ພັກກອມມູນິດຈີນ ໄດ້ປະຕິບັດອຸດົມການທີ່ຖືກຕ້ອງ ແລະ ຈະສືບຕໍ່ຍາດໄດ້ໄຊຊະນະຕະຫຼອດໄປ

ເຜີຍ​ແຜ່​ໂດຍ​: admin ເວ​ລາ: 11/03/2022 09:35:07 ຈຳ​ນວນ​​ຢ້ຽມ​ຊົມ 569 ຄັ້ງ ​

ເນື່ອງໃນໂອກາດວັນສ້າງຕັ້ງພັກກອມມູນິດຈີນ ຄົບຮອບ 100 ປີ, ສະຫາຍ ທອງສະຫວັນ ພົມວິຫານ ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ໃຫ້ສຳພາດຕໍ່ສື່ມວນຊົນ ຈີນ-ລາວ ວ່າ: ພາຍໃຕ້ການຊີ້ນຳ ແລະ ນຳພາຂອງພັກກອມມູນິດຈີນ ຕະຫຼອດໄລຍະ 100 ປີຜ່ານມາ ສປ ຈີນ ໄດ້ຮັບຜົນສໍາເລັດຢ່າງໃຫຍ່ຫຼວງຫຼາຍດ້ານ ໂດຍສະເພາະແມ່ນໄດ້ໃຊ້ເວລາສັ້ນ, ແຕ່ ສປ ຈີນ ສາມາດເຮັດສໍາເລັດການແກ້ໄຂ ແລະ ລຶບລ້າງຄວາມທຸກຍາກເຮັດໃຫ້ປະຊາກອນຫຼາຍຮ້ອຍລ້ານຄົນຫຼຸດພົ້ນອອກຈາກຄວາມທຸກຍາກ, ເປັນເຫດການທີ່ຫາຍາກ ແລະ ມະຫັດສະຈັນ ຊຶ່ງຫຼາຍປະເທດບໍ່ສາມາດເຮັດໄດ້. ເວົ້າລວມແລ້ວ, ຕະຫຼອດໄລຍະ 100 ປີ ພາຍໃຕ້ການນໍາພາຊີ້ນໍາຂອງພັກກອມມູນິດຈີນນັ້ນ, ມີທັງໄລຍະການຕໍ່ສູ້, ການທ້ອນໂຮມປະເທດຊາດ ແລະ ສໍາຄັນແມ່ນພາຍຫຼັງການປະຕິຮູບໃນປີ 1978 ເປັນຕົ້ນມາເຮັດໃຫ້ ສປ ຈີນ ພັດທະນາຢ່າງກ້າວກະໂດດ. ສ່ວນຕົວຂ້າພະເຈົ້າ ມີຄວາມພາກພູມໃຈຫຼາຍ ຊຶ່ງມັນສະທ້ອນໃຫ້ເຫັນເຖິງການຢຶດໝັ້ນລັດທິສັງຄົມນິຍົມ ແລະ ປະຕິບັດຈົນໄດ້ຮັບຜົນສໍາເລັດຢ່າງເປັນພື້ນຖານ. ສິ່ງທີ່ປະທັບໃຈອີກອັນໜຶ່ງກໍແມ່ນການສ້າງສັງຄົມນິຍົມຕາມສີສັນພິເສດຂອງຈີນກໍເປັນອີກຮູບການໜຶ່ງ ໃນການສ້າງສາພັດທະນາຂອງ ສປ ຈີນ. ຂ້າພະເຈົ້າມີຄວາມເຊື່ອໝັ້ນວ່າ ຜົນສຳເລັດທີ່ຍາດມາໄດ້ນັ້ນ ໄດ້ຮັບການສະໜັບສະໜູນຢ່າງກວ້າງຂວາງຈາກປະຊາຊົນບັນດາເຜົ່າລວມທັງ ເພື່ອນມິດສາກົນ ອັນນີ້ສະແດງໃຫ້ເຫັນວ່າ ພັກກອມມູນິດຈີນ ໄດ້ປະຕິບັດຕາມອຸດົມການທີ່ຖືກຕ້ອງ ແລະ ພັກກອມມູນິດຈີນຈະສືບຕໍ່ຍາດໄດ້ໄຊຊະນະຕະຫຼອດໄປ.

