ຄະນະພົວພັນຕ່າງປະເທດສູນກາງພັກ ຈັດກອງປະຊຸມສະຫຼຸບວຽກງານການເຄື່ອນໄຫວ ຕ່າງປະເທດ ຂອງບັນດາອົງການຈັດຕັ້ງຂອງພັກ ແລະ ມະຫາຊົນຂັ້ນສູນກາງ ປະຈຳປີ 2021

ເຜີຍ​ແຜ່​ໂດຍ​: editor ເວ​ລາ: 14/07/2022 15:37:11 ຈຳ​ນວນ​​ຢ້ຽມ​ຊົມ 382 ຄັ້ງ ​

       ໃນຕອນເຊົ້າ ວັນທີ 17 ມີນາ 2022, ຄະນະພົວພັນຕ່າງປະເທດສູນກາງພັກ (ຄ​ຕ​ພ) ໄດ້ຈັດກອງປະຊຸມຜ່ານລະບົບວີດີໂອທາງໄກ ເພື່ອສະຫຼຸບຖອດຖອນບົດຮຽນການເຄື່ອນໄຫວວຽກງານຕ່າງປະເທດ ຂອງບັນດາອົງການພັກຂັ້ນສູນກາງ, ສູນ​ກາງ​ແນວ​ລາວ​ສ້າງ​ຊາດ, ສະຫະພັນນັກຮົບເກົ່າແຫ່ງຊາດລາວ, ​ບັນ​ດາອົງການຈັດຕັ້ງມະຫາຊົນຂັ້ນສູນກາງ, ຄະນະສັນຕິພາບ ແລະ ສາມັກຄີຂອງລາວ ແລະ ບັນດາສະມາຄົມມິດຕະພາບຂອງລາວກັບຕ່າງປະເທດ ປະຈຳປີ 2021 ແລະ ວາງທິດທາງແຜນການໃນທ້າຍປີ 2022 ໂດຍການເປັນປະທານຂອງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລ​ຂາ​ຄະ​ນະ​ພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ບັນດາຄະນະນໍາ, ຄະນະກົມ ແລະ ພະນັກງານທີ່ກ່ຽວຂ້ອງຈາກ ອົງການຈັດຕັ້ງຕ່າງໆ ເຂົ້າຮ່ວມຈຳນວນ 41 ສະຫາຍ.

       ໃນກອງປະຊຸມ ສະຫາຍ ສົມພອນ ສີຈະເລີນ, ຮອງເລຂາຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ຂຶ້ນຜ່ານ ບົດສະຫຼຸບສັງລວມກ່ຽວກັບການເຄື່ອນໄຫວວຽກງານການຕ່າງປະເທດຂອງພັກ ແລະ ການທູດປະຊາຊົນ ໃນໄລຍະປີ 2021, ທ່າມກາງສະພາບການຢູ່ພາກພື້ນ ແລະ ສາກົນ ຍັງສຶບຕໍ່ມີການປ່ຽນແປງຢ່າງໄວວາ ແລະ ສັບສົນ. ພ້ອ​ມ​ທັງເປັນໄລຍະທົ່ວໂລກກຳລັງປະເຊີນກັບການແຜ່ລະບາດຂອງເຊື້ອພະຍາດໂຄວິດ-19 ຂະຫຍາຍເປັນວົງກວ້າງ;  ຍົກໃຫ້ເຫັນດ້ານດີ, ດ້ານຄົງຄ້າງ, ບົດຮຽນທີ່ຖອດຖອນໄດ້ໃນໄລຍະຜ່ານມາ ແລະ ສະເໜີທິດທາງແຜນການເຄື່ອນໄຫວຕ່າງປະເທດ ປະ​ຈຳ​ປີ 2022 ຂອງ ບັນດາອົງການຈັດຕັ້ງດັ່ງກ່າວ. ຫຼັງຈາກນັ້ນ, ບັນດາຜູ້ແທນເຂົ້າຮ່ວມກອງປະຊຸມໄດ້ແລກປ່ຽນຄວາມຄິດເຫັນຢ່າງ​ກົງ​ໄປ​ກົງ​ມາກ່ຽວກັບ ການຈັດຕັ້ງປະຕິ ບັດການເຄື່ອນໄຫວວຽກງານການຕ່າງປະເທດ ຂອງ ພັກ, ໂດຍເນັ້ນເຖິງຄວ​າມສໍາຄັນ ແລະ ຈໍາເປັນໃນການເພີ່ມທະວີການເປັນເສນາທິການໃຫ້ແກ່ສູນກາງພັກ ໃນການເຄື່ອນໄຫວວຽກງານຕ່າງປະເທດ ຕາມມະຕິກອງປະຊຸມໃຫຍ່ ສະໄໝ XI ຂອງພັກ ວາງອອກ; ປຶກສາຫາລືກ່ຽວກັບການ ຈັດຕັ້ງປະຕິບັດແຜນງົບປະມານການເຄື່ອນໄຫວວຽກງານຕ່າງປະເທດ  ໃຫ້ມີປະສິດທິຜົນ ດ້ວຍຮູບການຈັດກອງປະຊຸມຜ່ານລະບົບວີດີໂອທາງໄກຕາມຄວາມເໝາະສົມ ທັງເປັນການປະຢັດງົບປະມານແຕ່ຍັງສືບ​ຕໍ່ຮັກສາການເຄື່ອນໄຫວຕ່າງປະເທດຂອງພັກ ກໍ່ຄືການທູດປະຊາຊົນ ຜ່ານຫຼາຍຮູບແບບ.

       ໃນກອງປະຊຸມຄັ້ງນີ້, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລ​ຂາ​ຄະ​ນະ​ພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ໂອ້ລົມຕໍ່ກອງປະຊຸມ ໂດຍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນງານ, ຜົນສໍາເລັດຂອງການເຄື່ອນໄຫວການຕ່າງປະເທດຂອງ ພັກ ແລະ ການທູດປະຊາຊົນ ທີ່ຍາດມາໄດ້ໃນໄລຍະຜ່ານມາກໍ່ຄືທິດທາງແຜນການເຄື່ອນໄຫວຕ່າງ ປະເທດໃນຕໍ່ໜ້າ, ໂດຍເນັ້ນເຖິງຄວາມຈໍາເປັນໃນການເປີດກວ້າງການພົວພັນກັບຕ່າງປະເທດ, ຍາດແຍ່ງຂົນຂວາຍການຮ່ວມມື, ການສະໜັບສະໜູນ ແລະ ຊ່ວຍເຫຼືອ ສປປ ລາວ. ພ້ອມທັງເປັນການໂຄສະນາແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ ໂດຍສະເພາະແມ່ນຜັນຂະຫຍາຍເນື້ອໃນມະຕິຂອງ ກອງປະຊຸມໃຫຍ່ສະໄໝ XI ຂອງ ພັກ ເພື່ອປະກອບສ່ວນເຂົ້າໃນການສ້າງສະພາບແວດລ້ອມສາກົນທີ່ອໍານວຍແກ່ການປົກປັກຮັກສາ ແລະ ສ້າງສາພັດທະນາປະເທດຊາດ, ສືບຕໍ່ຍົກສູງຖານະບົດບາດຂອງພັກ, ລັດເຮົາໃນເວທີພາກພື້ນ ແລະ ສາກົນ.

---