ລາວ-ຫວຽດນາມ ເພີ່ມທະວີການຮ່ວມມື ດ້ານແຮງງານ ແລະ ສະຫວັດດີການສັງຄົມ ຄັ້ງທີ VII

ເຜີຍ​ແຜ່​ໂດຍ​: admin ເວ​ລາ: 11/03/2022 14:42:40 ຈຳ​ນວນ​​ຢ້ຽມ​ຊົມ 551 ຄັ້ງ ​

ກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມ (ຮສສ) ລາວ-ຫວຽດນາມ ຄັ້ງທີ VII ​ເປີດຂຶ້ນທີ່ນະຄອນຫຼວງວຽງຈັນ ໃນວັນທີ 2 ພະຈິກ 2021 ( ດ້ວຍຮູບແບບທາງໄກ ). ເພື່ອເປັນການເພີ່ມທະວີການຮ່ວມມືດ້ານແຮງງານ ແລະ ສະຫວັດດີການສັງຄົມ ຂອງສອງພັກ, ສອງລັດຖະບານ, ເວົ້າລວມ, ເວົ້າສະເພາະກໍຄື ສອງກະຊວງ ໃຫ້ນັບມື້ນັບເຕີບໃຫຍ່ຂະຫຍາຍຕົວ.

ກອງປະຊຸມດັ່ງກ່າວ, ດຳເນີນພາຍໃຕ້ການເປັນປະທານຮ່ວມຂອງ ທ່ານ ນາງ ໃບຄຳ ຂັດທິຍະ ກຳມະການສູນກາງ ພັກປະຊາຊົນ ປະຕິວັດລາວ ລັດຖະມົນຕີກະຊວງແຮງງານ ແລະ ສະຫວັດດີການສັງ (ຮສສ), ສປປ ລາວ ແລະ ທ່ານ ດາວ ຫງອກ ຢຸງ ກຳມະການສູນກາງ ພັກກອມມູນິດຫວຽດນາມ, ລັດຖະມົນຕີກະຊວງແຮງງານ-ເສຍອົງຄະ ແລະ ສັງຄົມ ແຫ່ງ ສສ ຫວຽດນາມ ໂດຍມີບັນດາຮອງລັດຖະມົນຕີ, ຄະນະນຳ ແລະ ພະນັກງານວິຊາການຂອງສອງກະຊວງດັ່ງກ່າວເຂົ້າຮ່ວມ.

