ສະຫາຍເລຂາທິການໃຫຍ່, ປະທານປະເທດແຫ່ງ ສປປ ລາວ ຕ້ອນຮັບການເຂົ້າຢ້ຽມຂໍ່ານັບ ຂອງຄະນະຜູ້ແທນຂັ້ນສູງ ນະຄອນຫຼວງຮ່າໂນ້ຍ, ສສ ຫວຽດນາມ

ເຜີຍ​ແຜ່​ໂດຍ​: editor ເວ​ລາ: 14/07/2022 15:43:17 ຈຳ​ນວນ​​ຢ້ຽມ​ຊົມ 746 ຄັ້ງ ​

       ໃນຕອນແລງຂອງວັນທີ 4 ເມສາ 2022, ຢູ່ທີ່ ສໍານັກງານສູນກາງພັກ, ສະຫາຍ ທອງລຸນສີສຸລິດ, ເລ ຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະ​ຫາຍ ດິ່ງ ຕຽນ ຢູງ, ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ເລ​ຂາ​ຄະ​ນະ​ພັກ​ນະ​ຄອນຫຼ​ວງ​ຮ່າ​ໂນ້ຍ ພ້ອມ​ດ້ວຍ​ຄະ​ນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ນະຄອນ ຫຼວງວຽງຈັນ ແຕ່​ວັນ​ທີ 3 - 5/4/2022. ໃນການພົບປະສົນທະນາ, ສະຫາຍເລຂາທິການໃຫຍ່, ປະທານປະເທດ ທອງລຸນ ສີສຸລິດ ໄດ້ສະແດງຄວາມປິຕິຍິນດີ ເປັນຢ່າງຍິ່ງ ທີ່ໄດ້ຕ້ອນຮັບ ສະຫາຍ ດິ່ງ ຕຽນ ຢູງ, ກໍາມະການກົມການເມືອງສູນກາງພັກ, ເລຂາຄະນະພັກນະຄອນຫຼວງຮ່າໂນ້ຍ ແລະ ຕີລາຄາສູງຕໍ່ການທີ່ສະຫາຍເລືອກມາຢ້ຽມຢາມ ສປປ ລາວ ເປັນປະເທດທໍາອິດ ພາຍຫຼັງທີ່ໄດ້ຮັບເລືອກຕັ້ງເປັນ ເລຂາຄະນະພັກ ນະ ຄອນຫຼວງຮ່າໂນ້ຍ, ເຊິ່ງເປັນການສະແດງໃຫ້ເຫັນເຖິງຄວາມເອົາໃຈໃສເປັນພິເສດ ແລະ ການໃຫ້ຄວາມສໍາຄັນຂອງ ພັກ, ລັດ ຫວຽດນາມ ກໍ່ຄື ນະຄອນຫຼວງຮ່າໂນ້ຍ ທີ່ມີຕໍ່ພັກ, ລັດ ແລະ ປະຊາຊົນລາວບັນດາເຜົ່າ ແລະ ໄດ້ນໍາເອົາໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງອັນສະໜິດສະໜົມຂອງ ພັກ, ລັດ ແລະ ປະຊາຊົນຫວຽດນາມ ອ້າຍນ້ອງ ເວົ້າລວມ, ເວົ້າສະເພາະແມ່ນຂອງ ຄະນະພັກ, ອໍານາດການປົກຄອງ ແລະ ປະຊາຊົນນະຄອນຫຼວງຮ່າໂນ້ຍ ມາຍັງ ພັກ, ລັດ ແລະ ປະຊາຊົນລາວ ເວົ້າລວມ, ເວົ້າສະເພາະ ນະ ຄອນຫຼວງວຽງຈັນ, ສິ່ງດັ່ງກ່າວເປັນການໃຫ້ກໍາລັງໃຈແກ່ ພັກ, ລັດ ແລະ ປະຊາຊົນລາວ ບັນດາເຜົ່າ ໃນການແກ້ໄຂສະພາບຄວາມຫຍຸ້ງຍາກທີ່ ສປປ ລາວ ກໍາລັງປະເຊີນໜ້າໃນປະຈຸບັນ, ທັງເປັນການປະກອບສ່ວນເຂົ້າໃນບັນຍາກາດແຫ່ງການ ສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ໃນປີນີ້. ສະຫາຍເລຂາທິ ການໃຫຍ່, ປະທານປະເທດ ທອງລຸນ ສີສຸລິດ ຍັງໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ບັນດາຜົນສໍາເລັດໃນດ້ານຕ່າງໆ ທີ່ ຄະນະພັກ, ອໍານາດການປົກຄອງ ແລະ ປະຊາຊົນນະຄອນຫຼວງຮ່າໂນ້ຍ ຍາດມາໄດ້ຕະຫຼອດໄລຍະທີ່ຜ່ານມາ; ໂດຍສະເພາະຜົນສໍາເລັດຂອງການຮ່ວມມືສອງຝ່າຍ ກໍ່ຄື ຜົນສໍາເລັດຂອງການພົບປະ ລະຫວ່າງ ຄະນະພັກ ຂອງສອງນະຄອນຫຼວງ,  ເຊິ່ງສອງຝ່າຍຕ່າງກໍ່ໄດ້ຢືນຢັນ ທີ່ຈະພ້ອມກັນ ສືບຕໍ່ເສີມຂະຫຍາຍ ແລະ ປົກປັກຮັກສາສາຍພົວພັນພິເສດທີ່ຫາຍາກ ລະຫວ່າງສອງປະເທດ ລາວ-ຫວຽດນາມ, ໂດຍສະເພາະແມ່ນ ການຍູ້ແຮງການພົວພັນຮ່ວມມືສອງຝ່າຍໃນດ້ານ ການເມືອງ, ການປົກຄອງ, ການຕ່າງປະເທດ, ປ້ອງກັນຊາດ-ປ້ອງກັນຄວາມສະຫງົບ, ເສດຖະກິດ-ການຄ້າ, ການລົງທຶນ, ພັດທະນາພື້ນຖານໂຄງລ່າງ, ຊັບ ພະຍາກອນມະນຸດ, ວັດທະນະທໍາ-ສັງຄົມ ແລະ ອື່ນໆ, ເຊິ່ງຈະເປັນການປະກອບສ່ວນສໍາຄັນ ເຮັດໃຫ້ຂໍ້ຕົກ ລົງລະຫວ່າງການນໍາຂັ້ນສູງຂອງສອງພັກ ກໍ່ຄື ສອງລັດຖະບານ ລາວ-ຫວຽດນາມ ໄດ້ຮັບການ ຈັດຕັ້ງຜັນຂະ ຫຍາຍ ໃຫ້ນັບມື້ເຂົ້າສູ່ລວງເລິກ, ແທດຕົວຈິງ, ມີປະສິດທິຜົນສູງ ແລະ ນໍາເອົາຜົນປະໂຫຍດທີ່ ແທ້ຈິງມາສູ່ປະຊາຊົນສອງປະເທດ; ຕາງໜ້າໃຫ້ແກ່ ພັກ, ລັດ ແລະ ປະຊາຊົນລາວ ບັນດາເຜົາ ສະແດງຄວາມຂອບອົກຂອບໃຈ ແລະ ຮູ້ບຸນຄຸນເປັນຢ່າງສູງຕໍ່ ພັກ, ລັດ ແລະ ປະຊາຊົນຫວຽດນາມອ້າຍນ້ອງ, ໂດຍສະເພາະ ປະຊາ ຊົນນະຄອນຫຼວງຮ່າໂນ້ຍ ທີ່ໄດ້ໃຫ້ການສະໜັບສະໜູນ, ຊ່ວຍເຫຼືອອັນໃຫຍ່ຫຼວງ, ລໍ້າຄ່າ, ທັນການ ແລະ ມີປະສິດທິຜົນ ໃຫ້ແກ່ ພັກ, ລັດ ແລະ ປະຊາຊົນລາວບັນດາເຜົ່າ ຕະ ຫຼອດໄລຍະແຫ່ງການຕໍ່ສູ້ປົດປ່ອຍປະເທດຊາດໃນເມື່ອກ່ອນ, ກໍ່ຄືໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດໃນປະຈຸບັນ; ເຊື່ອໝັ້ນວ່າ, ພາຍໃຕ້ການນໍາພາອັນສະຫຼາດສ່ອງໃສ, ຖືກຕ້ອງ ແລະ ມີຫົວຄິດປະດິດສ້າງຂອງ ພັກກອມມູນິດຫວຽດນາມ ໂດຍມີ ສະຫາຍເລຂາທິການໃຫຍ່ ຫງວຽນຟູຈ້ອງ ເປັນຜູ້ນໍາໜ້ານັ້ນ, ປະຊາຊົນຫວຽດນາມ ອ້າຍນ້ອງ ກໍ່ຄື ຄະນະພັກ, ອໍານາດການປົກຄອງ ແລະ ປະຊາຊົນນະຄອນຫຼວງຮ່າໂນ້ຍ  ຈະສາມາດຍາດໄດ້ຜົນສໍາເລັດອັນສໍາຄັນ ແລະ ໃຫຍ່ຫຼວງກວ່າເກົ່າ ໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ແລະ ມະຕິກອງປະຊຸມໃຫຍ່ ອົງຄະນະພັກ  ຄັ້ງທີ XVII ຂອງນະຄອນ ຫຼວງຮ່າໂນ້ຍ ໄດ້ຢ່າງມີໄຊ, ປະກອບສ່ວນອັນສໍາຄັນເຂົ້າໃນຜົນສໍາເລັດລວມຂອງ ສສ ຫວຽດນາມ ໃນການຫັນປະເທດໃຫ້ເປັນປະເທດອຸດສາຫະກຳ ຕາມທິດທັນສະໄໝ ແລະ ບັນລຸເປົ້າໝາຍເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ປະ ຊາທິປະໄຕ, ຍຸຕິທຳ ແລະ ສີວິໄລ.

