ຄະນະພົວພັນຕ່າງປະເທດສູນກາງພັກ

ຫົວໜ້າ ຄຕພ ຕ້ອນຮັບທູດຫວຽດນາມ ເຂົ້າອວຍພອນ ເນື່ອງໃນໂອກາດວັນຊາດຄົບຮອບ 46 ປີ

ເຜີຍແຜ່ໂດຍ: admin ເວລາ: 11/03/2022 15:07:42 ຈຳນວນຢ້ຽມຊົມ 569 ຄັ້ງ

ໃນຕອນບ່າຍວັນທີ 29 ພະຈິກ 2021 ທີ່ສຳນັກງານ ຄະນະພົວພັນຕ່າງປະເທດສູນກາງພັກ (ຄຕພ), ສະຫາຍ ທອງສະຫວັນ ພົມວິຫານ ກຳມະການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກປະຊາຊົນ ປະຕິວັດລາວ ໄດ້ຕ້ອນຮັບ ສະຫາຍ ຫງວຽນ ບ໋າ ຮຸ່ງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ ສັງຄົມນິຍົມຫວຽດນາມ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍອ້າຍນ້ອງພະນັກງານສະຖານທູດ ເຂົ້າອວຍພອນເນື່ອງໃນໂອກາດວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 46 ປີ.

ໃນໂອກາດດັ່ງກ່າວ ສະຫາຍ ຫງວຽນ ບ໋າ ຮຸ່ງ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຜົນສຳເລັດ ໃນການສ້າງສາພັດທະນາ ເສດຖະກິດ-ສັງຄົມ ຂອງປະຊາຊົນລາວອ້າຍນ້ອງ ຍາດມາໄດ້ຕະຫຼອດໄລຍະ 46 ປີ ຜ່ານມາ, ຊົມເຊີຍຜົນສຳເລັດ ກອງປະຊຸມຄົບຄະນະບໍລິຫານງານສູນກາງພັກ ປປ ລາວ ຄັ້ງທິ 3 ສະໄໝທີ XI ກໍຄືກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ທີ່ສຳເລັດລົງເມື່ອບໍ່ດົນຜ່ານມານີ້ ແລະ ການຮັບມືກັບການແຜ່ລະບາດພະຍາດ ໂຄວິດ-19 ໃນປັດຈຸບັນ ພາຍໃຕ້ການນຳພາອັນຖືກຕ້ອງ ແລະ ສະຫຼາດສ່ອງໃສ ຂອງພັກ ປະຊາຊົນ ປະຕິວັດລາວ ອັນໄດ້ເຮັດໃຫ້ ສປປ ລາວ ສືບຕໍ່ມີສະຖຽນລະພາບ ທາງດ້ານການເມືອງຢ່າງໜັກແໜ້ນ, ສັງຄົມມີຄວາມເປັນລະບຽບຮຽບຮ້ອຍ, ວຽກງານປ້ອງກັນຊາດ, ປ້ອງກັນຄວາມສະຫງົບມີຄວາມເຂັ້ມແຂງ, ຖານະບົດບາດ ແລະ ອິດທິພົນຂອງພັກ, ລັດ ສປປ ລາວ ສູງເດັ່ນໃນເວທີພາກພື້ນ ແລະ ສາກົນ.

