ຫົວໜ້າຄະນະພົວພັນຕ່າງປະເທດສູນກາງພັກ ສົນທະນາທາງໂທລະສັບກັບ ທ່ານທູດອາແຊັກໄບຊານ

ເຜີຍ​ແຜ່​ໂດຍ​: admin ເວ​ລາ: 11/03/2022 15:23:46 ຈຳ​ນວນ​​ຢ້ຽມ​ຊົມ 549 ຄັ້ງ ​

ໃນວັນທີ 7 ທັນວາ 2021, ທີ່ສໍານັກງານຄະນະພົວພັນຕ່າງປະເທດສູນກາງພັກ, ທ່ານ ທອງສະຫວັນ ພົມວິຫານ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ສົນທະນາທາງໂທລະສັບກັບ ທ່ານ ອານາ ອິມມານອຟ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ອາແຊັກໄບຊານ ປະຈໍາ ສປປ ລາວ ທີ່ມີສໍານັກງານຕັ້ງຢູ່ນະຄອນຫຼວງຮ່າໂນ້ຍ ສສ ຫວຽດນາມ.

ທ່ານ ອານາ ອິມມານອຟ ໄດ້ສະແດງຄວາມຂອບໃຈມາຍັງການນໍາຂອງພັກ-ລັດ ສປປ ລາວ ກໍຄື ທ່ານຫົວໜ້າຄະນະພົວພັນຕ່າງປະເທດສູນກາງພັກ ທີ່ໄດ້ໃຫ້ການຮ່ວມມື, ສະໜັບສະໜູນ ແລະ ອໍານວຍຄວາມສະດວກໃນຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ ທີ່ໄດ້ຮັບຜົນສໍາເລັດອັນຈົບງາມ ແລະ ສືບຕໍ່ໃຫ້ການຮ່ວມມືໃນທຸກດ້ານ ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ - ອາແຊັກໄບຊານ ໃຫ້ເກີດດອກອອກຜົນຍິ່ງໆຂຶ້ນ.

ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສໍາເລັດໃນການປະຕິບັດໜ້າທີ່ຂອງທ່ານທູດຕະຫຼອດໄລຍະ 7 ກວ່າປີຜ່ານມາ ຊຶ່ງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ໃຫ້ມີຄວາມແໜ້ນແຟ້ນຍິ່ງໆຂຶ້ນ, ທັງເຊື່ອໝັ້ນວ່າໃນຕໍ່ໜ້າທ່ານທູດ ຈະສືບຕໍ່ສ້າງຄວາມຮັກແພງ ແລະ ປະກອບສ່ວນສະໜັບສະໜູນຕໍ່ ສປປ ລາວ ໃນການຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມື ລະຫວ່າງ ພັກອາແຊັກໄບຊານໃໝ່ ກັບ ພັກ ປປ ລາວ ກໍຄື ສອງປະເທດ ລາວ ແລະ ອາແຊັກ ໄບຊານ ໃຫ້ເປັນຮູບປະທໍາຫຼາຍຂຶ້ນ ເພື່ອຜົນປະໂຫຍດລວມຂອງປະຊາຊົນສອງຊາດ ເພື່ອສັນຕິພາບ, ມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ.

ໃນຕອນທ້າຍ, ທ່ານຫົວໜ້າຄະນະພົວພັນຕ່າງປະເທດສູນກາງພັກ ໄດ້ອວຍພອນໃຫ້ທ່ານທູດ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດທຸກປະການໃນໜ້າທີ່ວຽກງານອັນມີກຽດຂອງຕົນ.

ຂ່າວ-ພາບ: ຄຕພ

---