ການສົ່ງມອບລົດໄຟ ລາວ-ຈີນ EMU ຂະບວນ “ລ້ານຊ້າງ” ເປັນຂີດໝາຍທີ່ລາວໄດ້ກ້າວເຂົ້າສູ່ຍຸກໃໝ່ແຫ່ງການພັດທະນາດ້ານການຂົນສົ່ງ
ເຜີຍແຜ່ໂດຍ: admin ເວລາ: 11/03/2022 14:00:38 ຈຳນວນຢ້ຽມຊົມ 467 ຄັ້ງ ໂດຍ: ຊີອາໄອ
ເມື່ອບໍ່ດົນມານີ້, ລົດໄຟລາວ-ຈີນ EMU ຂະບວນ “ລ້ານຊ້າງ” ໄດ້ເດີນທາງເຖິງນະຄອນຫຼວງວຽງຈັນ ຂອງ ສປປລາວ ແລ້ວ, ສອງຝ່າຍລາວ-ຈີນ ໄດ້ຈັດພິທີສົ່ງມອບລົດໄຟດັ່ງກ່າວຢູ່ສະຖານີລົດໄຟວຽງຈັນ.
ການອອກແບບ ແລະ ຜະລິດລົດໄຟ EMU ຂະບວນ “ລ້ານຊ້າງ” ແມ່ນສ່ວນປະກອບສຳຄັນຂອງການສ້າງທາງລົດໄຟລາວ-ຈີນ ຊຶ່ງໄດ້ຮັບຄວາມເອົາໃຈໃສ່ໃນລະດັບສູງຈາກພັກແລະ ລັດຖະບານລາວ, ທ່ານ ທອງລຸນ ສິສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ ໄດ້ຊີ້ນຳ ແລະ ກວດກາແຜນການອອກແບບດ້ວຍຕົນເອງ, ທ່ານ ພັນຄຳ ວິພາວັນ ນາຍົກລັດຖະມົນຕີລາວກໍໄດ້ຕັ້ງຊື່ໃຫ້ລົດໄຟ EMU ວ່າ: ຂະບວນ “ລ້ານຊ້າງ” ຊຶ່ງແມ່ນຜົນງານການປະສານສົມທົບກັນທາງດ້ານສະຕິປັນຍາ ແລະ ຄວາມພະຍາຍາມຂອງປະຊາຊົນທັງສອງປະເທດ, ທັງຈະກາຍເປັນຂີດໝາຍທີ່ປະຊາຊົນລາວຈະນຳພາປະເທດຊາດໄປສູ່ຄວາມຮັ່ງມີຂຶ້ນທັງແມ່ນການສະແຫວງຫາຊີວິດການເປັນຢູ່ທີ່ດີງາມ. ການສົ່ງມອບລົດໄຟ EMU ຢ່າງເປັນທາງການເປັນຂີດໝາຍສະແດງໃຫ້ເຫັນວ່າ: ທາງລົດໄຟລາວ-ຈີນ ຈາກໄລຍະກໍ່ສ້າງພວມກ້າວໄປສູ່ໄລຍະເປີດບໍລິການ, ເປັນການປະກາດໃຫ້ຮູ້ວ່າ: ສປປ ລາວ ກຳລັງກ້າວເຂົ້າສູ່ຍຸກສະໄໝແຫ່ງການຂົນສົ່ງດ້ວຍທາງລົດໄຟ, ປະຊາຊົນລາວຈະພົບກັບຍຸກສະໄໝໃໝ່ແຫ່ງການປ່ຽນແປງດ້ານການຂົນສົ່ງ.
ປະເທດລາວມີຊັບພະຍາກອນບໍ່ແຮ່ອັນອຸດົມສົມບູນ, ແຕ່ຍ້ອນວ່າການຄົມມະນາຄົມຍັງຢູ່ໃນໄລຍະການພັດທະນາ, ສະນັ້ນ, ເສດຖະກິດຂອງລາວໃນຫຼາຍປີຜ່ານມາຈຶ່ງຖືເອົາກະສິກຳເປັນຕົ້ນຕໍ. ສຳລັບປະເທດລາວ ຊຶ່ງເປັນປະເທດບໍ່ຕິດຈອດກັບທະເລ, ຖ້າມີທາງລົດໄຟສາຍໜຶ່ງທີ່ສາມາດເຊື່ອມຕໍ່ກັບປະເທດອື່ນໄດ້ ກໍຈະສາມາດຊຸກຍູ້ການຄ້າກັບຕ່າງໄດ້ຢ່າງຫຼວງ ຫຼາຍ, ສະນັ້ນ ໃນແຜນການພັດທະນາເສດຖະກິດສັງຄົມແຫ່ງຊາດ 5 ປີ ຄັ້ງທີ VIII ຂອງລາວ, ທາງລົດໄຟລາວ-ຈີນ ໄດ້ຖືກຈັດເຂົ້າເປັນໂຄງການສຳຄັນຂອງຊາດໂຄງການໜຶ່ງ.
