ຄະ​ນະ​ຜູ້​ແທນ​ຫ້ອງວ່າ​ການ​ສູນ​ກາງ​ພັກ ປ​ປ ລາວ ກັບ​ຄະ​ນະ​ຜູ້​ແທນ​ຫ້ອງວ່າ​ການ​ສູນ​ກາງ​ພັກ ​ກອມ​ມູ​ນິດ​ຫວຽດ​ນາມ​ ຈັດ​ກອງ​ປະ​ຊຸມ​ພົບ​ປະ​ທາງ​ໄກ

ເຜີຍ​ແຜ່​ໂດຍ​: admin ເວ​ລາ: 10/03/2022 16:22:32 ຈຳ​ນວນ​​ຢ້ຽມ​ຊົມ 507 ຄັ້ງ ​

ຄະນະ​ຜູ້​ແທນ​ຫ້ອງ​ວ່າ ການ​ສູນ​ກາງ​ພັກ ປປ ລາວ, ນໍາ​ໂດຍ ສະຫາຍ ທອງ​ສະ​ລິດ ມັງ​ໜໍ່​ເມກ  ຄະນະ​ເລຂາທິການ​ສູນ​ກາງ​ພັກ ຫົວໜ້າ​ຫ້ອງວ່າການ​ສູນ​ກາງ​ພັກ ພ້ອມ​ດ້ວຍ​ຄະນະ​ນຳ​ຫ້ອງ​ວ່າການ​ສູນ​ກາງ​ພັກ ໄດ້​ເຂົ້າ​ຮ່ວມ​ກອງ​ປະຊຸມ​ພົບ​ປະ​ທາງໄກ ກັບ ຄະນະ​ຜູ້​ແທນ​ຫ້ອງ​ວ່າການ​ສູນ​ກາງ​ພັກ​ກອມ​ມູ​ນິດ​ຫວຽດນາມ, ນໍາ​ໂດຍ ສະຫາຍ ເລ ມິງ ຮຶ່ງ  ຄະນະ​ເລຂາທິການ​ສູນ​ກາງ​ພັກ ຫົວໜ້າ​ຫ້ອງ​ວ່າ ການ​ສູນ​ກາງ​ພັກ​ກອມ​ມູ​ນິດ​ຫວຽດນາມ, ໃນ​ວັນ​ທີ  23 ມິ​ຖຸ​ນາ ນີ້,  ກອງ​ປະຊຸມ​ພົບ​ປະ​ທາງໄກ​ຄັ້ງ​ນີ້ ແມ່ນ​ມີ​ຄວາມ​ໝາຍຄວາມ​ສໍາ​ຄັນ​ພິເສດ, ເພາະ​ເປັນ​ຄັ້ງ​ທໍາ​ອິດ ທີ່​ສອງ​ສະຫາຍ​ຫົວໜ້າ​ຫ້ອງວ່າການ​ສູນ​ກາງ​ພັກ ໄດ້​ພົບ​ປະກັນ​ພາຍຫຼັງ​ທີ່​ໄດ້​ຮັບ​ດໍາ​ລົງ​ຕໍາ​ແໜ່ງ ຄະນະ​ເລຂາທິການ​ສູນ​ກາງ​ພັກ, ຫົວໜ້າ​ຫ້ອງວ່າ ການ​ສູນ​ກາງ​ພັກ ຂອງ​ທັງ​ສອງ​ພັກ; ກອງ​ປະຊຸມໄດ້ດໍາ​ເນີນ​ໄປ​ທ່າມກາງ​ບັນຍາກາດ​ແຫ່ງ​ໄມຕີ​ຈິດ​ມິດຕະພາບ ແລະ ຄວາມ​ສາມັກຄີ​ພິເສດຖານ​ເພື່ອນ​ມິດ​ສະຫາຍ​ອ້າຍ​ນ້ອງ ຮ່ວມອຸດົມ​ການ​ດຽວ​ກັນ. ຜ່ານ​ການ​ປຶກສາ​ຫາລື ທັງ​ສອງ​ຝ່າຍ​ຕີ​ລາຄາ​ສູງ​ຕໍ່​ຜົນສຳເລັດທີ່​ຍາດ​ມາ​ໄດ້ໃນ​ການ​ຮ່ວມ​ມື​ໄລຍະ​ທີ່​ຜ່ານ​ມາ ແລະ ວາງ​ແຜນການຮ່ວມ​ມື​ໃນຕໍ່ໜ້າ ໃນ​ການ​ຜັນ​ຂະຫຍາຍ​ຈັດ​ຕັ້ງ​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກ​ປະຊາຊົນ​ປະຕິວັດ​ລາວ ແລະ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XIII ຂອງ​ພັກ​ກອມ​ມູ​ນິດ​ຫວຽດນາມ ແລະ​ກະກຽມ​ລົງ​ນາມ​ເຊັນ ຂໍ້​ຕົກລົງ​ຮ່ວມ​ມື​ລະຫວ່າງ ສອງ​ຫ້ອງ​ວ່າການ​ສູນ​ກາງ​ພັກ ໄລຍະ​ປີ 2021-2025 ​ທີ່​ຈະ​ມາ​ເຖິງ  ຊຶ່ງ​ຈະ​ເປັນ​ການ​ປະກອບສ່ວນ​ອັນ​ສໍາ​ຄັນ​ໃຫ້​ແກ່​ການສືບ ຕໍ່​ເພີ່ມ​ພູນ​ຄູນ​ສ້າງ​ຄວາມ​ສາ ມັກຄີ​ອັນ​ຍິ່ງ​ໃຫຍ່, ສາຍ​ພົວພັນ​ແບບ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ ສອງ​ພັກ, ສອງ​ລັດ ແລະ ປະຊາຊົນ​ສອງ​ຊາດ ລາວ​-​ຫວຽດນາມ, ກໍຄື ສອງ​ຫ້ອງ​ວ່າການ​ສູນ​ກາງ​ພັກ ລາວ​-​ຫວຽດນາມ ໃຫ້​ໜັກ​ ແໜ້ນ​ເຂັ້ມແຂງ​ຕະຫຼອດ​ໄປ.

ຂ່າວ-ພາບ: ຫ້ອງວ່າ​ການ​ສູນ​ກາງ​ພັກ

---