ໂອກາດນີ້, ທ່ານ ນາງ ໃບຄຳ ຂັດທິຍະ ໄດ້ກ່າວວ່າ: ກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມ ລາວ ແລະ ຫວຽດນາມ ຄັ້ງນີ້ ມີຄວາມໝາຍສຳຄັນຍິ່ງ ທີ່ໄດ້ຈັດຂຶ້ນໃນທ່າມກາງບັນຍາກາດທີ່ ສະພາບການແຜ່ລະບາດຂອງພະຍາດ COVID-19 ຍັງສືບຕໍ່ສ້າງຄວາມສັບສົນຢູ່ສອງປະເທດ. ແນວໃດກໍຕາມ, ບົນພື້ນຖານສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຊຶ່ງໄດ້ຮັບການເສີມຂະຫຍາຍໃນທຸກຂົງເຂດວຽກງານ ອັນໄດ້ນໍາຜົນປະໂຫຍດມາສູ່ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ນັບມື້ນັບເພີ່ມຂຶ້ນ ໂດຍສະເພາະແມ່ນການຮ່ວມມືໃນດ້ານແຮງງານ ແລະ ສະຫວັດດີການສັງຄົມ ໃຫ້ນັບມື້ຫັນໄປສູ່ລວງເລິກ ແລະ ເປັນຮູບປະທໍາຫຼາຍຂຶ້ນ. ກອງປະຊຸມຄັ້ງນີ້ ມີຄວາມໝາຍຄວາມສໍາຄັນຢ່າງໃຫຍ່ຫຼວງ ໂດຍຈະໄດ້ທົບທວນຄືນການຮ່ວມມືຂອງສອງກະຊວງ ໃນການຈັດຕັ້ງປະຕິບັດເນື້ອໃນຂໍ້ຕົກລົງວ່າດ້ວຍການຮ່ວມມືໃນຂົງເຂດແຮງງານ ແລະ ສະຫວັດດີການສັງຄົມ ລາວ ແລະ ຫວຽດນາມ, ສັນຍາວ່າດ້ວຍການຮ່ວມມືດ້ານແຮງງານ ລາວ ແລະ ຫວຽດນາມ ແລະ ບົດບັນທຶກກອງປະຊຸມລັດຖະມົນຕີແຮງງານ ແລະ ສະຫວັດດີການສັງຄົມ ລາວ ແລະ ຫວຽດນາມ ຄັ້ງທີ VI ປີ 2019 ຜ່ານມາ, ພ້ອມທັງ ຈະໄດ້ວາງແຜນການຮ່ວມມືກັນໃນຕໍ່ໜ້າ ເພື່ອພ້ອມກັນເພີ່ມທະວີການຮ່ວມມືດ້ານແຮງງານ ແລະ ສະຫວັດດີການສັງຄົມ ຂອງສອງປະເທດ ລາວ ແລະ ຫວຽດນາມ ໃຫ້ນັບມື້ນັບເຕີບໃຫຍ່ຂະຫຍາຍຕົວ ແລະ ມີຜົນສຳເລັດຫຼາຍກ່ວາເກົ່າ. ພ້ອມດຽວກັນນັ້ນ, ກໍຍັງໄດ້ຮັບຟັງການລາຍງານຜົນຂອງກອງປະຊຸມວິຊາການຂອງຄະນະຜູ້ແທນສອງຝ່າຍ ຊຶ່ງໄດ້ປຶກສາຫາລື ແລະ ແລກປ່ຽນຄຳຄິດເຫັນ ກ່ຽວກັບຜົນສຳເລັດໃນການຮ່ວມມືດ້ານແຮງງານ ແລະ ສະຫວັດດີການສັງຄົມ ໃນໄລຍະ ປີ 2019-2021 ທີ່ຜ່ານມາ ແລະ ຜົນການປຶກສາຫາລື ກ່ຽວກັບເນື້ອໃນແຜນການຮ່ວມມື ໃຫ້ມີຄວາມຊັດເຈນ ແລະ ສາມາດນໍາໄປຈັດຕັ້ງປະຕິບັດ ໃຫ້ມີປະສິດທິຜົນດີຂຶ້ນ. ພ້ອມນີ້, ລັດຖະມົນຕີຂອງສອງກະຊວງ ໄດ້ເອກະພາບຕໍ່ເນື້ອໃນບົດລາຍງານຜົນສຳເລັດການຮ່ວມມື ດ້ານແຮງງານ ແລະ ສະຫວັດດີການສັງຄົມ ໄລຍະ 2019-2021 ແລະ ໄດ້ລົງນາມດ້ວຍຮູບແບບແລກປ່ຽນໃສ່ “ຂໍ້ຕົກລົງ ວ່າດ້ວຍການຮ່ວມມື ໃນຂົງເຂດແຮງງານ ແລະ ສະຫວັດດີການສັງຄົມ ລະຫວ່າງ ກະຊວງແຮງງານ ແລະ ສະຫວັດດີການສັງຄົມ ສປປ ລາວ ແລະ ກະຊວງແຮງງານ-ເສຍອົງຄະ ແລະ ສັງຄົມ ສສ ຫວຽດນາມ” ແລະ ແຜນການຮ່ວມມື ໄລຍະ 2021-2025, ໃນນັ້ນໄດ້ສຸມໃສ່ເນື້ອໃນດັ່ງລຸ່ມນີ້:

