ປຶກສາຫາລື ແລະ ເຜີຍແຜ່ເອກະສານກ່ຽວກັບການສະເຫຼີມສະຫຼອງ ປີສາມັກຄີມິດຕະພາບລາວ-ຫວຽດນາມ ປີ 2022

ເຜີຍ​ແຜ່​ໂດຍ​: admin ເວ​ລາ: 10/03/2022 15:19:05 ຈຳ​ນວນ​​ຢ້ຽມ​ຊົມ 398 ຄັ້ງ ​

ກອງປະຊຸມປຶກສາຫາລື ແລະ ເຜີຍແຜ່ເອກະສານກ່ຽວກັບການສະເຫຼີມສະຫຼອງ ປີສາມັກຄີມິດຕະພາບລາວ-ຫວຽດນາມ ປີ 2022ໄດ້​ຈັດ​ຂຶ້ນ​ໃນ​ວັນ​ທີ 4 ມີ​ນາ​ຜ່ານ​ມາ​ທີ່​ຫ້ອງວ່າ​ການ​ສູນ​ກາງ​ພັກພາຍໃຕ້ການເປັນປະທານຂອງ ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ ຫົວໜ້າຄະນະຊີ້ນຳລະດັບຊາດການສະເຫຼີມສະຫຼອງ ປີສາມັກຄີມິດຕະພາບລາວ-ຫວຽດນາມ ປີ 2022ໂດຍມີບັນດາສະຫາຍກົມການເມືອງ, ຄະນະເລຂາທິການສູນກາງພັກ,ຄະນະຊີ້ນຳລະດັບຊາດການສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ, ເລຂາຄະນະບໍລິຫານພັກກະຊວງ, ອົງການ, ນະຄອນຫຼວງວຽງຈັນ ແລະ ບັນດາແຂວງ ແລະພາກ​ສ່ວນ​ກ່ຽວ​ຂ້ອງ​ເຂົ້າ​ຮ່ວມ.

ກອງປະຊຸມໄດ້ຮັບຟັງການລາຍງານ: 1. ມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງຄະນະຊີ້ນຳລະດັບຊາດ ເພື່ອສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ ປີ 2022 ແລະ ມະຕິຕົກລົງຂອງຄະນະຊີ້ນຳລະດັບຊາດ ວ່າດ້ວຍການແຕ່ງຕັ້ງຄະນະຊ່ວຍວຽກຄະນະຊີ້ນຳລະດັບຊາດ ເພື່ອສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022, 2. ແຜນການຈັດຕັ້ງປະຕິບັດການສະເຫຼີມສະຫຼອງປີສາມັກຄີມິດຕະພາບ ລາວ-ຫວຽດນາມ ປີ 2022,3. ຜົນກອງປະຊຸມພົບປະສອງກົມການເມືອງ ລາວ-ຫວຽດນາມ ປີ 2022ແລະ 4.ຜົນສຳເລັດກອງປະຊຸມ ຄັ້ງທີ 44 ຂອງຄະນະກຳມະການຮ່ວມມືທະວິພາຄີ ລະຫວ່າງສອງລັດຖະບານ ລາວ-ຫວຽດນາມ.

ໃນໂອກາດນີ້,ສະຫາຍ ບຸນທອງ ຈິດມະນີໄດ້ໃຫ້ທິດຊີ້ນຳກ່ຽວກັບ ການສະເຫຼີມສະຫຼອງ ປີສາມັກຄີມິດຕະພາບ ລາວ-ຫວຽດນາມ ປີ 2022 ດັ່ງນີ້:

