ຜູ້​ປະ​ຈຳ​ການ​ຄະ​ນະ​ເລ​ຂາ​ທິ​ການ​ສູນ​ກາງ​ພັກລາວ-​ຫວຽດ​ນາມ ພົບ​ປະ​ທາງ​ໄກ

ເຜີຍ​ແຜ່​ໂດຍ​: admin ເວ​ລາ: 11/03/2022 13:43:49 ຈຳ​ນວນ​​ຢ້ຽມ​ຊົມ 419 ຄັ້ງ ​

ໃນ​ຕອນ​ບ່າຍ​ວັນ​ທີ 15 ຕຸ​ລາ 2021, ສະ​ຫາຍ ບຸນ​ທອງ​ ຈິດມ​ະ​ນີ ກຳ​ມະ​ການ​ກົມ​ການ​ເມືອງສູນກາງພັກ ຜູ້​ປະ​​ຈຳ​ການ​ຄະ​ນ​ະ​ເລ​ຂາ​ທິ​ການ​ສູນ​ກາງ​ພັກ ປປ ລາວ ຮອງ​ປະ​ທານ​ປະ​ເທດ ແຫ່ງ ສ​ປ​ປ​ ລາວ​ ໄດ້ເຂົ້າ​ຮ່ວມກອງ​ປະ​ຊຸມ​ພົບ​ປະ​​ທາງ​ໄກ​ກັບ ສະ​ຫາຍ ຫວໍວັນເຖືອງ ກຳ​ມະ​ການ​ກົມ​ການ​ເມືອງສູນກາງພັກ ຜູ້​ປະ​ຈຳ​ການ​ຄະ​ນະ​ເລ​ຂາ​ທິ​ການ​ສູນ​ກາງ​ພັກກອມ​ມູ​ນິດ​ຫວຽດ​ນາມ ຊຶ່ງເຂົ້າ​ຮ່ວມ​ໃນ​ກອງ​ປະ​ຊຸມ​ຄັ້ງ​ນີ້ຍັງ​ມີບັນ​ດາ​ສະ​ຫາຍຄະນະນໍາຂອງ​ບັນ​ດາ​ສຳ​ນັກງານ​ອ້ອມ​ຂ້າງ​ສູນ​ກາງ​ພັກ, ສະ​ຖາ​ບັນ, ກະ​ຊວງ, ອົງ​ການ​ທີ່ກ່ຽວ​ຂ້ອງຂອງ​ສອງ​ຝ່າຍ ​ລາວ-ຫວຽດ​ນາມ ແລະ ເອກ​ອັກ​ຄະ​ລັດ​ຖະ​ທູດ​ຂອງ​ສອງ​ປະ​ເທດ​ເຂົ້າ​ຮ່ວມ.

ກອງປະຊຸມຄັ້ງນີ້, ສອງຝ່າຍໄດ້ແລກປ່ຽນສະພາບການພົ້ນເດັ່ນຂອງແຕ່ລະພັກ, ແຕ່ລະປະເທດ ກໍຄືສະພາບການພັດທະນາເສດຖະກິດ-ສັງຄົມ ແລະ ມາດຕະການຮັບມືກັບການແຜ່ລະບາດຂອງ ພະຍາດໂຄວິດ-19 ຢູ່ລາວ ແລະ ຫວຽດນາມໃນປປັດຈຸ​ບັນ; ຕີລາຄາສະພາບການຮ່ວມມື ລະຫວ່າງສອງພັກ, ສອງປະເທດ ໃນໄລຍະຜ່ານມາ, ວາງທິດທາງການຮ່ວມມືໃນຕໍ່ໜ້າ ທີ່ພົວພັນເຖິງການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ ເຂົ້າໃນຊີວິດສັງຄົມຕົວຈິງຢ່າງເປັນຂະບວນຟົດຟື້ນ ແລະ ຊຸກຍູ້ການປະຕິບັດບັນດາບົດບັນທຶກຂອງການນໍາຂັ້ນສູງຂອງສອງພັກ, ສອງປະເທດ ໃຫ້ມີປະສິດທິຜົນສູງກວ່າເກົ່າ. ພ້ອມນັ້ນ, ສອງຝ່າຍ ຍັງໄດ້ແລກປ່ຽນບົດຮຽນນໍາກັນໃນວຽກງານກໍ່ສ້າງພັກ, ວຽກງານການຕ້ານ-ສະກັດກັ້ນການສໍ້ລາດບັງຫຼວງ ແລະ ວຽກງານການຕິດຕາມ, ກວດກາ ແລະ ການລົງວິໄນພັກ.

