ພັກກອມມູນິດຈີນ ແຈ້ງຜົນສໍາເລັດຂອງ ກອງປະຊຸມຄົບຄະນະກໍາມະການສູນກາງພັກກອມມູນິດຈີນ ເທື່ອທີ 6 ສະໄໝທີ XIX ຕໍ່ສູນກາງພັກ ປປ ລາວ

ເຜີຍ​ແຜ່​ໂດຍ​: admin ເວ​ລາ: 24/05/2022 16:01:26 ຈຳ​ນວນ​​ຢ້ຽມ​ຊົມ 554 ຄັ້ງ ​

ໂດຍອີງຕາມແຜນການຮ່ວມມືລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ ປະຈໍາປີ 2021, ໃນວັນທີ 25 ພະຈິກ 2021 ນີ້, ຕາງໜ້າສູນກາງພັກກອມມູນິດຈີນ ໂດຍແມ່ນ ສະຫາຍ ຊົ້ງທາວ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ໄດ້ຈັດກອງປະຊຸມທາງໄກແຈ້ງເນື້ອໃນຕົ້ນຕໍຂອງກອງປະຊຸມຄົບຄະນະ ຄັ້ງທີ 6 ສະໄໝທີ XIX ຂອງຄະນະກໍາມະການສູນກາງພັກກອມມູນິດຈີນ ໃຫ້ ສູນກາງພັກ ປປ ລາວ ຊາບ ໂດຍມີ ສະຫາຍ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ໃຫ້ກຽດເຂົ້າຮ່ວມຮັບຟັງ, ພ້ອມດ້ວຍການນໍາຂັ້ນສູງຂອງພັກ, ລັດລາວ ຈາກອົງການ-ພາກສ່ວນກ່ຽວຂ້ອງ ເຂົ້າຮ່ວມ.

   ໃນກອງປະຊຸມ, ສະຫາຍ ຊົ້ງທາວ ໄດ້ແຈ້ງໃຫ້ຝ່າຍລາວຮັບຊາບ ກ່ຽວກັບເນື້ອໃນຕົ້ນຕໍຂອງກອງປະຊຸມຄົບຄະນະ ຄັ້ງທີ 6 ສະໄໝທີ XIX ຂອງຄະນະກໍາມະການສູນກາງພັກກອມມູນິດຈີນ ທີ່ຈັດຂຶ້ນແຕ່ວັນທີ 8-11 ພະຈິກ 2021 ຜ່ານມາ, ເຊິ່ງກອງປະຊຸມ ໄດ້ຮັບຮອງເອົາ “ມະຕິຕົກລົງ ຂອງ ສູນກາງພັກກອມມູນິດຈີນ ກ່ຽວກັບ ຜົນງານອັນໃຫຍ່ຫຼວງ ແລະ ບົດຮຽນປະຫວັດສາດຈາກການບຸກບືນສູ້ຊົນຂອງພັກໃນໄລຍະ 100 ປີຜ່ານມາ”, ໂດຍໄດ້ຍົກໃຫ້ເຫັນຜົນສໍາເລັດ ແລະ ປະສົບການທາງປະຫວັດສາດອັນຍິ່ງໃຫຍ່ຂອງພັກກອມມູນິດຈີນ ໃນໄລຍະການສູ້ຊົນຜ່ານຜ່າ ຕະຫຼອດໄລຍະ 100 ປີ ຜ່ານມາ, ທັງໄດ້ຍົກໃຫ້ເຫັນເຖິງຈຸດພິເສດຂອງສັງຄົມນິຍົມທີ່ມີສີສັນພິເສດຂອງຈີນໃນຍຸກສະໄໝໃໝ່. ພ້ອມນັັ້ນ, ກອງປະຊຸມຍັງໄດ້ເອກະພາບຮັບຮອງເອົາ “ມະຕິຕົກລົງ ກ່ຽວກັບ ການໄຂກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ” ໃນທ້າຍປີ 2022 ທີ່ຈະມາເຖິງ.