 

ສະຫາຍ ທອງສະຫວັນ ພົມວິຫານ ກ່າວຕື່ມວ່າ: ຜົນສໍາເລັດຂອງພັກກອມມູນິດຈີນ ມີຄວາມສໍາຄັນຕໍ່ພື້ນຖານບົດບາດຂອງບັນດາພັກການເມືອງ, ໃນນັ້ນ, ຄໍາເຫັນຂອງສະຫາຍເລຂາທິການໃຫຍ່ ປະທານປະເທດ ສີຈິິ້ນຜິງ ໃນ​ປີ 2017 ນັ້ນ, ໄດ້ເປັນແນວຄິດລິເລີ່ມອັນໜຶ່ງໃນການສ້າງຄວາມເຂັ້ມແຂງໃຫ້ກໍາລັງການເມືອງໃນໂລກນີ້ ແລະ ຍັງເປັນຂໍ້ລິເລີ່ມໃໝ່ໃນການສ້າງປະຊາຄົມຄູ່ຮວມຊາຕາກໍາມວນມະນຸດ ຊຶ່ງເປັນທັດສະນະທີ່ເບິ່ງກວ້າງເຫັນໄກຫຼາຍ, ຂ້າພະເຈົ້າຂໍຕີລາຄາວ່າ ນີ້ແມ່ນຄວາມປາຖະໜາ ທີ່ຢາກໃຫ້ມວນມະນຸດພັດທະນາຮ່ວມກັນ, ຫຼີກເວັ້ນການປະທະກັນ. ສ່ວນສະພາບການ​ຂອງໂລກໃນປັດຈຸບັນນີ້, ດັ່ງທີ່ເຮົາຮູ້ກັນວ່າ ມີຄວາມສະຫຼັບສັບຊ້ອນຫຼາຍ, ຄາດຄະເນໄດ້ຍາກ ແລະ ມີບັນຫາທ້າທ້າຍຕໍ່ການພັດທະນາ, ສັນຕິພາບ ແລະ ຄວາມໝັ້ນຄົງ. ນອກຈາກບັນຫາທີ່ມະນຸດສ້າງຂຶ້ນແລ້ວ ກໍຍັງມີໄພທໍາມະຊາດ ທີ່ເປັນບັນຫາສໍາຄັນຫຼາຍຕໍ່ບົດບາດຂອງພັກການເມືອງຂອງໂລກ. ສະນັ້ນ, ພວກເຮົາຕ້ອງຮ່ວມກັນປົກປັກຮັກສາ ແລະ ຮ່ວມກັນພັດທະນາ. ຂ້າພະເຈົ້າ ຂໍສະແດງຄວາມຊົມເຊີຍທີ່ພັກກອມມູນິດຈີນ ໄດ້ຈັດຫຼາຍກອງປະຊຸມໃນລະດັບຫຼາຍຝ່າຍຮ່ວມກັບບັນດາພັກການເມືອງໃນຂອບພາກພື້ນ ແລະ ສາກົນ ນີ້ກໍສະແດງເຖິງການເຕົ້າໂຮມຄວາມສາມັກຄີກັນ ແລະ ເຮັດໃຫ້ບົດບາດຂອງພັກກອມມູນິດຈີນໄດ້ຮັບການຍົກສູງຂຶ້ນ ໂດຍສະເພາະແມ່ນແນວທາງການສ້າງສັງຄົມນິຍົມທີ່ມີລັກສະນະສີສັນພິເສດຂອງຈີນໄດ້ຮັບຜົນສໍາເລັດ. ເວົ້າລວມກໍແມ່ນຄວາມສໍາເລັດຂອງເປົ້າໝາຍ 100 ປີເຫດການທີໜຶ່ງ ທີ່ພັກກອມມູນິດຈີນໄດ້ກຳນົດໄວ້.

 