ສະຫາຍ ທອງສະຫວັນ ພົມວິຫານ ໄດ້ສະແດງຄວາມຂອບໃຈ ຕໍ່ສະຫາຍ ຫງວຽນ ບ໋າ ຮຸ່ງ ທີ່ໄດ້ນຳພາຄະນະມາອວຍພອນ ເນື່ອງໃນໂອກາດ ວັນສະຖາປະນາ ສປປ ລາວ ຄົບຮອບ 46 ປີ ໃນຄັ້ງນີ້ ແລະ ສະແດງຄວາມຊົມເຊີຍຕໍ່ບັນດາຜົນສຳເລັດອັນໃຫຍ່ຫຼວງ ແລະ ຮອບດ້ານ ທີ່ປະຊາຊົນຫວຽດນາມອ້າຍນ້ອງຍາດມາໄດ້ ພາຍໃຕ້ການນຳພາອັນປີຊາສາມາດ ແລະ ສະຫຼາດສ່ອງໃສຂອງ ພັກກອມມູນິດຫວຽດນາມ, ໂດຍສະເພາະ ຜົນສຳເລັດໃນການສະກັດກັ້ນການແຜ່ລະບາດຂອງພະຍາດ ໂຄວິດ-19, ການສືບຕໍ່ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XIII ຂອງພັກ ເພື່ອນຳເອົາ ສສ ຫວຽດນາມ ກ້າວຂຶ້ນສູ່ທ່ວງທ່າໃໝ່ ທີ່ເຂັ້ມແຂງ ແລະ ໜັກແໜ້ນຮອບດ້ານ, ເຊື່ອໝັ້ນວ່າ ພາຍໃຕ້ການຊີ້ນຳ-ນຳພາອັນຖືກຕ້ອງ ແລະ ສະຫຼາດສ່ອງໃສຂອງພັກກອມມູນິດຫວຽດນາມ, ປະຊາຊົນຫວຽດນາມ ອ້າຍນ້ອງຈະສາມາດຍາດໄດ້ໄຊຊະນະໃໝ່ ໃຫຍ່ຫຼວງກວ່າເກົ່າ ໃນການປົກປັກຮັກສາ, ພັດທະນາ ແລະ ສ້າງສ້າງປະເທດຊາດ ກໍ່ຄືການຕໍ່ສູ້ຕ້ານ ແລະ ສະກັດກັ້ນການແຜ່ລະບາດຂອງພະຍາດ ໂຄວິດ-19 ຢູ່ ສສ ຫວຽດນາມ.

ສະຫາຍ ທອງສະຫວັນ ພົມວິຫານ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການປະກອບສ່ວນຂອງສະຖານທູດ, ໂດຍສະເພາະ ການປະກອບສ່ວນຂອງສະຫາຍທູດ ເຂົ້າໃນການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ລາວ-ຫວຽດນາມ ໃນໄລຍະການປະຕິບັດໜ້າທີ່ການທູດຢູ່ ສປປ ລາວ. ພ້ອມນັ້ນ, ສະຫາຍຍັງໄດ້ຕາງໜ້າ ພັກ, ລັດຖະບານ ກໍຄືປະຊາຊົນລາວບັນດາເຜົ່າ ສະແດງຄວາມຂອບໃຈ ແລະ ຮູ້ບຸນຄຸນ ຕໍ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການຊ່ວຍເຫຼືອອັນລ້ຳຄ່າ, ທັນການ ແລະ ມີປະສິທິຜົນ ແກ່ພາລະກິດຕໍ່ສູ່ປົດປ່ອຍຊາດໃນເມື່ອກ່ອນ ກໍຄືໃນພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດຂອງລາວ ໃນປັດຈຸບັນ, ໂດຍສະເພາະແມ່ນການຊ່ວຍເຫຼືອໃນການຮັບມື ຕ້ານການລະບາດຂອງພະຍາດ ໂຄວິດ - 19 ໃນປັດຈຸບັນ.

ສອງຝ່າຍ ໄດ້ຕີລາຄາສູງ ຕໍ່ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ໄດ້ຮັບການເສີມຂະຫຍາຍຢ່າງຮອບດ້ານ ແລະ ເຂົ້າສູ່ລວງເລິກໃນທຸກຂົງເຂດ, ຊຶ່ງການນຳຂັ້ນສູງຂອງສອງຝ່າຍ ໄດ້ມີການໄປມາຫາສູ່ກັນຢ່າງເປັນປະຈຳ, ການຮ່ວມມືກໍ່ສ້າງພະນັກງານ, ການແລກປ່ຽນບົດຮຽນທາງດ້ານທິດສະດີ-ພຶດຕິກຳ, ການພົວພັນຮ່ວມມືດ້ານເສດຖະກິດ, ການຄ້າ-ການລົງທຶນ, ສຶກສາ, ວັດທະນະທຳ-ທ່ອງທ່ຽວ ແລະ ອື່ນໆ ກໍໄດ້ຂະຫຍາຍຕົວເຂົ້າສູ່ລວງເລິກ ແລະ ນັບມື້ມີຄວາມໝາຍໜັກແໜ້ນເປັນກ້າວໆ.

