ເນື້ອໃນຕົ້ນຕໍຂອງແນວທາງການຕ່າງປະເທດ ຂອງພັກປະຊາຊົນປະຕິວັດລາວ
ເຜີຍແຜ່ໂດຍ: admin ເວລາ: 24/05/2022 10:09:07 ຈຳນວນຢ້ຽມຊົມ 520 ຄັ້ງ ເພື່ອເຮັດໃຫ້ບັນດາທ່ານຜູ້ອ່ານສາມາດກໍາໄດ້ເນື້ອໃນຕົ້ນຕໍຂອງແນວທາງຕ່າງປະເທດຂອງພັກ ນັບຕັ້ງແຕ່ມື້ສ້າງຕັ້ງ ຈົນເຖິງ ປະຈຸບັນ, ຄະນະພົວພັນຕ່າງ ປະເທດສູນກາງພັກຈຶ່ງ ໄດ້ສັງລວມໂດຍຫຍໍ້ກ່ຽວກັບເນື້ອໃນຂອງແນວທາງການຕ່າງປະເທດຂອງພັກ ນັບຕັ້ງແຕ່ກອງປະຊຸມໃຫຍ່ຂອງພັກຄັ້ງທີ I-X ຂອງພັກປະຊາຊົນປະຕິວັດລາວ ແລະ ເນື້ອໃນແນວທາງຕ່າງປະເທດທີ່ໄດ້ລະບຸໃນ ລັດຖະທຳມະນູນແຫ່ງ ສປປ ລາວ ສະບັບທໍາອິດ ໃນປີ 1991 ແລະ ສະບັບປັບ ປຸງໃນປີ 2015 ດັ່ງນີ້:
ກອງປະຊຸມໃຫ່ຍຄັ້ງທີ I ໄຂຂື້ນວັນທີ 22 ມີນາ ປີ 1955 ເປັນກອງປະ ຊຸມສ້າງຕັ້ງ ແລະ ໄດ້ກໍານົດຊື່ພັກເປັນ ພັກປະຊາຊົນລາວ ແລະ ໄດ້ກໍານົດໂຄງ ການດຳເນີນງານ 12 ຂໍ້, ໃນນັ້ນມີຂໍ້ທີສີບ ໄດ້ກໍານົດແນວທາງການຕ່າງປະເທດ ອອກຄື: ຜູກມິດກັບທຸກປະເທດທີ່ເຄົາລົບເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງລາວ ບົນຫຼັກການສະເໝີພາບຕ່າງຝ່າຍຕ່າງໄດ້ຮັບຜົນປະໂຫຽດ.
ກອງປະຊຸມໃຫຍ່ຄັ້ງທີ II ໄຂຂື້ນໃນວັນທີ 3 ເດືອນ 2 ປີ 1972 ໄດ້ປ່ຽນຊື່ພັກມາເປັນ ພັກປະຊາຊົນປະຕິວັດລາວ ແລະ ໄດ້ກໍານົດໜ້າທີ່ຕົ້ນຕໍ ແລະ ຈຸດໝາຍການເມືອງສະເພາະໜ້າຂອງການປະຕິວັດຄື: ເຊີດຊູຄັນທຸງປະຕິວັດຊາດປະຊາທິປະໄຕ, ເພີ່ມທະວີຄວາມສາມັກຄີປວງຊົນທັງຊາດ, ສາມັກຄີທຸກກຳລັງປະຕິວັດ, ທຸກກຳລັງທີ່ຮັກຊາດ ແລະ ກ້າວໜ້າ, ສາມັກຄີແໜ້ນແຟ້ນກັບ ປະຊາ ຊົນ ຫວຽດນາມ ແລະ ປະຊາຊົນ ກໍາປູເຈັຍ; ຕັ້ງໜ້າກໍ່ສ້າງກຳລັງປະຕິວັດໃນທຸກດ້ານ, ຊຸກຍູ້ການຕໍ່ສູ້ເພື່ອປົກປັກຮັກສາ, ປັບປຸງ ແລະ ເປີດກວ້າງເຂດປົດປ່ອຍ, ເພີ່ມທະວີ ຄວາມສາມັກຄີປວງຊົນທັງຊາດ, ສາມັກຄີທຸກກໍາລັງປະຕິວັດ, ທຸກກໍາລັງທີ່ຮັກຊາດ ແລະ ກ້າວໜ້າ ເຮັດໃຫ້ປະເທດລາວເປັນປະເທດ ສັນຕິພາບ ເອກະລາດ ປະຊາທິປະໄຕ ເປັນກາງ ເອກະພາບ ແລະ ວັດທະນາຖາວອນ, ຕັ້ງໜ້າປະກອບສ່ວນເຂົ້າໃນການຕໍ່ສູ້ເພື່ອ ສັນຕິພາບ ເອກະລາດແຫ່ງຊາດ ປະຊາ ທິປະໄຕ ແລະ ສັງຄົມນິຍົມ ຢຸ່ອິນດູຈີນ, ອາຊີອາຄະເນ ແລະ ໃນໂລກ.