   ສະຫາຍ ຊົ້ງທາວ ກ່າວວ່າ ໃນໄລຍະ 100 ປີ ຜ່ານມາ, ຊາວພັກກອມມູນິດຈີນ ແລະ ປະຊາຊົນຈີນ ໄດ້ສືບຕໍ່ສູ້ຊົນຜ່ານຜ່າ, ເຮັດໃຫ້ປະຊາຊາດຈີນ ໄດ້ເລີ່ມຕົ້ນຈາກການລຸກຂຶ້ນ, ເຕີບໃຫຍ່ ແລະ ເຂັ້ມແຂງຂຶ້ນມາ ດ້ວຍບາດກ້າວກະໂດດ, ໂດຍສະເພາະ ນັບແຕ່ກອງປະຊຸມໃຫຍ່ ຄັ້ງທີ XVIII ຂອງພັກກອມມູນິດຈີນເປັນຕົ້ນມາ, ສູນກາງພັກກອມມູນິດຈີນ ທີ່ມີ ສະຫາຍ ສີຈິ້ນຜິງ ເປັນແກນກາງ ໄດ້ເຕົ້າໂຮມຄວາມສາມັກຄີເປັນປຶກແຜ່ນ ນໍາພາປະຊາຊົນຈີນບຸກເບີກເປີດສັກກະລາດໃໝ່ ແຫ່ງການກໍ່ສ້າງສັງຄົມນິຍົມທີ່ມີສີສັນພິເສດຂອງຈີນ ໃນຍຸກສະໄໝໃໝ່, ສ້າງສໍາເລັດສັງຄົມອິ່ມໜໍາສໍາລານຮອບດ້ານ ແລະ ເປີດຂະບວນການໃໝ່ແຫ່ງການສ້າງເປັນປະເທດສັງຄົມນິຍົມທີ່ທັນສະໄໝຢ່າງຮອບດ້ານ. ພາລະກິດຂອງພັກ ແລະ ຂອງປະເທດຊາດຈີນ ໄດ້ມີຜົນສໍາເລັດທີ່ເປັນລັກສະນະປະຫວັດສາດ, ມີການປ່ຽນແປງທີ່ມີລັກສະນະປະຫວັດສາດ, ອັນພື້ນຖານທີ່ສຸດກໍ່ແມ່ນຍ້ອນມີ ສະຫາຍ ສີ ຈິ້້ນຜິງ ເປັນແກນກາງຂອງພັກ ໃນການນໍາພາຊີ້ນໍາຂອງສູນກາງພັກ, ຍ້ອນມີ ແນວຄິດສີຈິ້ນຜິງ ວ່າດ້ວຍ ການສັງຄົມນິຍົມທີ່ມີສີສັນພິເສດຂອງຈີນໃນຍຸກສະໄໝໃໝ່ ເປັນເຂັມທິດຊີ້ນໍາ. ພຶດຕິກໍາຕົວຈິງຢັ້ງຢືນວ່າ ພັກກອມມູນິດຈີນ ໄດ້ກໍານົດເອົາ ສະຫາຍ ສີຈິ້ນຜິງ ເປັນແກນກາງສູນກາງພັກ, ເປັນແກນນໍາຂອງທົ່ວພັກ, ໄດ້ກໍານົດຖານະບົດບາດຊີ້ນໍາ ຂອງ ແນວຄິດສີຈິ້ນຜິງ ວ່າດ້ວຍສັງຄົມນິຍົມທີ່ມີີສີສັນພິເສດຂອງຈີນໃນຍຸກສະໄໝໃໝ່, ໄດ້ສ່ອງແສງໃຫ້ເຫັນເຖິງຄວາມມຸ່ງມາດປາດຖະໜາຮ່ວມກັນຂອງທົ່ວພັກ, ທົ່ວກອງທັບ ແລະ ປະຊາຊົນທົ່ວທັງຊາດ, ເຊິ່ງມີຄວາມໝາຍສໍາຄັນພິເສດທີ່ເປັນການຕັດສິນຕໍ່ການພັດທະນາພາລະກິດຂອງພັກ ແລະ ປະເທດຊາດໃນຍຸກສະໄໝໃໝ່ ແລະ ການຊຸກຍູ້ຂະບວນການຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນ.