       ໃນໂອກາດດັ່ງກ່າວ, ສະຫາຍ ສະ​ຫາຍ ດິ່ງ ຕຽນ ຢູງ, ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ເລ​ຂາ​ຄະ​ນະ​ພັກ​ນະ​ຄອນຫຼ​ວງ​ຮ່າ​ໂນ້ຍ ໄດ້ກ່າວສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ສະໜິດສະໜົມ ຖານມິດສະຫາຍອ້າຍນ້ອງ ຈາກສະຫາຍເລຂາທິການໃຫຍ່, ປະທານປະເທດແຫ່ງ ສປປ ລາວ ແລະ ບັນດາການນໍາຂັ້ນສູງຂອງ ພັກ, ລັດລາວ; ພ້ອມທັງໄດ້ແຈ້ງໃຫ້ຊາບ ບາງສະພາບການພົ້ນເດັ່ນທາງດ້ານການເມືອງ, ການພັດທະນາ ເສດຖະກິດ-ສັງຄົມ, ການຮັບມືກັບພະຍາດ ໂຄວິດ-19 ຢູ່ ຫວຽດນາມ ກໍ່ຄືຢູ່ ນະຄອນຫຼວງຮ່າໂນ້ຍ, ຕີລາຄາສູງການພົວພັນຮ່ວມມືລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ກໍ່ຄືນະຄອນຫຼວງວຽງຈັນ ກັບນະຄອນຫຼວງຮ່າໂນ້ຍ ໃນຜ່ານມາ ແລະ ປະຈຸບັນ, ຊົມເຊີຍບັນດາຜົນສໍາເລັດໃນດ້ານຕ່າງໆ ທີ່ ພັກ, ລັດ ແລະ ປະຊາຊົນລາວ ກໍ່ຄື ນະຄອນຫຼວງວຽງຈັນ ຍາດມາໄດ້ໃນການສ້າງສາ, ພັດທະນາ ເສດຖະກິດ-ສັງຄົມ, ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ, ແຜນພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 9, ການຮັບມືກັບການແຜ່ລະບາດຂອງພະຍາດ ໂຄວິດ-19, ພ້ອມທັງໄດ້ລາຍງານໂດຍຫຍໍ້ຜົນຂອງການເຄື່ອນໄຫວຢ້ຽມາມ ແລະ ການພົບປະສອງຝ່າຍ ລະຫວ່າງ ຄະນະພັກນະຄອນຫຼວງຮ່າໂນ້ຍ ແລະ ຄະນະພັກນະຄອນຫຼວງວຽງຈັນ, ເຊິ່ງສອງຝ່າຍໄດ້ຮ່ວມກັນ ​ ຕີ​ລາ​ຄາ​ຜົນ​ຂອງ​ການ​ຮ່ວມ​ມື​ໃນ​ໄລ​ຍະ​ຜ່ານ​ມາ, ປຶກ​ສາ​ຫາ​ລື​ທິດ​ທາງ​ແຜນ​ການ​ຮ່ວມ​ມື​ໃນ​ຕໍ່​ໜ້າ ແລະ ຮ່ວມ​ກັນ​ຈັດ​ກິດ​ຈະ​ກຳ​ເຄື່ອນ​ໄຫວ ເພື່ອ​ສະ​ເຫຼີມ​ສະຫຼອງປີ​ສາ​ມັກ​ຄີ​ມິດ​ຕະ​ພາບ ລາວ-ຫວຽດ​ນາມ ໃນ​ປີນີ້.

---