ຄະນະພົວພັນຕ່າງປະເທດສູນກາງພັກ

ພິທີມອບ - ຮັບໜ້າທີ່ ຄະນະບໍລິຫານງານ ຂອງ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບລາວ-ເບລາຣຸດ ລະຫວ່າງ ຊຸດເກົ່າ ແລະ ຊຸດໃໝ່.

ເຜີຍແຜ່ໂດຍ: editor ເວລາ: 14/07/2022 15:22:47 ຈຳນວນຢ້ຽມຊົມ 548 ຄັ້ງ

ໃນວັນທີ 07 ມີນາ 2022, ຢູ່ສຳນັກງານຄະນະພົວພັນຕ່າງປະເທດສູນກາງພັກ ໄດ້ມີພິທີມອບ - ຮັບໜ້າທີ່ ຄະນະບໍລິຫານງານ ຂອງ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບລາວ-ເບລາຣຸດ ລະຫວ່າງ ຊຸດເກົ່າ ແລະ ຊຸດໃໝ່ ໂດຍການໃຫ້ກຽດເຂົ້າຮ່ວມ ເປັນປະທານ ຂອງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກຫົວໜ້າຄະນະພົວພັນຕ່າງປະເທດສູນກາງພັກ. ນອກນັ້ນ, ຍັງມີບັນດາສະຫາຍປະທານ, ຮອງປະທານ, ເລຂາທິການ ແລະ ກຳມະການ ຂອງ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸດ ຊຸດເກົ່າ ແລະ ຊຸດໃໝ່ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.

ໃນພິທີດັ່ງກ່າວ, ສະຫາຍ ດວງຕາ ຈູມພາວັນ, ຫົວໜ້າກົມຄຸ້ມຄອງ-ພະນັກງານ, ຕາງໜ້າຄະນະຈັດຕັ້ງສູນກາງພັກ ໄດ້ຜ່ານມະຕິຕົກລົງ ຂອງ ຄະນະເລຂາທິການສູນກາງພັກ ວ່າດ້ວຍການແຕ່ງຄະນະບໍລິຫານງານ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸດ.

ພາຍຫຼັງຜ່ານມະຕິຕົກລົງ ຂອງ ຄະນະເລຂາທິການສູນກາງພັກ ກໍໄດ້ມີພິທີເຊັນບົດບັນທຶກ ມອບ-ຮັບ ໜ້າທີ່ ລະຫວ່າງ ປະທານຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸດ ຜູ້ເກົ່າ ແລະ ຜູ້ໃໝ່ ລະຫວ່າງ ສະຫາຍ ສົມພັນ ແພງຄຳມີ, ອະດີດກຳມະການສູນກາງພັກ, ອະດີດຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີຂອງລາວ ຜູ້ເກົ່າ ແລະ ສະຫາຍ ສົມມາດ ພົລເສນາ, ກຳມະການສູນກາງພັກ, ຮອງປະທານສະພາແຫ່ງຊາດ, ປະທານຄະນະສັນຕິພາບ ແລະ ສາມັກຄີຂອງລາວ ຜູ້ໃໝ່; ສະຫາຍ ບຸນໂຈມ ອຸບົນປະເສີດ, ກຳມະການສູນກາງພັກ, ລັດຖະມົນຕີກະຊວງການເງິນ, ປະທານສະມາຄົມມິດຕະພາບ ລາວ-ເບລາຣຸດ ຜູ້ເກົ່າ ແລະ ສະຫາຍ ນາງ ທຳມາ ເພັດວິໄຊ, ຮອງປະທານສູນກາງສະຫະພັນແມ່ຍິງລາວ, ປະທານສະມາຄົມມິດຕະພາບ ລາວ-ເບລາຣຸດ ຜູ້ໃໝ່ ໂດຍການເປັນສັກຂີພະຍານ ຂອງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ແລະ ພາກສ່ວນກ່ຽວຂ້ອງ.

ໃນຕອນທ້າຍ, ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ ກໍ່ໄດ້ມີຄຳເຫັນໂອ້ລົມຕໍ່ພິທີດັ່ງກ່າວ, ເຊິ່ງໄດ້ຍ້ອງຍໍ-ຊົມເຊີຍ ສະຫາຍ ປະທານ ແລະ ຄະນະບໍລິຫານງານ ຂອງ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸດ ຊຸດເກົ່າ ທີ່ໄດ້ປະກອບສ່ວນສຸມສະຕິປັນຍາ, ເຫື່ອແຮງ ຊີ້ນຳໆພາການເຄື່ອນໄຫວວຽກງານການທູດປະຊາຊົນ ໄປຄຽງຄູ່ກັບການພົວພັນຕ່າງປະເທດດ້ານພັກ ແລະ ການທູດສາຍລັດ ໂດຍສະເພາະການສ້າງກິດຈະກຳຕ່າງໆ ເພື່ອສົ່ງເສີມສາຍພົວພັນມິດຕະພາບ ແລະ ການຮ່ວມມື ໃນຂົງເຂດດ້ານການສຶກສາ-ກິລາ, ສາທາລະນະສຸກ, ວັດທະນະທຳ-ສັງຄົມ, ການທ່ອງທ່ຽວ, ເສດຖະກິດ-ການຄ້າ, ການລົງທຶນ, ວິທະຍາສາດ-ເຕັກນິກ, ດ້ານມະນຸດສະທຳ, ດ້ານການກຸສົນ ແລະ ໄດ້ຂົນຂວາຍເອົາການຊ່ວຍເຫຼືອຈາກອົງການຈັດຕັ້ງຂອງປະເທດເພື່ອນມິດຈຳນວນຫຼວງຫຼາຍມາຊ່ວຍ ສປປ ລາວ. ພ້ອມນັ້ນ ຍັງໄດ້ມີຄຳເຫັນຊີ້ນຳໃຫ້ປະທານ ແລະ ຄະນະບໍລິຫານງານ ຂອງ ຄະນະສັນຕິພາບ ແລະ ສາມັກຄີຂອງລາວ ແລະ ສະມາຄົມມິດຕະພາບ ລາວ-ເບລາຣຸດ ຊຸດໃໝ່, ສືບຕໍ່ປະຕິບັດໜັາທີ່ຕາມພາລະບົດບາດ, ຂອບເຂດສິດ ແລະ ໜ້າທີ່ ທີ່ພັກ-ລັດ ມອບໝາຍ ໂດຍສະເພາະແມ່ນການໂຄສະນາເຜີຍແຜ່ແນວທາງນະໂຍບາຍຂອງ ສປປ ລາວ ຕໍ່ຕ່າງປະເທດ, ສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ກໍ່ຄືການໄປມາຫາສູ່ ລະຫວ່າງ ປະຊາຊົນລາວ ແລະ ຕ່າງປະເທດໃຫ້ຫຼາຍຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນ ກໍ່ຄືປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາ ສປປ ລາວ.