ຕໍ່ຜົນສຳເລັດ ຂອງ ສປ ຈີນ ໃນການຕ້ານກັບໂຄວິດ-19 ທີ່ລະບາດຂຶ້ນ ໃນປີ 2019 ຜ່ານມາ,ສະຫາຍ ທອງສະຫວັນ ພົມວິຫານ ໄດ້ກ່າວວ່າ: ທົ່ວໂລກເຫັນວ່າ ຈີນ ສາມາດຄວບຄຸມໄດ້, ໃນຂະນະທີ່ຫຼາຍປະເທດຍັງມີການລະບາດຢູ່ ແລະ ໃຜກໍຮັບຮູ້ວ່າຈີນມີພົນລະເມືອງຫຼາຍກວ່າໝູ່, ລະບາດຂຶ້ນກ່ອນໝູ່ ແລະ ໃນໄລຍະເວລາ​ເທດ​ສະ​ການ​ປີ​ໃໝ່ຕື່ມອີກ, ອັນນີ້ແມ່ນຄວາມຫຍຸ້ງຍາກທີ່ສຸດໃນການຄວບຄຸມການແຜ່ລະບາດຂອງພະຍາດ. ແຕ່ດ້ວຍຄວາມຕັດສິນໃຈຢ່າງເດັດດ່ຽວຈາກການນໍາພາຂອງພັກກອມມູນິດຈີນ ອັນມີ ສະຫາຍ ສີຈິ້ນຜິງ ເປັນແກນນໍາ ແລະ ໄດ້ຮັບການປະກອບສ່ວນຂອງປະຊາຊົນທຸກຊັ້ນຄົນ, ພະນັກງານ,ທະຫານ, ຕໍາຫຼວດຢ່າງແຂງແຮງປຽບເໝືອນດັ່ງການປະຈັນບານໃນສະໜາມຮົບໜຶ່ງ, ສປ ຈີນ ສາມາດເອົາຊະນະກັບພະຍາດດັ່ງກ່າວນັ້ນໄດ້. ຜົນສຳເລັດດັ່ງກ່າວ, ຫຼາຍປະເທດໄດ້ຖອດເອົາບົດຮຽນຂອງຈີນຊຶ່ງຖືວ່າມີຄວາມເຂັ້ມງວດແທ້ໃນການຕໍ່ສູ້, ອັນນີ້ສະແດງເຖິງຄວາມເປັນປຶກແຜ່ນຂອງພັກກອມມູນິດຈີນຢູ່ອ້ອມຂ້າງພັກທີ່ມີສະຫາຍ ສີຈິ້ນຜິງ ເປັນແກນນຳ.

 

ຕໍ່ບັນຫາລັດທິຫຼາຍຝ່າຍ, ສະຫາຍ ທອງສະຫວັນ ພົມວິຫານ ກ່າວວ່າ: ອັນນີ້ກໍເປັນທ່າອ່ຽງລວມ  ເພາະວ່າສະໄໝໂລກສອງຂົ້ວ ຫຼືວ່າໂລກຂົ້ວດຽວຖືວ່າໝົດໄປແລ້ວ, ຍ້ອນວ່າລັດທິຫຼາຍຝ່າຍໄດ້ກາຍເປັນທິດທາງທີ່ຫຼາຍປະເທດສະແດງຄວາມເຫັນດີ ແລະ ສ່ວນໃຫຍ່ແມ່ນໃຫ້ການສະໜັບສະໜູນ ຊຶ່ງນໍາເອົາຜົນປະໂຫຍດໃຫ້ໂລກຫຼາຍກວ່າລັດທິຝ່າຍດຽວ.

 

