ຄະນະພົວພັນຕ່າງປະເທດສູນກາງພັກ ​ເຜີຍແຜ່ເຊື່ອມຊຶມເອກະສານສໍາຄັນຂອງພັກ - ລັດ. 

ເຜີຍ​ແຜ່​ໂດຍ​: admin ເວ​ລາ: 16/03/2022 08:47:08 ຈຳ​ນວນ​​ຢ້ຽມ​ຊົມ 337 ຄັ້ງ ​

       ໂດຍປະຕິບັດຕາມແຈ້ງການແນະນໍາ ຂອງ ຄະນະໂຄສະນາອົບຮົມສູນກາງພັກ ແລະ ແຈ້ງການຂອງ ອົງການກວດກາແຫ່ງລັດ ໃນຕອນເຊົ້າຂອງວັນທີ15 ມີນາ 2022, ຄະນະພົວພັນຕ່າງປະເທດສູນກາງພັກ ໄດ້ຈັດຕັ້ງເຜີຍແຜ່ເຊື່ອມຊືມເອກະສານສໍາຄັນຂອງພັກ - ລັດ. ໃຫ້ກຽດປາຖະກະຖາໂດຍ ສະຫາຍ ທອງສະຫວັນ ພົມວິຫານ, ກໍາມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ, ໂດຍມີບັນດາສະຫາຍໃນຄະນະບໍລິຫານງານພັກ, ສະມາຊິກພັກ- ພະນັກງານ​ທົ່ວຄະນະພົວພັນຕ່າງປະເທດສູນກາງພັກ ເຂົ້າຮ່ວມຢ່າງພ້ອມພຽງ.    

       ຈຸດປະສົງໃນການປາຖະກະຖາຄັ້ງນີ້ ແມ່ນເພື່ອຫວນຄືນມູນເຊື້ອປະຫວັດສາດ  ແລະ ຄວາມໝາຍສຳຄັນຂອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 67 ປີ; ເຊື່ອມຊືມມະຕິກອງປະຊຸມຄົບຄະນະ ຄັ້ງທີ 3 ຂອງ ຄະນະບໍລິຫານງານສູນກາງພັກ ສະໄໝທີ XI; ເຜີຍແຜ່ວັນສ້າງຕັ້ງອົງການກວດກາພັກ-ລັດ ສປປ ລາວ ຄົບຮອບ 40 ປີ ແລະ ເອກະສານຜົນສໍາເລັດການກໍ່ສ້າງທາງລົດໄຟລາວ - ຈີນ.