1. ສອງຝ່າຍ ສືບຕໍ່ຜັນຂະຫຍາຍ ສັນຍາວ່າດ້ວຍການຮ່ວມມືດ້ານແຮງງານ ລາວ-ຫວຽດນາມ ສະບັບເຊັນປີ 2013 ໃຫ້ມີປະສິດທິຜົນ; ເພີ່ມທະວີການເຜີຍແຜ່ຂໍ້ມູນເນື້ອໃນຂອງສັນຍາໃຫ້ກັບບັນດາຫົວໜ່ວຍທຸລະກິດ, ຜູ້ອອກແຮງງານ ແລະ ບັນດາແຂວງທີ່ມີຊາຍແດນຮ່ວມກັບ ລາວ-ຫວຽດນາມ; ເພີ່ມທະວີການແລກປ່ຽນຂໍ້ມູນຂ່າວ ສານກ່ຽວກັບຂໍ້ກຳນົດ, ກົດລະບຽບຂອງສອງປະເທດ ທີ່ພົວພັນເຖິງການຄຸ້ມຄອງແຮງງານຕ່າງປະເທດ; ຄະນະຮັບ ຜິດຊອບຮ່ວມ ລາວ ແລະ ຫວຽດນາມ ປະສານສົມທົບກັນຢ່າງໃກ້ຊິດ ໃນການປະຕິບັດສັນຍາວ່າດ້ວຍການຮ່ວມມືດ້ານແຮງງານ ລາວ-ຫວຽດນາມ ແລະ ຈະຜັດປ່ຽນກັນຈັດກອງປະຊຸມຕາມໄລຍະເວລາກຳນົດ.

2. ສອງຝ່າຍ ສືບຕໍ່ປະສານສົມທົບກັບກະຊວງປ້ອງກັນປະເທດ ແລະ ຂະແໜງການກ່ຽວຂ້ອງ ໃນການຊອກຫາ, ຂຸດຄົ້ນອັດຖິທະຫານ, ອາສາສະໝັກ ແລະ ຊ່ຽວຊານຫວຽດນາມ ທີ່ເສຍສະຫຼະຊີວິດຢູ່ແຜ່ນດິນລາວ ແລະ ທະຫານລາວ ທີ່ເສຍສະຫຼະຊີວິດຢູ່ຫວຽດນາມ ໃນປາງສົງຄາມ ເພື່ອໃຫ້ນຳກັບຄືນປະເທດ.

      3. ສອງຝ່າຍ ຈະສ້າງເງື່ອນໄຂໃນການຜັດປ່ຽນກັນແລກປ່ຽນຄະນະຜູ້ແທນ ກ່ຽວກັບວຽກງານແຮງງານ ແລະ ສັງຄົມ, ໃນນັ້ນ ມີວຽກງານນະໂຍບາຍຕໍ່ຜູ້ມີຜົນງານໃນພາລະກິດປະຕິວັດຂອງສອງປະເທດ ໂດຍຜ່ານການແລກປ່ຽນຄະນະຜູ້ແທນ ແລະ ຈັດກອງປະຊຸມ, ສຳມະນາ ລະຫວ່າງສອງກະຊວງ.

4. ສອງຝ່າຍ ຈະເພີ່ມທະວີການແລກປ່ຽນປະສົບການດ້ານວິຊາການ ແນໃສ່ການສະໜອງຂໍ້ມູນດ້ານກົດ   ໝາຍ, ນະໂຍບາຍດ້ານແຮງງານ ແລະ ສະຫວັດດີການສັງຄົມ, ຕະຫຼາດແຮງງານ, ການສ້າງທັກສະໃຫ້ແກ່ຖັນແຖວພະນັກງານຄູຝຶກວິຊາຊີບ ທີ່ເຂົ້າຮ່ວມການແຂ່ງຂັນສີມືແຮງງານອາຊຽນ ແລະ ຮັບຮູ້ສີມືຊຶ່ງກັນ ແລະ ກັນ ດ້ານສີມືແຮງງານ ແລະ ການພັດທະນາສີມືແຮງງານໃຫ້ຜູ້ອອກແຮງງານ, ການຈັດຫາງານ, ນະໂຍບາຍຄວາມປອດໄພແຮງງານ, ການກວດກາແຮງງານ, ປະກັນສັງຄົມ, ນະໂຍບາຍຕໍ່ຜູ້ທີ່ມີຜົນງານ, ນະໂຍບາຍຕໍ່ຜູ້ທຸກຍາກ, ແລະ ສັງຄົມສົງເຄາະ, ການຊ່ວຍເຫຼືອຜູ້ອາຍຸສູງ ແລະ ຜູ້ພິການ, ການຊ່ວຍເຫຼືອຜູ້ປະສົບໄພພິບັດທຳມະຊາດ, ພະຍາດລະບາດ, ການປົກປ້ອງ ແລະ ດູແລເດັກ; ຍົກສູງຄວາມສາມາດຂອງພະນັກງານ ດ້ານການສ້າງແຜນການ, ການບໍລິຫານຫ້ອງການ, ຂໍ້ມູນຂ່າວສານ, ໜັງສືພິມ; ເພີ່ມທະວີການແລກປ່ຽນຂໍ້ມູນ ແລະ ການປະສານງານ ຕໍ່ກັບບັນຫາການເຊື່ອມໂຍງສາກົນ ດ້ານແຮງງານ ແລະ ສັງຄົມ; ສົ່ງເສີມຊຸມຊົນ ດ້ານການປົກປ້ອງ ແລະ ດູແລເດັກ ໂດຍຜ່ານການຍົກລະດັບຄວາມຮູ້ຄວາມສາມາດໃຫ້ແກ່ພະນັກງານຂັ້ນທ້ອງຖິ່ນ; ການເຕີບໂຕສີຂຽວ ແລະ ການພັດທະນາແບບຍືນຍົງ