ກ່ຽວກັບການພົວພັນພັນ ລະຫວ່າງ ພັກປະຊາຊາຊົນ ປະຕິວັດລາວ ແລະ ພັກກອມມູນິດຈີິນ, ສະຫາຍ ທອງສະຫວັນ ພົມວິຫານ ໄດ້ກ່າວວ່າ: ການພົວພັນສອງຝ່າຍມີຄວາມສໍາຄັນຫຼາຍ, ນັບແຕ່ໄລຍະຜ່ານມາຈົນເຖິງປັດຈຸບັນ. ອັນທີ່ພົ້ນເດັ່ນທີ່ສຸດ ກໍແມ່ນການສ້າງຄູ່ຮ່ວມຊາຕາກໍາສັງຄົມນິຍົມ ລາວ-ຈີນ,ຈີນ-ລາວ ຊຶ່ງຄະນະພົວພັນຕ່າງປະເທດສູນກາງພັກ ໄດ້ຮັບຜິດຊອບໂດຍກົງໃນການປະສານງານ, ຊຸກຍູ້ ແລະ ຈັດຕັ້ງແຜນແມ່ບົດດັ່ງກ່າວ. ການຈັດຕັ້ງຜັນຂະຫຍາຍແຜນແມ່ບົດດັ່ງກ່າວ ແມ່ນມີຄວາມໝາຍຢ່າງຮອບດ້ານ ຕໍ່ສອງປະເທດ ເພື່ອສົ່ງເສີມໃຫ້ສອງພັກ ສອງລັດ ແລະ ປະຊາຊົນສອງຊາດ ໄດ້ມີການພົວພັນ ແລກປ່ຽນກັນໃນທຸກລະດັບ, ທຸກຂົງເຂດວຽກງານ ແລະ ເພີ່ມທະວີຄວາມເຂົ້າອົກເຂົ້າໃຈຊຶ່ງກັນ ແລະກັນ. ໃນແຜນແມ່ບົດດັ່ງກ່າວ ແມ່ນຖືເອົາດ້ານການເມືອງເປັນພື້ນຖານ, ດ້ານເສດຖະກິດເປັນໃຈກາງ ແລະ ດ້ານວັດທະນະທໍາ-ສັງຄົມ ເພື່ອສົ່ງເສີມການໄປມາຫາສູ່, ການທ່ອງທ່ຽວ ແລະອື່ນໆ. ນອກນັ້ນ, ໃນດ້ານຄວາມໝັ້ນຄົງ ເປັນຕົວຊີ້ບອກເຖິງສະຖຽນລະພາບ ແລະ ສ້າງເງື່ອນໄຂອຳນວຍໃຫ້ການເສີມຂະຫຍາຍການຮ່ວມມືລະຫວ່າງສອງປະເທດ. ສະຫາຍ ທອງສະຫວັນ ພົມວິຫານ ກ່າວຕື່ມວ່າ: ການສ້າງແຜນແມ່ບົດຄູ່ຮ່ວມຊາຕາກໍາ ລາວ-ຈີນ, ຈີນ-ລາວ ໄດ້ເປັນຂີດໝາຍສໍາຄັນທາງດ້ານປະຫວັດສາດການພົວພັນສູງສຸດ ລະຫວ່າງ ສອງພັກ, ສອງລັດ ກໍຄືປະຊາຊົນສອງຊາດ. ການພົວພັນລະຫວ່າງສອງປະເທດ ໄດ້ປະກອບສ່ວນສຳຄັນເຂົ້າໃນການຈັດຕັ້ງປະຕິບັດຂໍ້ລິເລີ່ມ “ໜຶຶ່ງແລວ ໜຶຶ່ງເສັ້ນທາງ”. ນອກນັ້ນ,ໄລຍະຜ່ານມາ ການພົວພັນ ລາວ ແລະ ຈີນ ແມ່ນມີມູນເຊື້ອອັນດີງາມມາແຕ່ດົນນານແລ້ວ ນັບແຕ່ສະໄໝຕໍ່ສູ້ປົດປ່ອຍຊາດ ຈົນເຖິງສະໄໝປົກປັກຮັກສາ ແລະ ສ້າງສາພັດທະນາປະເທດຊາດໃນຍຸກປັດຈຸບັນນີ້ ຖືວ່າການພົວພັນຂອງສອງປະເທດໄດ້ສືບຕໍ່ພັດທະນາເປັນກ້າວໆມາ, ໂດຍສະເພາະນັບແຕ່ການຍົກລະດັບຄູ່ຮ່ວມຍຸດທະສາດ ໝັ້ນຄົງຍາວນານຕາມທິດ 4 ດີ ຈົນກ້າວມາເຖິງການສ້າງຄູ່ຮ່ວມຊາຕາກໍາ ລາວ-ຈີນ, ນີ້ສະແດງເຖິງການພົວພັນ ລະຫວ່າງ ລາວ-ຈີນ ໄດ້ກ້າວຂຶ້ນສູ່ລະດັບສູງຂຶ້ນເລື້ອຍໆ. ໃນນັ້ນ,ໄດ້ສະແດງອອກໃນການແລກປ່ຽນການພົວພັນກັນນັບແຕ່ຂັ້ນສູນກາງ ລົງຮອດທ້ອງຖິ່ນໄດ້ດຳເນີນໄປຢ່າງເປັນປົກກະຕິ. ສະເພາະໃນໄລຍະລະບາດຂອງໂຄວິດ-19 ກໍມີຄວາມຫຍຸ້ງຍາກໃນການພົວພັນ ແຕ່ພວກເຮົາໄດ້ມີການແລກປ່ຽນໃນຮູບແບບໃໝ່ ເປັນຕົ້ນແມ່ນ ການສົນທະນາທາງໄກ ລະຫວ່າງ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ກັບ ສະຫາຍ ສີຈິ້ນຜິງ ເລຂາທິການໃຫຍ່ ປະທານປະເທດ ແຫ່ງ ສປ ຈີນ ຊຶ່ງເປັນຮູບການໜຶ່ງທີ່ເປັນການຮັກສາການຕິດຕໍ່ພົວພັນທີ່ດີນໍາກັນ, ພິເສດໃນໂອກາດລົມສາຍການນຳສູງສຸດຂອງສອງປະເທດ ໄດ້ປະກາດເອົາປີ 2021 ເປັນປີມິດຕະພາບ ລາວ-ຈີນ ໃນໂອກາດ 60 ປີ ແຫ່ງການສ້າງຕັ້ງສາຍພົວພັນການທູດ.  ຍ້ອນວ່າ ລາວກັບຈີນ ມີມູນເຊື້ອສາຍພົວພັນອັນດີງາມມາແຕ່ດົນນານແລ້ວ ແລະ ທັງເປັນປະເທດບ້ານໃກ້ເຮືອນຄຽງທີ່ມີສາຍພູຜາແມ່ນໍ້າຕິດຈອດກັນ, ປະຊາຊົນກໍມີວັດທະນະທໍາ ແລະ ການດໍາລົງຊີວິດຄ້າຍຄືກັນ. ຂ້າພະເຈົ້າ ຖືວ່າຜົນສໍາເລັດຂອງການສ້າງສາພັດທະນາສັງຄົມນິຍົມຕາມສີສັນຂອງຈີນ ໄດ້ເປັນບົດຮຽນ ແລະ ເປັນກໍາລັງໃຈໃຫ້ແກ່ການສ້າງສາພັດທະນາຕາມທິດສັງຄົມນິຍົມຢູ່ລາວ.

