ທ່ານ ທູດລາວ ປະຈຳ ຫວຽດນາມ ໃຫ້ສຳພາດນັກຂ່າວ vov ກ່ອນການເດີນທາງມາຢ້ຽມຢາມຫວຽດນາມ ຂອງທ່ານເລຂາທິການໃຫຍ່, ປະທານປະເທດລາວ ທອງລຸນ ສີສຸລິດ

ເຜີຍ​ແຜ່​ໂດຍ​: admin ເວ​ລາ: 11/03/2022 09:04:03 ຈຳ​ນວນ​​ຢ້ຽມ​ຊົມ 541 ຄັ້ງ ​

ວິທະຍຸກະຈາຍສຽງຫວຽດນາມລາຍງານວ່າ: ການຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການ ຂອງສະຫາຍ ທອງລຸນ ສີສຸລິດ ໄດ້ຢັ້ງຢືນນ້ຳໃຈສາມັກຄີ, ສະໜິດຕິດພັນ, ຄວາມໄວ້ເນື້ອເຊື່ອໃຈຢ່າງສະເໝີຕົ້ນສະເໝີປາຍຂອງພັກ, ລັດ ແລະ ປະຊາຊົນຫວຽດນາມ ຕໍ່ພັກ, ລັດ ແລະ ປະຊາຊົນ ລາວ.

ໂດຍຕອບສະໜອງຕາມຄຳເຊື້ອເຊີນຂອງສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ, ສະຫາຍ ຫງວຽນຊວັນຟຸກ ປະທານປະເທດ ແລະ ພັນລະຍາ, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດແຫ່ງ ສປປ ລາວ ພ້ອມດ້ວຍພັນລະຍາ ແລະ ຄະນະຜູ້ແທນຂັ້ນສູງຂອງພັກ ແລະ ລັດ ແຫ່ງ ສປປລາວ ຈະໄປຢ້ຽມຢາມສັນຖະວະໄມຕີ ຫວຽດນາມ ຢ່າງເປັນທາງການ ໃນລະຫວ່າງວັນທີ 28 – 29 ມິຖຸນານີ້.

ການຢ້ຽມຢາມຄັ້ງນີ້ ເປັນການຢັ້ງຢືນນ້ຳໃຈສາມັກຄີ, ສະໜິດຕິດພັນ, ຄວາມໄວ້ເນື້ອເຊື່ອໃຈຢ່າງສະເໝີຕົ້ນສະເໝີປາຍຂອງພັກ, ລັດ ແລະ ປະຊາຊົນ ຫວຽດນາມ ຕໍ່ ພັກ, ລັດ ແລະ ປະຊາຊົນ ລາວ. ເນື່ອງໃນໂອກາດນີ້, ນັກຂ່າວວິທະຍຸກະຈາຍສຽງຫວຽດນາມ (VOV) ໄດ້ມີການສຳພາດ ທ່ານ ແສງເພັດ ຮຸ່ງບຸນຍວງ ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງ ສປປ ລາວ ປະຈຳ ສສ ຫວຽດນາມ, ກ່ອນການເດີນທາງໄປຢ້ຽມຢາມ ຫວຽດນາມ ຂອງ ທ່ານ ທອງລຸນ ສີສຸລິດ ຄັ້ງນີ້.

ສະຫາຍ ແສງເພັດ ຮຸ່ງບຸນຍວງ ໄດ້ກ່າວວ່າ: ການຢ້ຽມຢາມສັນຖະວະໄມຕີ ສສ ຫວຽດນາມ ຂອງສະຫາຍ ທອງລຸນ ສີສຸລິດ ພ້ອມພັນລະຍາ ແລະ ຄະນະຜູ້ແທນຂັ້ນສູງ ໃນຄັ້ງນີ້ ເປັນການເຄື່ອນໄຫວຢູ່ຕ່າງປະເທດ ເຄັ້ງທຳອິດ ພາຍຫຼັງທີ່ສະຫາຍ ໄດ້ຮັບການເລືອກຕັ້ງເປັນເລຂາທິການໃຫຍ່, ປະທານປະເທດ ແຫ່ງ ສປປ ລາວ, ການຢ້ຽມຢາມຄັ້ງນີ້ ແມ່ນມີຄວາມໝາຍສຳຄັນຍິ່ງ, ທັງເປັນການຢັ້ງຢືນເຖິງລັກສະນະຫຼັກໝັ້ນຂອງ ພັກ ແລະ ລັດຖະບານແຫ່ງ ສປປ ລາວ ທີ່ຍາມໃດກໍຢືນຢັນ ການສືບຕໍ່ປົກປັກຮັກສາ, ເພີ່ມພູນຄູນສ້າງ ແລະ ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ທັງເປັນການສະແດງໃຫ້ເຫັນເຖິງຄວາມມີຊີວິດຊີວາ ຂອງການພົວພັນແບບພິເສດລະຫວ່າງ ສອງຊາດລາວ-ຫວຽດນາມ. ເຖິງວ່າສະພາບການຂອງໂລກ ໂດຍສະເພາະຢູ່ສອງປະເທດພວກເຮົາ ຈະເກີດມີການລະບາດຂອງພະຍາດໂຄວິດ-19 ກໍຕາມ, ແຕ່ການນໍາ ພັກ-ລັດ ໄດ້ຕັດສິນໃຈທຳການຢ້ຽມຢາມສັນຖະວະໄມຕີ ຢ່າງເປັນທາງການ. ນີ້ສະແດງໃຫ້ໂລກໄດ້ເຫັນວ່າ: ການພົວພັນລັກສະນະພິເສດ ລະຫວ່າງ ລາວ-ຫວຽດນາມ ມີພຽງໜຶ່ງດຽວຂອງສອງຊາດພວກເຮົາ.