5. ສອງຝ່າຍ ສືບຕໍ່ຮ່ວມມືແຮກສ່ຽວ ຍົກລະດັບດ້ານເຕັກນິກວິຊາການ ລະຫວ່າງ ບັນດາສະຖານການຝຶກວິຊາຊີບ; ຮ່ວມມືແຮກສ່ຽວ ດ້ານເຕັກນິກວິຊາການ ລະຫວ່າງບັນດາຫົວໜ່ວຍວິສາຫະກິດຈັດຫາງານຂອງສອງຝ່າຍ ໃຫ້ມີປະສິດທິຜົນ;  ສອງຝ່າຍສະໜັບສະໜູນ ການປະສານສົມທົບ ແລະ ການຮ່ວມມື ລະຫວ່າງ ໂຮງໝໍສັນຍະກຳ ແລະ ຟື້ນຟູສະມັດຖະພາບ ດານັງ, ຫວຽດນາມ ແລະ ສູນອົງຄະທຽມ ແລະ ຟື້ນຟູສະມັດຖະພາບ 686 ບ້ານ       ເກິນ ລາວ.

6. ສອງຝ່າຍຊົມເຊີຍ ແລະ ຕີລາຄາສູງ ຕໍ່ການຊ່ວຍເຫຼືອດ້ານເຕັກນິກວິຊາການ ຂອງບັນດາມະຫາວິທະຍາ ໄລ, ສະຖານການຝຶກວິຊາຊີບ ທີ່ຂຶ້ນກັບກະຊວງແຮງງານ-ເສຍອົງຄະ ແລະ ສັງຄົມ ແລະ ບັນດາຫົວໜ່ວຍວິສາຫະກິດ ໃນຂົງເຂດບຳລຸງກໍ່ສ້າງ ແລະ ພັດທະນາສີມືແຮງງານ. ສອງຝ່າຍ ຈະສືບຕໍ່ເພີ່ມທະວີຮ່ວມມືໃນການຮັບນັກຮຽນ, ນັກສຶກສາໃນບັນດາຂົງເຂດທີ່ກ່ຽວຂ້ອງຢູ່ແຕ່ລະປະເທດ.

7. ສອງຝ່າຍ ຊຸກຍູ້ຂັ້ນທ້ອງຖິ່ນ ແລະ ອົງການທີ່ກ່ຽວຂ້ອງ ເພີ່ມທະວີການຮ່ວມມືແຮກສ່ຽວ, ເປີດກວ້າງການຮ່ວມມືໃນຂົງເຂດແຮງງານ, ການຈັດຫາງານ, ສະຫວັດດີການສັງຄົມ, ບຳລຸງກໍ່ສ້າງ ແລະ ພັດທະນາສີມືແຮງງານ. ໃນນັ້ນ, ມີການແລກປ່ຽນຂໍ້ມູນ, ການປະສານງານຢ່າງໃກ້ສິດ ກ່ຽວກັບວຽກງານການຄຸ້ມຄອງແຮງງານຫວຽດ ນາມທີ່ເຮັດວຽກຢູ່ລາວ ແລະ ແຮງງານລາວທີ່ເຮັດວຽກຢູ່ຫວຽດນາມ ໂດຍສະເພາະແມ່ນໃນສະພາບການລະບາດຂອງພະຍາດ COVID-19.