ພາຍໃຕ້ການນຳພາທີ່ເຂັ້ມແຂງຂອງຜູ້ນຳທັງສອງປະເທດລາວ-ຈີນ, ພາຍໃຕ້ຄວາມເອົາໃຈໃສ່ ແລະ ການວາງແຜນການໂດຍກົງຂອງຜູ້ນຳສູງສຸດຂອງທັງສອງປະເທດ, ການສ້າງທາງລົດໄຟລາວຈີນສາມາດຜ່ານຜ່າຄວາມຫຍຸ້ງຍາກໄດ້ ແລະ ກ້າວໄປຂ້າງໜ້າພາຍໃຕ້ສະພາບການຂອງການແຜ່ລະບາດຂອງພະຍາດໂຄວິດ-19 ແລະ ໄດ້ຮັບຜົນງານທີ່ປະຈັກຕາຊາວໂລກ. ໂດຍຜ່ານການກໍ່ສ້າງເປັນເວລາ 5 ປີ, ປະເທດລາວໄດ້ຕ້ອນຮັບການມາເຖິງຂອງລົດໄຟທີ່ທັນສະໄໝຂະບວນທຳອິດທີ່ຂຶ້ນກັບປະເທດຕົນໃນປະຫວັດສາດຂອງຊາດ. ນີ້ແມ່ນຄວາມຄືບໜ້າທີ່ມີລັກສະນະຕັດສິນໃນຂະບວນການກໍ່ສ້າງທາງລົດໄຟລາວ-ຈີນ, ທັງເປັນໝາກຜົນຕົວຈິງທີ່ເປັນສັນຍາລັກໃນໂຄງການເຊື່ອມຕໍ່ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຂອງຈີນກັບຍຸດທະສາດຫັນຈາກປະເທດທີ່ບໍ່ມີທາງອອກສູ່ທະເລເປັນປະເທດເຊື່ອມໂຍງເຊື່ອມຈອດຂອງລາວ ຊຶ່ງໄດ້ສ້າງພື້ນຖານອັນໝັ້ນແກ່ນໃຫ້ແກ່ທາງລົດໄຟລາວ-ຈີນ ທີ່ຈະເປີດບໍລິການໃນວັນທີ 2 ທັນວາ ທີ່ຈະມາເຖິງນີ້ຊຶ່ງພໍດີເປັນວັນຊາດຂອງ ສປປ ລາວ.
ໃນພິທີເປີດກອງປະຊຸມວຽກງານຄົມມະນາຄົມແບບຍືນຍົງທົ່ວໂລກຂອງອົງການສະຫະປະຊາຊາດສະໄໝທີ່ສອງທີ່ຈັດຂຶ້ນໃນເມື່ອບໍ່ດົນມານີ້, ທ່ານ ສີຈິ້ນຜິງ ປະທານປະເທດຈີນໄດ້ກ່າວຄຳປາໄສໂດຍສະເໜີວ່າ: ຄວນເສີມຂະຫຍາຍບົດບາດນຳໜ້າໃນວຽກງານຄົມມະນາຄົມ, ນີ້ກໍເປັນທິດນຳໃຫ້ແກ່ວຽກງານການເຄື່ອນໄຫວຂອງທາງລົດໄຟລາວ-ຈີນ.