ກອງປະຊຸມໃຫຍ່ຄັ້ງທີ III ໄຂຂື້ນໃນວັນທີ 27 ເມສາ ປີ 1982 ໄດ້ວາງແນວທາງການຕ່າງປະເທດ: ສັນຕິພາບ, ເອກະລາດ ແລະ ສັງຄົມນິຍົມ.
ກອງປະຊຸມໃຫຍ່ຄັ້ງທີ IV ໄຂຂື້ນໃນວັນທີ 13 ພະຈິກ 1986 ໄດ້ກໍານົດແນວທາງການຕ່າງປະເທດ: ສັນຕິພາບ, ເອກະລາດ ແລະ ການຮ່ວມມື.
ກອງປະຊຸມໃຫຍ່ຄັ້ງທີ V ໄຂຂື້ນໃນວັນທີ 27 ມີນາ 1991 ໄດ້ກໍານົດແນວທາງການຕ່າງປະເທດ: ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ກັບນາໆຊາດຢ່າງສະເໝີຕົ້ນສະເໝີປາຍ.
ກອງປະຊຸມໃຫຍ່ຄັ້ງທີ VI ໄຂຂື້ນໃນວັນທີ 18 ມີນາ ປີ 1996 ໄດ້ກໍານົດແນວທາງການຕ່າງປະເທດ: ສັນຕິພາບ, ເອກະລາດ, ມິດຕະພາບ ແລະ ການຮ່ວມມື.
ກອງປະຊຸມໃຫຍ່ຄັ້ງທີ VII ໄຂຂື້ນ ວັນທີ 12 ມີນາ 2001 ໄດ້ກໍານົດ ແນວທາງການຕ່າງປະເທດ: ສັນຕິພາບ, ເອກະລາດ, ມິດຕະພາບ ແລະ ການຮ່ວມມືຢ່າງສະເໝີຕົ້ນສະເໝີປາຍ.
ກອງປະຊຸມໃຫຍ່ຄັ້ງທີ VIII ໄຂຂື້ນ ໃນວັນທີ 18 ມີນາ ປີ 2006 ໄດ້ກໍາ ນົດແນວທາງການຕ່າງປະເທດ: ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ປະຕິບັດນະໂຍບາຍພົວພັນແບບຫຼາຍທິດ, ຫຼາຍຝ່າຍ, ຫຼາຍຮູບແບບ, ເປີດກວ້າງເປັນແຕ່ລະບາດກ້າວຢ່າງເໝາະສົມຕາມເງື່ອນໄຂ ແລະຄວາມສາມາດຕົວຈິງ.
ກອງປະຊຸມໃຫຍ່ຄັ້ງທີ IX ໄຂຂື້ນໃນວັນທີ 17 ມີນາ ປີ 2011 ໄດ້ກໍານົດແນວທາງການຕ່າງປະເທດ: ສັນຕິພາບ, ເອກະລາດ, ມິດຕະພາບ ແລະ ການຮ່ວມມື, ປະຕິບັດນະໂຍບາຍພົວພັນແບບຫຼາຍທິດ, ຫຼາຍຝ່າຍ, ຫຼາຍຮູບແບບ ບົນພື້ນຖານຫຼັກການເຄົາລົບເຊິ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຽດ, ເສີມສ້າງໄມຕີຈິດມິດຕະພາບ ແລະ ຄວາມໄວ້ເນື້ອເຊື່ອໃຈກັບນາໆຊາດ ໃຫ້ນັບມື້ນັບກ້ວາງຂວາງ.