   ສະຫາຍ ບຸນທອງ ຈິດມະນີ, ກໍາມະການກົມການເມືອງສູນກາງພັກ, ຜູ້ປະຈໍາການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປ ລາວ ໄດ້ຕາງໜ້າໃຫ້ແກ່ ສູນກາງພັກ ປປ ລາວ ສະແດງຄວາມຊົມເຊິຍ ແລະ ຕີລາຄາສູງຕໍ່ຜົນສໍາເລັດຂອງກອງປະຊຸມຄົບຄະນະ ຄັ້ງທີ 6 ສະໄໝທີ XIX ຂອງສູນກາງພັກກອມມູນິດຈີນ ວ່າ, ກອງປະຊຸມຄົບຄະນະຄັ້ງນີ້ ໄດ້ໄຂຂຶ້ນໃນໄລຍະທີ່ມີຄວາມໝາຍສໍາຄັນທາງປະຫວັດສາດຂອງພັກກອມມູນິດຈີນ ກໍຄື ໃນໂອກາດຄົບຮອບ 100 ປີ ຂອງ ການສ້າງຕັ້ງພັກກອມມູນິດຈີນ. ກອງປະຊຸມຄົບຄະນະໃນຄັ້ງນີ້ ໄດ້ມີການກຳນົດ 2 ປະການ ຄື: ໜຶ່ງ, ໄດ້ກໍານົດເອົາ ສະຫາຍ ສີຈິ້ິນຜິງ ເປັນແກນກາງຂອງສູນກາງພັກ ແລະມີບົດບາດເປັນແກນກາງຂອງທົ່ວພັກ; ສອງ, ໄດ້ກໍານົດເອົາ ແນວຄິດ ສີຈິ້້ນຜິງ ວ່າດ້ວຍສັງຄົມນິຍົມທີ່ມີສີສັນພິເສດຂອງຈີນໃນຍຸກສະໄໝໃໝ່ ເປັນທິດຊີ້ນໍາຂອງທົ່ວພັກ ແລະທົ່ວທັງຊາດ, ເຊິ່ງເຫັນວ່າສອດຄ່ອງກັບຄວາມມຸ້ງມາດປາດຖະໜາຂອງທົ່ວພັກ ແລະປວງຊົນຈີນທົ່ວທັງຊາດ, ອັນຈະເປັນພື້ນຖານທີ່ໜັກແໜ້ນ, ເປັນເຂັມຊີ້ທິດເຍືອງທາງ ໃນການພັດທະນາຂອງປະເທດຊາດ ແລະຂອງຍຸກສະໄໝໃໝ່ ເພື່ອການສ້າງຄວາມຜາສຸກໃຫ້ແກ່ປະຊາຊົນຈີນ ຕາມເສັ້ນທາງສັງຄົມນິຍົມທີ່ມີສີສັນພິເສດຂອງຕົນ, ທັງຈະເປັນການປະກອບສ່ວນສໍາຄັນເຂົ້າໃນການເສີມຂະຫຍາຍສັນຕິພາບ, ມິດຕະພາບ, ການຮ່ວມມື ແລະ ການພັດທະນາຂອງພາກພື້ນ ແລະ ໃນໂລກ.ນອກນັ້ນ, ກອງປະຊຸມຍັງຮັບຮອງເອົາ “ມະຕິຕົກລົງ ກ່ຽວກັບ ການໄຂກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ” ກໍ່ເປັນອີກນິມິດໝາຍສໍາຄັນໜຶ່ງໃນການສືບທອດ ແລະ ເສີມຂະຫຍາຍພາລະກິດສັງຄົມນິຍົມ, ເຊິ່ງຈະໄຂຂຶ້ນໃນໄລຍະປະຫວັດສາດສໍາຄັນຂອງການປະຕິຮູບ ແລະ ພັດທະນາປະເທດຊາດໃນເງື່ອນໄຂສະພາບການໃໝ່. ເຊື່ອໝັ້ນວ່າ ພາຍໃຕ້ການນໍາພາທີ່ເຂັ້ມແຂງຂອງສູນກາງພັກກອມມູນິດຈີນ ທີ່ຖື ສະຫາຍ ສີຈິ້ນຜິງ ເປັນແກນກາງ ແລະພາຍໃຕ້ເຂັມທິດຊີ້ນໍາ ຂອງແນວຄິດສີຈິ້ນຜິງ ວ່າດ້ວຍ ສັງຄົມນິຍົມທີ່ມີສີສັນພິເສດຂອງຈີນໃນຍຸກສະໄໝໃໝ່ ແນ່ ນອນວ່າກອງປະຊຸມໃຫຍ່ຄັ້ງທີ XX ຂອງ ພັກກອມມູນິດຈີນ ຈະມີຜົນສໍາເລັດໃໝ່ ຫຍິ່ງໃຫຍ່ກວ່າເກົ່າ. ພ້ອມດຽວກັນນັ້ນ, ສະຫາຍ ບຸນທອງ ຈິດມະນີ ຍັງໄດ້ແຈ້ງຜົນສໍາເລັດ ຂອງ ກອງປະຊຸມຄົບຄະນະກໍາມະການສູນກາງພັກ ປປ ລາວ ຄັ້ງທີ 3 ສະໄໝທີ XI ໃນເດືອນຕຸລາ 2021 ຜ່ານມາ ໃຫ້ຝ່າຍຈີນຮັບຊາບ.