ກໍຄືດັ່ງຄວາມເວົ້າຂອງທ່ານ ຈ່ຽງຈ່າຍຕຸງ ເອກອັກຄະລັດຖະທູດ ສປ ຈີນ ປະຈຳ ສປປ ລາວ ທີ່ກ່າວໃນພິທີສົ່ງ-ມອບຂະບວນລົດໄຟລາວ-ຈີນ EMU ຂະບວນລ້ານຊ້າງວ່າ: ໃນໄລຍະ 5 ປີທີ່ກໍ່ສ້າງທາງລົດໄຟລາວ-ຈີນ, ໄດ້ສ້າງໂອກາດວຽກເຮັດງານທຳໃຫ້ປະຊາຊົນລາວໄດ້ຫຼາຍກວ່າ 1 ແສນ 1 ໝື່ນກວ່າຕຳແໜ່ງງານ, ຊ່ວຍເຫຼືອຊາວບ້ານທີ່ຢູ່ລຽບຕາມທາງລົດໄຟລາວ-ຈີນສ້າງເສັ້ນທາງ ແລະ ສ້າງຮ່ອງລະບາຍນ້ຳຍາວປະມານ 2000 ກິໂລແມັດ, ໃນຂະບວນການພັດທະນາ ແລະ ການເຄື່ອນໄຫວໄລຍະຕໍ່ໄປ, ສອງຝ່າຍຄວນສືບຕໍ່ສ້າງຜົນປະໂຫຍດທີ່ປະຈັກຕາ ແລະ ແຕະຕ້ອງໄດ້ໃຫ້ຫຼາຍກວ່າເກົ່າໃຫ້ກັບປະຊາຊົນທົ່ວໄປ, ຊຸກຍູ້ການຮ່ວມມື “ໜຶ່ງແລວໜຶ່ງເສັ້ນທາງ” ແລະ ການສ້າງປະຊາຄົມຮ່ວມຊາຕາກຳ ຈີນ-ລາວ ຢ່າງແທ້ຈິງ.
ໃນໂອກາດເຂົ້າຮ່ວມພິທີສົ່ງມອບຂະບວນລົດໄຟລາວ-ຈີນດັ່ງກ່າວ, ທ່ານ ວຽງສະຫວັດ ສີພັນດອນ ລັດຖະມົນຕີຊວງກະທາທິການ ແລະ ຂົນສົ່ງໄດ້ຕີລາຄາສູງຕໍ່ທາງລົດໄຟລາວ-ຈີນ. ທ່ານກ່າວວ່າ: ເມື່ອທາງລົດໄຟລາວ-ຈີນ ສ້າງສຳເລັດ ແລະ ເປີດບໍລິການແລ້ວ, ກໍຖືວ່າຜູ້ກໍ່ສ້າງທັງຫຼາຍໄດ້ຢືນຢັນຄຳໝັ້ນສັນຍາທີ່ສວຍງາມໃຫ້ແກ່ພັກ, ລັດ ແລະ ປະຊາຊົນທັງສອງປະເທດ. ລາວຈະພະຍາຍາມຮ່ວມກັນກັບຈີນ, ຢືນຢູ່ບົນຈິດໃຈການສ້າງປະຊາຄົມຮ່ວມຊາຕາກຳລາວ-ຈີນ, ສ້າງທາງລົດໄຟລາວ-ຈີນ ໃຫ້ເປັນໂຄງການລັກສະນະແຫ່ງມິດຕະພາບ, ສ້າງຄວາມຜາສຸກໃຫ້ແກ່ປະຊາຊົນທັງສອງປະເທດ.
ໃນໄລຍະ 5 ປີທີ່ສ້າງທາງລົດໄຟລາວ-ຈີນ, ໄດ້ສ້າງຜົນປະໂຫຍດຢ່າງແທ້ຈິງໃຫ້ແກ່ປະຊາຊົນຢູ່ລຽບຕາມທາງລົດໄຟ. ເຊື່ອວ່າ, ຄຽງຄູ່ກັບທາງລົດໄຟລາວ-ຈີນ ເປີດບໍລິການໃນວັນທີ 2 ທັນວານີ້ຢ່າງເປັນທາງການ, ການຮ່ວມມືເສດຖະກິດການຄ້າລະຫວ່າງລາວ-ຈີນ ຈະພັດທະນາຢ່າງຮອບດ້ານ ແລະ ໂຄງການກໍ່ສ້າງສຳຄັນຕ່າງໆໄດ້ຮັບການຈັດຕັ້ງປະຕິບັດຕົວຈິງເປັນກ້າວໆ, ພາບອະນາຄົດຂອງການຮ່ວມມືພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຈະກວ້າງຂວາງ ແລະ ສວຍງາມກວ່າເກົ່າ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20