1) ໃຫ້ບັນດາກະຊວງ, ອົງການ ແລະ ທ້ອງຖິ່ນ ສືບຕໍ່ຈັດຕັ້ງຜັນຂະຫຍາຍເຜີຍແຜ່ ບັນດາຜົນສຳເລັດ ກໍຄືຜົນການພົບປະລະຫວ່າງ ສອງກົມການເມືອງສູນກາງພັກ ລາວ-ຫວຽດນາມ, ກອງປະຊຸມ ຄັ້ງທີ 44 ຂອງຄະນະກໍາມະການຮ່ວມມືທະວິພາຄີ ລະຫວ່າງ ລັດຖະບານແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ລັດຖະບານ ແຫ່ງສາທາລະນະລັດ ສັງຄົມນິຍົມຫວຽດນາມ ໂດຍຫັນເປັນໂຄງການ, ກິດຈະກຳລະອຽດ ໃນຂົງເຂດວຽກງານຂະແໜງການ ແລະ ທ້ອງຖິ່ນຂອງຕົນ, ບົນພື້ນຖານແທດກັບຕົວຈິງ ແລະ ຕັ້ງໜ້ານຳພາປະຕິບັດຕົວຈິງ ບົນຈິດໃຈບຸກບືນແຂ່ງຂັນສູ້ຊົນປະຕິບັດດ້ວຍຄວາມຮັບຜິດຊອບສູງ ທັງຮັບປະກັນໃຫ້ມີຄວາມວ່ອງໄວທັນການ ແລະ ມີປະສິດທິຜົນ.

2) ໃຫ້ຄະນະພັກແຕ່ລະຂັ້ນ ສືບຕໍ່ນໍາພາສຶກສາອົບຮົມການເມືອງແນວຄິດ ໃຫ້ສະມາຊິກພັກ, ພະນັກງານ, ທະຫານ, ຕໍາຫຼວດ ແລະ ປະຊາຊົນຊັ້ນຄົນຕ່າງໆ ຮັບຮູ້, ເຂົ້າໃຈຕໍ່ກັບສອງວັນປະຫວັດສາດທີ່ມີຄວາມໝາຍສໍາຄັນຫຼາຍສໍາລັບ ສອງພັກ-ສອງລັດ ກໍຄື ສອງຊາດ ລາວ-ຫວຽດນາມ ທັງເປັນການຫວນຄືນມູນເຊື້ອແຫ່ງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ນັບແຕ່ພາລະກິດ ຕໍ່ສູ້ປົດປ່ອຍຊາດໃນເມື່ອກ່ອນ ແລະ ການສ້າງສາພັດທະນາໃນປັດຈຸບັນ ເພື່ອໃຫ້ທຸກເປົ້າໝາຍໃນທົ່ວສັງຄົມ ເປັນຕົ້ນ ພະນັກງານ, ລັດຖະກອນ, ທະຫານ, ຕຳຫຼວດ ແລະ ປະຊາຊົນລາວບັນດາເຜົ່າ        ໂດຍສະເພາະ ຄົນຮຸ່ນໜຸ່ມໃຫ້ຮັບຮູ້, ເຂົ້າໃຈຖືກຕ້ອງ, ກຳແໜ້ນ ແລະ ເຊື່ອມຊຶມຢ່າງເລິກເຊິ່ງ, ໜັກແໜ້ນ; ບັນດາຂະແໜງການຕ່າງໆ ທັງຢູ່ສູນກາງ ແລະ ທ້ອງຖິ່ນ ເປັນເຈົ້າການຈັດຕັ້ງປະຕິດບັດບັນດາກິດຈະກຳຕ່າງໆ ດ້ວຍຫຼາຍຮູບຫຼາຍສີ, ມີຄວາມບຸກບືນແຂ່ງຂັນ ໃຫ້ເປັນຂະບວນຟົດຟື້ນ, ມີຊີວິດຊີວາ ແລະ ກາຍເປັນສັນຍາລັກ ບົນພື້ນຖານຮັບປະກັນໄດ້ຄວາມສະຫງົບປອດໄພ ແລະ ປະຢັດມັດທະຍັດໃນທຸກກິດຈະກຳການເຄື່ອນໄຫວ ຕະຫຼອດປີສາມັກຄີມິດຕະພາບ 2022.

