ຫົວໜ້າຄະນະພົວພັນຕ່າງປະເທດສູນກາງພັກ ພົບປະທາງໄກ ກັບ ເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ

ເຜີຍ​ແຜ່​ໂດຍ​: admin ເວ​ລາ: 10/03/2022 16:13:58 ຈຳ​ນວນ​​ຢ້ຽມ​ຊົມ 586 ຄັ້ງ ​

ໃນ​ວັນ​ທີ 16 ມິຖຸນາ 2021 ທີ່​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ (ຄ​ຕ​ພ), ສະຫາຍ ທອງ​ສະຫວັນ ພົມວິຫານ ​ກຳມະການ​ສູນ​ກາງ​ພັກ ຫົວໜ້າ​ຄະນະພົວພັນ​ຕ່າງປະ​ເທດສູນ​ກາງ​ພັກ ພ້ອມ​ດ້ວຍ​ຄະນະໄດ້​ພົບ​ປະ​ຜ່ານ​ວີ​ດີ​ໂອ​ທາງ​ໄກ ກັບ ສະຫາຍ ຮໍຣ​ເຮ ຫຼຸຍ ​ໂບຣ​ເຈ ລໍ​ເຣັງ​ໂຊ ​ເລຂາທິການ​ສູນ​ກາງ​ພັກ ຫົວໜ້າ​ຄະນະ​ສຶກສາ​ອົບຮົມ, ວິທະຍາສາດ ​ແລະ ກິລາ​ສູນ​ກາງ​ພັກ ຜູ້ຕາງໜ້າ​ພິ​ເສດ​ຂອງ​ ສະຫາຍ ມີ​ເກນ ​ດຽດສ ກາ​ເນນ ​ເລຂາທິການ​ທີໜຶ່ງ ຄະນະ​ບໍລິຫານ​ງານ​ສູນ​ກາງ​ພັກ​ກອມ​ມູນິດ​ກູ​ບາ ​ເພື່ອ​ແຈ້ງ​ຜົນສຳ​ເລັດ​ກອງ​ປະຊຸມ​ໃຫຍ່ ຄັ້ງ​ທີ VIII ຂອງ​ພັກ​ກອມ​ມູນິດ​ກູ​ບາ.

​ໃນ​ໂອກາດ​ດັ່ງກ່າວ, ສະຫາຍ ຮໍຣ​ເຮ ຫຼຸຍ ​ໂບຣ​ເຈ ລໍ​ເຣັງ​ໂຊ ໄດ້​​ແຈ້ງ​ໃຫ້​ຝ່າຍ​ລາວຊາບໂດຍ​ຫຍໍ້​ ກ່ຽວ​ກັບຜົນສຳ​ເລັດ​ຂອງ​ກອງ​ປະຊຸມ​ໃຫຍ່ ຄັ້ງ​ VIII ຂອງ​ພັກ​ກອມ​ມູນິດ​ກູ​ບາ ໂດຍ​ຍົກ​ໃຫ້​ເຫັນ​ເຖິງ​ຜົນສຳ​ເລັດຮອບດ້ານ​ ຂອງ​ພັກ, ລັດ ​ແລະ ປະຊາຊົນ​ກູ​ບາ ​ທີ່ຍາດ​ມາ​ໄດ້ໃນ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ​ ​ແລະ ນຳພາ​ປະ​ເທດກູ​ບາ ​ກ້າວ​ສູ່​ສັງຄົມ​ນິຍົມທີ່​ເຂັ້ມ​ແຂງ.

ສະຫາຍ ທອງ​ສະຫວັນ ພົມວິຫານ ​ໄດ້​ສະ​ແດງ​ຄວາມ​ຂອບ​ໃຈ ​ຕໍ່​ການ​ແຈ້ງ​ໃຫ້​ຊາບກ່ຽວ​ກັບ​ຜົນສຳ​ເລັດຂອງ​ກອງ​ປະຊຸມ​ໃຫຍ່ດັ່ງ​ກ່າວ. ພ້ອມ​ທັງ​ໄດ້​ຕີ​ລາຄາ​ສູງຕໍ່​ບົດບາດ​ການ​ນຳ​ ຂອງ​ພັກ​ກອມ​ມູນິດ​ກູ​ບາ ຕະຫຼອດ 60 ປີ ຜ່ານ​ມາ ຊຶ່ງ​ເປັນ​ແກນ​ກາງ​ໃນ​​ການເຕົ້າ​ໂຮມ​ຄວາມ​ສາມັກຄີ ​ແລະ ຊີ້​ນຳ​-ນຳພາ​ປະຊາຊົນ​ ກູ​ບາ​ອ້າຍ​ນ້ອງໃນ​ພາລະກິດ​ຕໍ່ສູ້​ເພື່ອ​ຄວາມ​ເປັນ​ເອກະລາດ​ແຫ່ງ​ຊາດ ກໍ່ຄື​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ​ ກ້າວ​ສູ່ສັງຄົມ​ນິຍົມ​ທີ່​ເຂັ້ມ​ແຂງອັນ​ໄດ້​ເຮັດ​ໃຫ້​ຊີ​ວິດ​ການ​ເປັນ​ຢູ່​ຂອງ​ປະຊາ ຊົນ​ກູ​ບາອ້າຍ​ນ້ອງ ​ໄດ້​ຮັບ​ການ​ປັບປຸງ​ດີ​ຂຶ້ນ ​ແລະ ບົດບາດ​ຂອງ​ສາທາລະນະ​ລັດ ກູ​ບາ​ ​ໄດ້​ຮັບ​ການເຊີດ​ຊູ​ນັບ​ມື້​ສູງຂຶ້ນ​ໃນ​ເວທີ​ພາກ​ພື້ນ ​ແລະ ສາກົນ.