   ໃນໂອກາດດັ່ງກ່າວ, ສອງຝ່າຍໄດ້ຕີລາຄາສູງຕໍ່ ການພົວພັນຮ່ວມມືແບບຄູ່ຮ່ວມຍຸດທະສາດ ຮອບດ້ານ, ຫມັ້ນຄົງ, ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊະຕາກໍາ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ, ຈີນ-ລາວ. ເຖິງວ່າສະພາບການພາກພື້ນ ແລະ ສາກົນ ມີການປ່ຽນແປງຢ່າງສະຫຼັບຊັບຊ້ອນ, ການແຜ່ລະບາດຂອງພະຍາດໂຄວິດ-19 ສົ່ງຜົນກະທົບໂດຍກົງຕໍ່ການໄປມາຫາສູ່ ແລະ ພົບປະກັນແບບເຊິ່ງໜ້າກໍ່ຕາມ, ແຕ່ການພົວພັນຮ່ວມມືສອງຝ່າຍພວກເຮົາ ຍັງສືບຕໍ່ໄດ້ຮັບການເສີມຂະຫຍາຍສູງຂຶ້ນເລື້ອຍໆ, ບັນດາທິດທາງການຮ່ວມມືທີ່ການນໍາຂັ້ນສູງສອງຝ່າຍ ໄດ້ເຫັນດີເປັນເອກະພາບກັນຜ່ານມານັ້ນ ກໍ່ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ມີ  ໝາກມີຜົນຕົວຈິງ, ອັນພິເສດແມ່ນ ການຊຸກຍູ້ໂຄງການສ້າງທາງລົດໄຟ ລາວ-ຈີນ ສໍາເລັດການກໍ່ສ້າງ ແລະ ຈະເປີດນໍາໃຊ້ໃນຕົ້ນເດືອນທັນວາທີ່ຈະມາເຖິງນີ້.

   ໃນກອງປະຊຸມທາງໄກຄັ້ງນີ້ ຍັງມີ ເອກອັກຄະລັດຖະທູດ ສປປ ລາວ ປະຈໍາ ສປ ຈີນ ແລະ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ເຂົ້າຮ່ວມນໍາ.

---