       ການປາຖະກະຖາໃນຄັ້ງນີ້ ສະຫາຍ ຫົວໜ້າ ຄະນະພົວພັນຕ່າງປະເທດສູນກາງພັກ ໄດ້ຍົກໃຫ້ເຫັນປະຫວັດສາດແຫ່ງການກຳເນີດເຕີບໃຫຍ່ຂະຫຍາຍຕົວຂອງພັກປະຊາຊົນລາວໃນເມືອກ່ອນ, ພັກປະຊາຊົນປະຕິວັດລາວໃນປັດຈຸບັນແລະບັນດາຜົນງານອັນໃຫຍ່ຫຼວງໃນການຊີ້ນໍາ, ນໍາພາ ທີ່ສະຫຼາດສ່ອງໃສຂອງພັກ ໃນຂະບວນການຕໍ່ສູ້ເພື່ອຍາດເອົາເອກະລາດແຫ່ງຊາດໃນເມື່ອກ່ອນຈົນສາມາດຍາດເອົາໄຊຊະນະຢ່າງສົມບູນໃນປີ 1975; ສະຫາຍ ຫົວໜ້າ ຄຕພ ສືບຕໍ່ຍົກໃຫ້ເຫັນເນື້ອໃນສຳຄັນຂອງມະຕິຂອງສູນກາງພັກ ຄັ້ງທີ 3 ກ່ຽວກັບການຕີລາຄາສະພາບການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ, ແຜນງົບປະມານ ແລະ ແຜນເງິນຕາ 9 ເດືອນຜ່ານມາ, ມາດຕະການຈັດຕັ້ງປະຕິບັດແຜນ ໃນໄຕມາດສຸດທ້າຍ ປີ 2021 ແລະ ທິດທາງແຜນການ ປີ 2022, ສະພາບການ ຂອງພາກພື້ນ ແລະ ສາກົນ, ສະພາບການຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ, ການດໍາເນີນຊີວິດການເມືອງພາຍໃນຄະນະບໍລິຫານງານສູນກາງພັກ ປະຈໍາປີ 2021, ວຽກງານຈຸດສຸມແຕ່ນີ້ຮອດກອງປະຊຸມຄົບຄະນະ ຄັ້ງທີ 4 ສະໄໝທີ XI, ຈາກນັ້ນ ສະຫາຍຫົວໜ້າ ຄຕພ ສືບຕໍ່ລະນຶກມູນເຊື້ອວັນສ້າງຕັ້ງອົງການກວດກາພັກ - ລັດ ສປປ ລາວ ຄົບຮອບ 40 ປີ ໂດຍໄດ້ຍົກໃຫ້ເຫັນພັກເຮົາຖືວຽກງານກວດກາພາຍໃນພັກ ເປັນພາລະບົດບາດນໍາພາທີ່ຂາດບໍ່ໄດ້ ໂດຍຍຶດໝັ້ນທັດສະນາ ທີ່ວ່າ: ການນໍາພາຕ້ອງຕິດພັນກັບການກວດກາ, ຖ້າບໍ່ມີການກວດກາກໍເໝືອນບໍ່ມີການນໍາພາ. ພ້ອມທັງຍົກໃຫ້ເຫັນຜົນສໍາເລັດ ຂອງວຽກງານດັ່ງກ່າວໃນການປະກອບສ່ວນເຄື່ອນໄຫວວຽກງານກວດກາເຂົ້າໃນພາລະກິດ ປົກປັກຮັກສາ ແລະ ພັດທະນາປະເທດຊາດໃນປັດຈຸບັນ.ໃນຕອນທ້າຍ, ສະຫາຍຫົວໜ້າຄະນະພົວພັນຕ່າງປະເທດສູນກາງພັກ ໄດ້​ສືບ​ຕໍ່ເຜີຍແຜ່​​ເອ​ກະ​ສານກ່ຽວ​ກັບ ເນື້ອໃນຜົນສໍາເລັດການກໍ່ສ້າງທາງລົດໄຟລາວ -ຈີນ ໂດຍໄດ້ຍົກໃຫ້ເຫັນເຖິງ ເປົ້າໝາຍລວມ, ຜົນໄດ້ຮັບຂອງໂຄງການດັ່ງກ່າວ, ການຄຸ້ມຄອງບໍລິການຂົນສົ່ງ ແລະ ບັນດານະໂຍບາຍສົ່ງເສີມສະໜັບສະໜູນຂອງ ສອງລັດຖະບານ ລາວ - ຈີນ.

ການປາຖະກະຖາໃນຄັ້ງນີ້ພະນັກງານທີ່ເຂົ້າຮ່ວມຟັງການເຜີຍແຜ່ກໍ່ໄດ້ມີການແລກປ່ຽນ, ປະກອບຄໍາເຫັນຢ່າງກົງໄປກົງມາ ອັນໄດ້ເຮັດໃຫ້ມີບັນຍາກາດຟົດຟື້ນ, ສ້າງຄວາມເຂົ້າໃຈຢ່າງເລິກເຊິ່ງໃຫ້ພະນັກງານໃນ ຄະນະພົວພັນຕ່າງປະເທດສູນກາງພັກ, ຊ່ວຍໃຫ້ສະມາຊິກພັກ, ພະນັກງານຄະນະພົວພັນຕ່າງປະເທດສູນກາງພັກເຂົ້າໃຈໄດ້ຕື່ມກ່ຽວກັບວິລະກຳອັນລ້ຳເລີດ, ທາດແທ້ແລະອຸດົມການຂອງພັກປປລາວຕະຫຼອດໄລຍະ 67ກວ່າປີຜ່ານມາ ແລະ ເຫັນໄດ້ຜົນງານການເຄື່ອນໄຫວການເຕີບໃຫຍ່ຂະຫຍາຍຕົວ ຂອງອົງການກວດກາ ແລະ ຜົນງານອັນໃຫຍ່ຫຼວງ ທີ່ເປັນໄຊຊະນະອັນຍິ່ງໃຫຍ່ ຂອງຄວາມສາມັກຄີ, ມິດຕະພາບ ແລະ ການຮ່ວມມືຮອບດ້ານ ຂອງສອງປະເທດ ລາວ - ຈີນ, ການສ້າງພື້ນຖານໂຄງລ່າງທາງດ້ານເສດຖະກິດ ທີ່ໝັ້ນຄົງ ທີ່ຕອບສະໜອງຍຸດທະສາດຫັນປະເທດ ຈາກບໍ່ມີຊາຍແດນຕິດກັບທະເລ ມາເປັນປະເທດເຊື່ອມຈອດກັບບັນດາພາກພື້ນ ແລະ ສາກົນ.

---