ໃນ​ການ​ພົບ​ປະ​ຄັ້ງ​ນີ້, ສອງ​ຝ່າຍ​ໄດ້​ເປັນເອກະ​ພາບ​ກັນຕີ​ລາຄາ​ສູງ ​ຕໍ່​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມືທີ່​ເປັນ​ມູນ​ເຊື້ອ ລະຫວ່າງ​ ສອງ​ພັກ, ສອງ​ລັດ ​ແລະ ປະຊາຊົນສອງ​ຊາດ​ ລາວ-​ກູ​ບາ ໃນ​ໄລຍະ​ຜ່ານ​ມາ. ນອກ​ຈາກນັ້ນ, ຍັງ​ໄດ້ປຶກສາຫາລື ກ່ຽວກັບທິດທາງ​ໃນ​ຕໍ່ໜ້າ ​ເພື່ອ​ເສີມ​ຂະຫຍາຍ ​ສາຍ​ພົວພັນ​ມິດຕະພາບ ​ຖານ​ສະຫາຍ​ອ້າຍ​ນ້ອງ ທີ່​ມີ​ມາ​ແຕ່​ດົນ​ນານ​ ລະຫວ່າງສອງ​ພັກ ​ໃຫ້​ກ້າວ​ເຂົ້າ​ສູ່ ລວງ​ເລິກ​ຢ່າງ​ຕໍ່​ເນື່ອງ ​ເພື່ອນຳ​ເອົາ​ຜົນ​ປະ​ໂຫຍ​ດຕົວ​ຈິງມາສູ່​ປະຊາຊົນ​ສອງ​ຊາດ ລາວ-​ກູ​ບາ, ກູ​ບາ-​ລາວ. ພ້ອມທັງ​ໄດ້ແລກປ່ຽນທັດສະນະຕໍ່ສະພາບການພາກ​ພື້ນ ​ແລະ ​ສາກົນ ທີ່​ສອງ​ຝ່າຍ​ມີ​ຄວາມ​ສົນ​ໃຈຮ່ວມກັນ.

ໃນ​ຕອນ​ທ້າຍ, ສະຫາຍຫົວໜ້າ​ຄະນະພົວພັນ​ຕ່າງປະ​ເທດ​ສູນ​ກາງ​ພັກ ໄດ້​ຕາງໜ້າ​ໃຫ້​ພັກ, ລັດຖະ ບານ ​ແລະ ປະຊາຊົນລາວ​ບັນດາ​ເຜົ່າ ສະ​ແດງ​ຄວາມ​ຂອບ​ໃຈ​ ​ແລະ ຄວາມ​ຮູ້​ບຸນຄຸນເປັນ​ຢ່າງ​ສູງຕໍ່ພັກ, ລັດ ​ແລະ ປະຊາຊົນ​ກູ​ບາ​ອ້າຍ​ນ້ອງ ທີ່​ໃຫ້ການຊ່ວຍ​ເຫຼືອ ​ແລະ ​ສະໜັບສະໜູນຕະ​ຫຼອດ​ໄລຍະ​ຜ່ານ​ມາ ແລະ ໄດ້ອວຍພອນ​​ແກ່ພັກ, ລັດຖະບານ ​ແລະ ປະຊາຊົນ​ກູ​ບາ​ອ້າຍ​ນ້ອງ ຈົ່ງ​ສືບ​ຕໍ່​ຍາດ​ໄດ້ຜົນ​ສຳ​ເລັດ​ໃໝ່ ໃຫຍ່​ຫຼວງ​ກວ່າ​ເກົ່າ​ ໃນ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດ​ທະ​ນາປະ​ເທດ​ກູ​ບາ​ສັງຄົມ​ນິຍົມ​ທີ່​ເຂັ້ມ​ແຂງ ​ໂດຍ​ສະ​ເພາະແມ່ນ​ການຈັດ​ຕັ້ງ​ປະຕິບັດ​ ມະຕິ​ກອງ​ປະຊຸມ​ໃຫຍ່​ ຄັ້ງ​ທີ VIII ຂອງ​ພັກ​ກອມ​ມູນິດ​ກູ​ບາ ​ໃຫ້​ປະກົດ​ຜົນ​ເປັນ​ຈິງ.

ຂ່າວ-ພາບ: ນາງ​ແສງ​ຈັນ

---