ສອງຝ່າຍ ຍິນດີຈະສືບຕໍ່ປະສານສົມທົບກັນຢ່າງແໜ້ນແຟ້ນ ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ກັບສະຖານເອກອັກຄະລັດຖະທູດ ໃນການເປັນເສນາທິການໃຫ້ແກ່ ສອງສູນກາງພັກ ລາວ-ຫວຽດນາມ ແລະ ເປັນຂົວເຊື່ອມຕໍ່ອັນສຳຄັນ ໃນການປະກອບສ່ວນເຂົ້າໃນການ ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ຈະເລີນງອກງາມຍິ່ງໆຂຶ້ນ, ໂດຍສະເພາະ ຈະປະສານສົມທົບຢ່າງແໜ້ນແຟ້ນ ໃນການກະກຽມ ໃຫ້ແກ່ການພົບປະ ແລະ ຢ້ຽມຢາມ ລະຫວ່າງການນຳຂັ້ນສູງສອງພັກ ລາວ-ຫວຽດນາມ, ການຝຶກອົບຮົມພະນັກງານລາວ ແລະ ການສະເຫຼີມສະຫຼອງ ສອງວັນປະຫວັດສາດ ລາວ-ຫວຽດນາມ ໃນປີ 2022 ທີ່ຈະມາເຖິງນີ້.

ສະຫາຍ ທອງສະຫວັນ ພົມວິຫານ ໄດ້ອວຍພອນໃຫ້ ສະຫາຍທູດ ພ້ອມດ້ວຍຄະນະ ຈົ່ງປະສົບຜົນສຳເລັດໃນການເປັນຂົວເຊື່ອມຕໍ່ມິດຕະພາບທີ່ດີງາມ ລະຫວ່າງສອງພັກ, ສອງລັດ ລາວ-ຫວຽດນາມ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ໃຫ້ນັບມື້ນັບຫຼາຍຂຶ້ນ ກໍຄືເພື່ອສັນຕິພາບ, ມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ.

ຂ່າວ-ພາບ: ຄຕພ

ຂ່າວໃໝ່ລ່າສຸດ

ສະຫາຍ ຮັກສາການຫົວໜ້າ ຄຕພ ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ຮອງລັດຖະມົນຕີກະຊວງການຕ່າງປະເທດເວເນຊູເອລາ

20/12/2024 15:15:07

ຄະນະຜູ້ແທນ ຄະນະພົວພັນຕ່າງປະເທດສູນກາງພັກກອມມູນິດຈີນ ຢ້ຽມຢາມ ແລະ ເຮັດວຽກ ຢູ່ ສປປ ລາວ

19/12/2024 14:38:41

ຄະນະພົວພັນຕ່າງປະເທດສູນກາງພັກ ປາຖະກະຖາ ວັນຊາດທີ 02 ທັນວາ ຄົບຮອບ 49 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ

19/12/2024 14:27:24

ຄະນະຜູ້ແທນຂັ້ນສູງຂອງ ພັກ ປປ ລາວ ເຂົ້າຮ່ວມກອງປະຊຸມສໍາມະນາທິດສະດີ 2 ພັກ ລາວ-ຈີນ ຄັ້ງທີ 12 ຢູ່ ສປ ຈີນ

19/12/2024 14:00:44

ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ຕ້ອນຮັບການເຂົ້າ ຢ້ຽມຂໍ່ານັບຂອງເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ.

18/12/2024 15:37:57