 

ອີກເທື່ອໜຶ່ງ, ຂ້າພະເຈົ້າຂໍຕາງໜ້າ ພັກ, ລັດ ແລະ ປະຊາຊົນລາວ ສະແດງຄວາມຂອບໃຈຕໍ່ພັກກອມມູນິດຈີນ ທີ່ໄດ້ໃຫ້ການຊ່ວຍເຫຼືອຢາວັກຊິນ, ອຸປະກອນການແພດ, ລວມທັງການສົ່ງທີມແພດມາຊ່ວຍເຫຼືອ ສປປ ລາວ ໃນໄລຍະໂຄວິດ-19 ລະບາດໃນຄັ້ງທີໜຶ່ງ ກໍຄື ຄັ້ງທີ 2 ມາເຖິງປັດຈຸບັນ ສະຫາຍຈີນກໍໄດ້ຊ່ວຍເຫຼືອຢາວັກຊິນໃຫ້ແກ່ລາວເກືອບ 2 ລ້ານຫຼອດ (ໂດ​ສ). ຂ້າພະເຈົ້າ ເຊື່ອໝັ້ນວ່າ ການສະໜັບສະໜູນຊ່ວຍເຫຼືອດັ່ງກ່າວນີ້ເປັນການປະກອບສ່ວນເຂົ້າໃນການເສີມສ້າງຄວາມສາມັກຄີ ແລະ ການພົວພັນລະຫວ່າງ ສອງພັກ, ສອງລັດ ກໍຄື ປະຊາຊົນສອງປະເທດ. ພວກຂ້າພະເຈົ້າ ຕີລາຄາສູງຕໍ່ການຊ່ວຍເຫຼືອໃນການຕ້ານສະກັດກັ້ນໂຄວິດ-19 ຢູ່ລາວ ແລະ ສະຫາຍຈີນຍັງໄດ້ໃຫ້ການຊ່ວຍເຫຼືອແກ່ຫຼາຍປະເທດ,​  ອັນນີ້ກໍເປັນຜົນສຳເລັດໃຫຍ່ອັນໜຶ່ງຂອງການແພດຈີນ, ນອກນັ້ນຍັງເປັນຜົນສຳເລັດຂອງການຊ່ວຍເຫຼືອຊຶ່ງກັນ ແລະ ກັນ ໃນເວລາເພື່ອນມິດສະຫາຍຕົກທຸກໄດ້ຍາກຕື່ມອີກ. ຕອນທ້າຍຂອງການສຳພາດ, ເນື່ອງໃນໂອກາດວັນສ້າງຕັ້ງພັກກອມມູນິດຈີນ ຄົບຮອບ 100 ປີ, ສະຫາຍ ທອງສະຫວັນ ພົມວິຫານ ໄດ້ສະແດງຄວາມຂໍ່ານັບຊົມເຊີຍ ແລະ ອວຍພອນໃຫ້ພັກກອມມູນິດຈີນ ໂດຍມີສະຫາຍ ສີຈິ້ນຜິງ ເປັນແກນນຳ ຈົ່ງສືບຕໍ່ປະສົບຜົນສຳເລັດໃນການຊີ້ນຳ ແລະ ນຳພາ, ປະຕິບັດພາລະກຳທີ່ຕົນວາງໄວ້, ກໍຄືປະຊາຊົນໄດ້ມອບໝາຍໃຫ້, ໃນນັ້ນກໍແມ່ນການບັນລຸຄວາມຝັນຂອງພັກກອມມູນິດຈີນທີ່ໄດ້ກຳນົດໄວ້ໃຫ້ສຳເລັດຜົນ.

ຂ່າວ-ພາບ: ຄ​ຕ​ພ

---