ໃນ​ຕອນ​ບ່າຍ ຂອງວັນ​ທີ 22 ກໍ​ລະ​ກົດ 2021, ສະ​ຫະ​ພັນ​ແມ່​ຍິງ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ຈັດ​ພິ​ທີ​ປາ​ຖະ​ກະ​ຖາເລົ່າ​ມູນ​ເຊື້ອ ເພື່ອ​ສະ​ເຫຼີມ​ສະຫຼອງວັນ​ສ້າງ​ຕັ້ງ​ອົງ​ການ​ສະ​ຫະ​ພັນ​ແມ່​ຍິງ​

ເຜີຍ​ແຜ່​ໂດຍ​: admin ເວ​ລາ: 16/03/2022 10:05:25 ຈຳ​ນວນ​​ຢ້ຽມ​ຊົມ 291 ຄັ້ງ ​

 ໃນ​ຕອນ​ບ່າຍ ຂອງວັນ​ທີ 22 ກໍ​ລະ​ກົດ 2021, ສະ​ຫະ​ພັນ​ແມ່​ຍິງ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ຈັດ​ພິ​ທີ​ປາ​ຖະ​ກະ​ຖາເລົ່າ​ມູນ​ເຊື້ອ ເພື່ອ​ສະ​ເຫຼີມ​ສະຫຼອງວັນ​ສ້າງ​ຕັ້ງ​ອົງ​ການ​ສະ​ຫະ​ພັນ​ແມ່​ຍິງ​ລາວ ຄົບ​ຮອບ 66 ປີ (20/07/1955-20/07/2021), ເປັນ​ກຽດ​ເຂົ້າ​ຮ່ວມ​ໂດຍ ສະ​ຫາຍ ທອງ​ສະ​ຫວັນ ພົມ​ວິ​ຫານ, ກຳ​ມະ​ການ​ສູນ​ກາງ​ພັກ, ເລ​ຂາຄະ​ນະ​​ບໍ​ລິ​ຫານ​ງານພັກ ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ຫົວ​ໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ແລະ ສະ​ຫາຍ ນາງ ​ສິ​ຣິ​ພອນ ຄູ​ຫາ​ເທບ, ປະ​ທານ​ສະ​ຫະ​ພັນ​ແມ່​ຍິງ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ແລະ ມີ​ບັນ​ດາ​ສະ​ຫາຍ​ໃນ​ຄະ​ນະ​ສະ​ຫະ​ພັນ​ແມ່​ຍິງ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ຕາງ​ໜ້າ​ສະ​ຫະ​ພັນ​ກຳ​ມະ​ບານຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ຕາງ​ໜ້າ​ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ແລະ ສະ​ມາ​ຊິກ​ແມ່​ຍິງ​ພາຍ​ໃນ​ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ​ເຂົ້າ​ຮ່ວມ​ຢ່າງ​ພ້ອມ​ພຽງ.

   ສະ​ຫາຍ ນາງ ສິ​ຣິ​ພອນ ຄູ​ຫາ​ເທບ, ປະ​ທານ​ສະ​ຫະ​ພັນ​ແມ່​ຍິງ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ເລົ່າ​ຄືນ​ປະ​ຫວັດ​ຄວາມ​ເປັນ​ມາ ຂອງ​ການ​ສ້າງ​ຕັ້ງ​ອົງ​ການ​ສະ​ຫະ​ພັນ​ແມ່​ຍິງ​ລາວ, ການ​ເຕີບ​ໃຫຍ່​ຂະ​ຫຍາຍ​ຕົວ​ຂອງ​ສະ​ຫະ​ພັນ​ແມ່​ຍິງ​ລາວ, ຍົກ​ໃຫ້​ເຫັນ​ຜົນ​ຂອງກອງ​ປະ​ຊຸມ​ໃຫ​ຍ່​ຂອງ​ແມ່​ຍິງ​ລາວ​ທົ່ວ​ປະ​ເທດ ທັງ 7 ຄັ້ງ ແລະ ຜົນ​ງານ​ການ​ເຄື່ອນ​ໄຫວ​ພົ້ນ​ເດັ່ນ​ຂອງ​ສະ​ຫະ​ພັນ​ແມ່​ຍິງ​ລາວ ແລະ ແມ່​ຍິງ​ລາວ ເຊິ່ງ​ໄດ້​ເຮັດ​ໃຫ້​ສະ​ມາ​ຊິກ​ແມ່​ຍິງ​ ພາຍ​ໃນ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ຮັບ​ຮູ້ ແລະ ເຂົ້າ​ໃຈ​ຕື່ມ, ເພື່ອ​ນຳ​ເອົາ​ມູນ​ເຊື້ອອັນ​ດີ​ງາມ​ຂອງ​ແມ່​ຍິງຮຸ່ນ​ກ່ອນ ມາ​ຈັດ​ຕັ້ງ​ຜັນ​ຂະ​ຫຍາຍ ໃຫ້​ໄດ້​ຮັບ​ໝາກ​ຜົນຫຼາຍກວ່າ​ເກົ່າ.

   ໃນ​ໂອ​ກາດ​ດັ່ງ​ກ່າວ, ສະຫາຍ ທອງ​ສະ​ຫວັນ ພົມ​ວິ​ຫານ, ກຳມະການສູນກາງພັກ, ເລຂາຄະນະພັກ ຄະນະພົວພັນຕ່າງປະເທດສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້​ໃຫ້​ກຽດ​ໂອ້​ລົມ​ຕໍ່​ບັນ​ດາ​ສະ​ມາ​ຊິກ​ແມ່​ຍິງ    ຄ​ະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ​ສະ​ຫາຍ ໄດ້​ສະ​ແດງ​ຄວາມ​ຍ້ອງ​ຍໍ, ຊົມ​ເຊີຍ ​ຕໍ່​ການ​ເຄື່ອນ​ໄຫວ​ຢ່າງ​ຫ້າວ​ຫັນ ຂອງ​ແມ່​ຍິງ​ຄະ​ນະ​ພົວ​ພັນ​ຕ່າງ​ປະ​ເທດ ໃນ​ໄລ​ຍະ​ຜ່ານ​ມາ ແລະ ໃຫ້​ທິດ​ຊີ້​ນຳ ໃນ​ການ​ເຄື່ອນ​ໄຫວ​ໃນ​ຕໍ່​ໜ້າ. ພ້ອມ​ດຽວ​ກັນ​ນີ້, ທ່ານ ນາງ ວາດ​ສະ​ໜາ ພົມ​ວິ​ຫານ, ໃນ​ນາມ​ພັນ​ລະ​ຍາ​ການ​ນຳ ຍັງ​ໄດ້​ມອບ​ຜ້າ​ປິດ​ປາກ ຈຳ​ນວນ​ໜຶ່ງ ໃຫ້​ແກ່​ສະ​ຫະ​ພັນ​ແມ່​ຍິງ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ເພື່ອ​ນຳ​ໃຊ້​ປ້ອງ​ກັນ​ຈາກ​ໂຄວິດ-19 ຕໍ່​ໄປ.

---