ກອງບັນຊາການທະຫານເຂດ 4 ສສ ຫວຽດນາມ ມອບເງິນ 5 ຕື້ດົງ ໃຫ້ ສປປ ລາວ

ເຜີຍ​ແຜ່​ໂດຍ​: admin ເວ​ລາ: 11/03/2022 14:21:02 ຈຳ​ນວນ​​ຢ້ຽມ​ຊົມ 1181 ຄັ້ງ ​

ພິທີມອບ-ຮັບເງິນ ຈຳນວນ 5 ຕື້ດົງ ລະຫວ່າງ ກອງບັນຊາການທະຫານເຂດ 4 ສສ ຫວຽດນາມ ແລະ ກະຊວງປ້ອງກັນປະເທດ ແລະ 6 ແຂວງ ສປປ ລາວ ໄດ້ຈັດຂຶ້ນໃນວັນທີ 27 ຕຸລາຜ່ານ​ມານີ້ ທີ່ຫ້ອງປະຊຸມດ່ານສາກົນນໍ້າພາວ-ເກົາແຈວ, ຝ່າຍ ສປປ ລາວ ນຳໂດຍ ທ່ານ ພົຕ ຈັນທອງ ສອນຕະອາດ ຮອງລັດຖະມົນຕີ ວ່າການຫົວໜ້າກົມໃຫຍ່ເສນາທິການ ກະຊວງປ້ອງກັນປະເທດ, ຝ່າຍກອງບັນຊາການທະຫານເຂດ 4 ສສ ຫວຽດນາມ ນຳໂດຍທ່ານ ພົຕ ຫງວຽນຊວ້ານແອັງ ກຳມະການສູນກາງພັກ ຄະນະພັກການທະຫານສູນກາງ ຫົວໜ້າກອງບັນຊາການທະຫານເຂດ 4, ມີການນຳຈາກ 6 ແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

            ການມອບ​ເງິນ​ໃນຄັ້ງນີ້, ແມ່ນ​ໄດ້ມອບໃຫ້ກະຊວງປ້ອງກັນປະເທດ 2  ຕື້ດົງ, ມອບໃຫ້ແຂວງສາລະວັນ, ສະຫວັນນະເຂດ, ຄຳມ່ວນ, ບໍລິຄຳໄຊ, ຊຽງຂວາງ ແລະ ແຂວງໄຊສົມບູນ ແຂວງລະ 500 ລ້ານດົງ. ຮ່ວມລົງນາມເຊັນຮັບເງິນ​ດັ່ງ​ກ່າວ ຕາງ​ໜ້າກະຊວງປ້ອງກັນປະເທດ ໂດຍທ່ານ ພົຕ ຈັນທອງ ສອນຕະອາດ, ເຊັນມອບໂດຍທ່ານ ພົຕ ຫງວຽນຊວ້ານແອັງ. ເຊັນມອບເງິນໃຫ້ 6 ແຂວງໂດຍທ່ານ ພົວ ຮ່າເຕິນຕຽນ ຮອງຫົວໜ້າກອງບັນຊາການທະຫານເຂດ 4 ແລະ ຕາງ​ໜ້າ​ຈາກ 6 ແຂວງເຊັນ​ຮັບ.

ໂອກາດດັ່ງກ່າວນີ້, ທ່ານ ຄຳແຫວນ ປັນຍານຸວົງ ຮອງເຈົ້າແຂວງບໍລິຄຳໄຊ ຕາງໜ້າໃຫ້ຄະນະພັກ-ຄະນະປົກຄອງແຂວງ ຍັງໄດ້ເປັນກຽດມອບໃບກຽດຕິຄຸນຂອງແຂວງໃຫ້ກອງບັນຊາການທະຫານເຂດ 4 ສສຫວຽດນາມ ທີ່ມີຜົນງານດີເດັ່ນປະກອບສ່ວນເຂົ້າໃນການພັດທະນາແຂວງບໍລິຄຳໄຊ, ເງິນຈຳນວນ 5 ຕື້ດົງ ທີ່ກອງບັນຊາການທະຫານເຂດ 4 ສສ ຫວຽດນາມ ມອບໃຫ້ຄັ້ງນີ້, ແມ່ນ​ຈະ​ໄດ້ນຳໃຊ້ເຂົ້າໃນວຽກງານປ້ອງກັນ, ຄວບຄຸມ ແລະ ການແກ້ໄຂການລະບາດພະຍາດໂຄວິດ-19 ຢູ່ກົມກອງ ແລະ ບັນດາແຂວງຕ່າງໆ. ນອກນັ້ນຍັງເປັນການເສີມຂະຫຍາຍເພີ່ມພູນຄູນສ້າງສາຍພົວພັນມິດຕະພາບແບບພິເສດລະຫວ່າງ 2 ພັກ, 2 ລັດຖະບານ ແລະ ປະ​ຊາ​ຊົນ​ສອງ​ຊາດ ລາວ-ຫວຽດນາມ.

(ຂ່າວ-ພາບ: ສາຍສະໝອນ)

---