ກອງປະຊຸມໃຫຍ່ຄັ້ງທີ X ໄຂຂື້ນ ໃນວັນທີ 18 ມັງກອນ ປີ 2016 ໄດ້ສືບຕໍ່ຍຶດໝັ້ນແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ; ເປັນເຈົ້າການໃນການເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນຢ່າງຕັ້ງໜ້າເຂົ້າໃນການສ້າງປະຊາຄົມ ອາຊຽນ; ສົ່ງເສີມການຮ່ວມມືກັບຕ່າງປະເທດ ແບບຫຼາຍທິດ, ຫຼາຍລະດັບ ບົນພື້ນຖານເຄົາລົບເອກະລາດ, ອຳນາດອະທິປະໄຕ ເຊິ່ງກັນ ແລະ ກັນ ແລະ ຕ່າງຝ່າຍຕ່າງມີຜົນປະໂຫຽດ.
ກອງປະຊຸມໃຫຍ່ ຄັ້ງທີ XI ຂອງພັກ ໄຂຂຶ້ນໃນລະຫວ່າງວັນທີ 13-15 ມັງກອນ 2021 ໂດຍສືບຕໍ່ຢຶດໝັ້ນແນວທາງການຕ່າງປະເທດ ສັນຕິພາບ, ເອກະລາດ, ມິດຕະພາບ, ການຮ່ວມມື ເພື່ອການພັດທະນາ ແລະ ຖືການທູດປ້ອງກັນເຫດເປັນທິດສໍາຄັນ. ບົນພື້ນຖານນັ້ນ ສືບຕໍ່ຂະຫຍາຍການພົວພັນຮ່ວມມືຫຼາຍທິດ, ຫຼາຍຝ່າຍ, ຫຼາຍຮູບແບບ, ຫຼາຍລະດັບ ລະຫວ່າງລັດກັບລັດ ແລະ ລະຫວ່າງພັກເຮົາກັບພັກການເມືອງຂອງຕ່າງປະເທດ ບົນພື້ນຖານເຄົາລົບເອກະລາດ, ອໍານາດອະທິປະໄຕ ເຊິ່ງກັນ ແລະ ກັນ, ຕ່າງຝ່າຍຕ່າງມີຜົນປະໂຫຍດ; ເພີ່ມທະວີຄວາມເປັນເຈົ້າການຈັດຕັ້ງປະຕິບັດບັນດາຂໍ້ຕົກລົງຮ່ວມມືອັນເປັນພື້ນຖານກັບບັນດາປະເທດເພື່ອມິດຍຸດທະສາດທີ່ໄດ້ຮ່ວມກັນຍົກການຮ່ວມມືສູ່ລະດັບສູງອັນໃໝ່ ໃຫ້ມີປະສິດທິຜົນຕົວຈິງກວ່າເກົ່າ.
ລັດຖະທຳມະນູນ ແຫ່ງ ສປປ ລາວ ມາດຕາ 12 ສະບັບປີ 1991 ແລະ ປີ 2015 ໄດ້ລະບຸແນວທາງການຕ່າງປະເທດ ໄວ້ດັ່ງນີ້: ສາທາລະນະລັດ ປະຊາ ທິປະໄຕ ປະຊາຊົນລາວ ປະຕິບັດນະໂຍບາຍການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື; ຂະຫຍາຍສາຍພົວພັນ ແລະ ການຮ່ວມມືກັບທຸກປະເທດ ບົນຫຼັກການຢູ່ຮ່ວມກັນໂດຍສັນຕິ, ເຄົາລົບເອກະລາດ, ອະທິປະໄຕ, ຜືນແຜ່ນດິນອັນຄົບຖ້ວນຂອງກັນ, ບໍ່ແຊກແຊງເຂົ້າວຽກງານພາຍໃນຂອງກັນ, ສະເໝີພາບ ແລະ ຕ່າງຝ່າຍຕ່າງໄດ້ຮັບຜົນປະໂຫຽດ.
ສາທາລະນະລັດ ປະຊາທິປະໄຕ ປະຊາຊົນລາວ ສະໜັບສະໜູນການຕໍ່ສູ້ຂອງປະຊາຊົນໃນໂລກ ເພື່ອສັນຕິພາບ, ເອກະລາດແຫ່ງຊາດ, ປະຊາທິປະໄຕ ແລະ ຄວາມກ້າວໜ້າທາງສັງຄົມ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20