ສອງຝ່າຍ ໄດ້ປຶກສາຫາລືເປັນເອກະພາບກັນ ເພື່ອກະກຽມບັນດາກິດຈະກໍາຕ່າງໆໃນການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ກໍຄືສະເຫຼີມສະຫຼອງວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ໃນປີ 2022, ໂດຍອີງໃສ່ສະພາບການລະບາດຂອງພະຍາດໂຄວິດ-19 ໃນ​ປັດຈຸບັນ, ບັນດາກິດຈະກໍາດັ່ງກ່າວ ແມ່ນຈະດໍາເນີນໄປໃນຫຼາຍຮູບແບບລວມທັງການຈັດທາງອອນລາຍ ເພື່ອສະເຫຼີມສະຫຼອງສອງວັນປະຫວັດສາດດັ່ງກ່າວໃຫ້ມີບັນຍາກາດຄຶກຄື້ນ ແລະ ມີເນື້ອໃນເພື່ອສ້າງຄວາມເຂົ້າໃຈໃຫ້ແກ່ຄົນຮຸ່ນໜຸ່ມຂອງສອງຊາດ ກໍຄື ສາກົນ ໄດ້ຮັບຮູ້ມູນເຊື້ອສາມັກຄີພິເສດອັນຍິ່ງໃຫຍ່ ໜຶ່ງບໍ່ມີສອງໃນໂລກ. ສອງຝ່າຍ ຍິນດີສືບຕໍ່ປະສານສົມທົບກັນຢ່າງແໜ້ນແຟ້ນໃນພາລະກິດ​ປົກປັກ​ຮັກສາ ​ແລະ ​ເພີ່ມ​ພູນ​ຄູນ​ສ້າງສາ​ຍພົວພັນ​ມິດຕະພາບ​ອັນ​ຍິ່ງ​ໃຫຍ່​, ຄວາມ​ສາ​ມັກ​ຄີ​ແບບ​ພິ​ເສດ ແລະ ການຮ່ວມມືຮອບດ້ານ​ລາວ -  ຫວຽດນາມ ​ໃຫ້​ນັບ​ມື້ໄດ້​ຮັບ​ການ​ເສີມ​ຂະຫຍາຍ​ເຂົ້າ​ສູ່​ລວງ​​ເລິກ, ແທດ​ຕົວ​ຈິງ ແລະ ມີ​ປະ​ສິດ​ທິ​ຜົນ, ​ເພື່ອ​ຜົນ​ປະ​ໂຫຍດ​ຂອງ​ປະ​ຊາ​ຊົນ​ສອງ​ຊາດ, ເພື່ອ​ສັນ​ຕິ​ພາບ, ມິດຕະພາບ,ການ​ຮ່ວມ​ມື ແລະ ພັດ​ທະ​ນາ​ໃນ​ພາກ​ພື້ນ ແລະ ໃນ​ໂລກ. ​

ກອງປະຊຸມພົບປະທາງໄກຄັ້ງນີ້ ເປັນຄັ້ງທໍາອິດພາຍຫຼັງທີ່ໄດ້ສໍາເລັດກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ, ເປັນກົນໄກ​ໜຶ່ງ ເພື່ອເພີ່ມທະວີການຮ່ວມມື ແລະ ແລກປ່ຽນບົດຮຽນຂອງສອງຝ່າຍ ໃນສະພາບການໃໝ່.

ຂ່າວ: ຄ​ຕ​ພ, ພາບ: ພູ​ວຽງ​ຄຳ

---