8. ສອງຝ່າຍ ສືບຕໍ່ຊຸກຍູ້ການຮ່ວມມື ບໍາລຸງສ້າງ, ຝຶຶກອົບຮົມ ໃຫ້ພະນັກງານ ໄລຍະສັ້ນ ແລະ ໄລຍະຍາວ; ບໍາລຸງ, ກໍ່ສ້າງຄູຝຶກວິຊາຊີບ ແລະ ຝຶກອົບຮົມວິຊາການ ແລະ ນັກແຂ່ງຂັນເຂົ້າຮ່ວມການແຂ່ງຂັນສີມືແຮງງານອາຊຽນ, ສະໜັບສະໜູນ ສປປ ລາວ ເພື່ອໃຫ້ກາຍເປັນສະມາຊິກຂອງການຈັດຕັ້ງສີມືແຮງານລະດັບໂລກ ເມື່ອມີຄວາມຕ້ອງການ; ນຳສະເໜີລັດຖະບານຂອງສອງປະເທດ ແລະ ຄະນະກຳມະການຮ່ວມມື ລາວ-ຫວຽດນາມ ເພື່ອສ້າງເງື່ອນໄຂໃຫ້ສອງກະຊວງໄດ້ຮັບທຶນຊ່ວຍເຫຼືອ ODA ຈາກລັດຖະບານຫວຽດນາມ ມອບໃຫ້ແກ່ລັດຖະບານລາວ ໃນແຕ່ລະປີ.

9. ສອງຝ່າຍ ສືບຕໍ່ແລກປ່ຽນກັນຢ່າງເປັນປົກກະຕິ ເພື່ອແນໃສ່ການຕີລາຄາບັນດາຜົນສໍາເລັດທີ່ຍາດມາໄດ້ ແລະ ແກ້ໄຂບັນຫາຂໍ້ຄົງຄ້າງ, ພ້ອມທັງລາຍງານລັດຖະບານຂອງສອງປະເທດຮັບຊາບ.

10. ສອງຝ່າຍ ຊຸກຍູ້ການຮ່ວມມື ດ້ານວຽກງານຄົ້ນຄວ້າກ່ຽວກັບແຮງງານ ແລະ ສະຫວັດດີການສັງຄົມ, ໂດຍສະເພາະບັນຫາທີ່ເກີດຂຶ້ນໃນສະພາບການແຜ່ລະບາດຂອງພະຍາດ COVID-19.

11. ກອງປະຊຸມລັດຖະມົນຕີ ແຮງງານ ແລະ ສະຫວັດດີການສັງຄົມ ລາວ-ຫວຽດນາມ ຄັ້ງທີ VIII ຈະໄດ້ຈັດຂຶ້ນ ຢູ່ທີ່ ສປປ ລາວ ໃນປີ 2023.

ຕອນທ້າຍ, ທ່ານ ນາງ ໃບຄຳ ຂັດທິຍະ ຍັງຕີລາຄາສູງ ຕໍ່ຜົນສຳເລັດໃນການຮ່ວມມື ທີ່ສອງກະຊວງຍາດມາໄດ້ໃນໄລຍະ 2 ປີ ຜ່ານມາ ແລະ ສະໜັບສະໜູນຕໍ່ແຜນການຮ່ວມມືໃນ 2 ປີ ຕໍ່ໜ້າ ເພື່ອສືບຕໍ່ເພີ່ມທະວີການວາງມາດຕະການໃນການຈັດຕັ້ງປະຕິບັດການຮ່ວມມືດ້ານແຮງງານ ແລະ ສະຫວັດດີການສັງຄົມ ຂອງສອງຝ່າຍ ໃຫ້ກ້ວາງຂວາງ, ມີປະສິດທິພາບ ແລະ ປະສິດທິຜົນຫຼາຍຂຶ້ນກວ່າເກົ່າ.

(ຂ່າວ-ພາບ: ນາງ ເພັດສະໄໝ )

---