ພິເສດແມ່ນການຮັບມືກັບການແຜ່ລະບາດຂອງເຊື້ອພະຍາດ Covid-19 ຢູ່ ສປປ ລາວ. ພ້ອມນັ້ນ, ທ່ານທູດ ໄດ້​ຢືນ​ຢັນ​ວ່າ ຈະສືບຕໍ່ຮ່ວມມືກັບພາກສ່ວນກ່ຽວຂ້ອງຂອງລາວເພື່ອປະກອບສ່ວນເຂົ້າໃນການເສີມຂະຫຍາຍການພົວພັນຮ່ວມ​ມືສອງຝ່າຍ ລວມທັງຈະສືບ​ຕໍ່​ຍົກສູງການ​ຮ່ວມ​ມື​ ໃນ​ຂອບ​ຝ​ຣັ່ງ​ໂກ​ໂຟນ​ນີ (Francophonie) ເພື່ອສົ່ງເສີມການສຶກສາ ແລະ ວັດທະນະທຳ ລະຫວ່າງ ສ. ຝ​ຣັ່ງ ແລະ ສປປ ລາວ ໃຫ້ນັບມື້ແໜ້ນແຟ້ນ ແລະ ເກີດດອກອອກຜົນຍິ່ງໆຂື້້ນ.

​       ໃນຕອນທ້າຍ, ທ່ານ ທອງສະຫວັນ ພົມວິຫານ ໄດ້ອວຍ​ພອນ​ໃຫ້​ແກ່ ທ່ານ ນ. Siv-Leng CHHUOR ຈົ່ງມີສຸຂະພາບແຂງແຮງ ແລະ ປະ​ສົບ​ຜົນສຳ​ເລັດ​ໃນການປະຕິບັດ​​ໜ້າທີ່​ການ​ທູດອັນມີກຽດສູງສົ່ງ​ຂອງ​ຕົນ​ ຢູ່ ສປປ ລາວ.

---