ການຢ້ຽມຢາມຂອງສະຫາຍ ທອງລຸນ ສີສຸລິດ ຄັ້ງນີ້, ຈະໄດ້ມີການພົບປະທາງການ ລະຫວ່າງ ສອງຄະນະ, ພົບປະກັບນາຍົກລັດຖະມົນຕີ, ປະທານສະພາແຫ່ງຊາດ ສສ ຫວຽດນາມ ແລະ ພົບປະກັບອະດີດການນຳຂັ້ນສູງຂອງພັກ-ລັດຖະບານ ຫວຽດນາມ ຈຳນວນໜຶ່ງ. ພ້ອມກັນນີ້, ກໍຈະມີຖະແຫຼງການຮ່ວມ ແລະ ຈະເຊັນເອກະສານ ຈຳນວນ 6 ສະບັບ, ເພື່ອເປັນການສືບຕໍ່ຊຸກຍູ້ສົ່ງເສີມສາຍພົວພັນມິດຕະພາບອັນຍິ່ງໃຫຍ່ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດພວກເຮົາ ໃຫ້ນັບມື້ນັບເກີດດອກອອກຜົນຍິ່ງຂຶ້ນ.

ສະຫາຍ ແສງເພັດ ຮຸ່ງບຸນຍວງ ຍັງໃຫ້ຮູ້ຕື່ມວ່າ: ຕະຫຼອດໄລຍະຜ່ານມາ, ເຖິງວ່າສະພາບການຂອງໂລກ ໄດ້ມີການຜັນແປໄປຢ່າງໄວວາ ສະຫຼັບສັບຊ້ອນ ແລະ ຍາກທີ່ຈະຄາດກະໄດ້, ແຕ່ພັກ-ລັດຖະບານ ສອງຊາດພວກເຮົາ ກໍຍັງໄດ້ສືບຕໍ່ເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງປະເທດພວກເຮົາ ນັບມື້ໄດ້ຮັບຜົນສຳເລັດອັນຍິ່ງໃຫຍ່. ໃນນັ້ນ, ການຮ່ວມມືໃນຂົງເຂດດ້ານການເມືອງ ນັບມື້ມີຄວາມໜັກແໜ້ນ ແລະ ກ້າວເຂົ້າສູ່ລວງເລິກ, ການຮ່ວມມືວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການຕ່າງປະເທດ ນັບມື້ສະໜິດແໜ້ນ, ໃກ້ຊິດຕິດແທດ, ເຂົ້າອົກເຂົ້າໃຈຊຶ່ງກັນ ແລະ ກັນ ກາຍເປັນເສົາຄໍ້າ ໃນການປົກປັກຮັກສາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ.

ສຳລັບການພົວພັນຮ່ວມມືດ້ານເສດຖະກິດ-ສັງຄົມ, ວິທະຍາສາດ-ເຕັກນິກ ເຫັນວ່າ: ມີບາດກ້າວ ໃໝ່ ແລະ ມີຜົນສຳເລັດໃຫຍ່ຫຼວງ ໂດຍສະເພາະ ການຄ້າ ລະຫວ່າງ ສອງປະເທດ ເຫັນວ່າ: ໂຕເລກສິນຄ້າ, ມູນຄ່າການຄ້າແລກປ່ຽນກັນ ກໍນັບມື້ເພີ່ມຂຶ້ນ.

ນອກຈາກນັ້ນ, ການຮ່ວມມືດ້ານການສຶກສາ, ບໍາລຸງສ້າງບຸກຄະລາກອນ, ການກໍ່ສ້າງຊັບພະຍາກອນມະນຸດ ນັບມື້ກ້າວໄປສູ່ຄຸນນະພາບໃໝ່. ທັງໝົດນີ້, ສະແດງໃຫ້ເຫັນເຖິງປະສິດທິຜົນຂອງການພົວພັນ ແລະ ການຮ່ວມມືຂອງສອງຊາດພວກເຮົາ.

---