3) ບັນດາກິດຈະກຳ ແມ່ນໃຫ້ເນັ້ນດ້ານເນື້ອໃນເປັນຕົ້ນຕໍ: ດ້ານການເມືອງ ການພົບປະແລກປ່ຽນຄະນະຜູ້ແທນ, ດ້ານເສດຖະກິດ, ດ້ານວັດທະນາທຳ-ສັງຄົມ, ດ້ານປ້ອງກັນຊາດ-ປ້ອງກັນຄວາມສະຫງົບ; ທຸກຂະບວນການໃຫ້ມີການເຂົ້າຮ່ວມຂອງມະຫາຊົນ ຫຼື ທຸກຊັ້ນຄົນ, ໃຫ້ມີກິດຈະກໍາສະແດງຄວາມຮູ້ສຶກຂອງຕົນດ້ວຍການເຮັດບົດກາບກອນ, ບົດຂຽນ, ເລື່ອງສັ້ນ... ໃຫ້ມີການຈັດຕັ້ງ ແລະ ແຂ່ງຂັນກັນຄັກແນ່; ໃຫ້ຈັດຕັ້ງເລົ່າມູນເຊື້ອການພົວພັນຮ່ວມມື ຂອງສອງປະເທດ ລາວ-ຫວຽດນາມ  ໂດຍມີການຈັດຕັ້ງສຳມະນາ, ປາຖະກະຖາ ແລະ ຮູບການອື່ນໆທີ່ເໝາະສົມ.

        4) ໃຫ້ກອງເລຂາຂອງຄະນະຊີ້ນຳລະດັບຊາດ ກຳນົດກົນໄກ ແລະ ລະບອບໃນການຕິດຕາມ, ກວດກາ, ສະຫຼຸບລາຍງານ ຜົນການຈັດຕັ້ງປະຕິບັດກິດຈະກຳຕ່າງໆ ລວມທັງຂໍ້ສະດວກ, ຂໍ້ຫຍຸ້ງຍາກ ເພື່ອສ່ອງແສງລາຍງານເປັນປົກກະຕິ ໃຫ້ສະຫາຍຜູ້ປະຈຳການ ຂອງຄະນະຊີ້ນຳລະດັບຊາດ 15 ມື້ ຕໍ່ 1 ຄັ້ງ ແລະ ໃຫ້ລາຍງານ ຕໍ່ຄະນະຊີ້ນໍາລະດັບຊາດ 1 ເດືອນຕໍ່ຄັ້ງ, ຖ້າເລັ່ງດ່ວນ ແມ່ນລາຍງານປະທານຄະນະຊີ້ນຳລະດັບຊາດໂດຍກົງ ເພື່ອມີທິດຊີ້ນຳໃຫ້ທັນການ.

        5) ໃຫ້ກະຊວງການຕ່າງປະເທດ ສົມທົບກັບຄະນະພົວພັນຕ່າງປະເທດສູນກາງພັກ ປະສານສົມທົບກັນຢ່າງກົມກຽວ ເປັນເອກະພາບ ຕິດຕາມ ແລະ ປະສານແໜ້ນກັບທຸກພາກສ່ວນທີ່ກ່ຽວຂ້ອງ ຂອງລາວ ພ້ອມທັງຕິດຕາມພົວພັນກັບເບື້ອງຫວຽດນາມ ເພື່ອກຳໄດ້ ແລະ ກຳນົດເນື້ອໃນ, ຮູບການເຄື່ອນໄຫວ ໃຫ້ກົມກຽວ ແລະ ສອດຄ່ອງກັນ ບົນຈິດໃຈຄວາມເປັນເຈົ້າການ ແລະ ແທດກັບຕົວຈິງ.

6) ດ້ານງົບປະມານຮັບໃຊ້ ມອບໃຫ້ກອງເລຂາ ຂຶ້ນແຜນລະອຽດ ເພື່ອຂໍສະເໜີ ລັດຖະບານ ຄົ້ນຄວ້າ ແລະ ພິຈາລະນາ; ສຳລັບ ງົບປະມານການເຄື່ອນໄຫວ ຂອງກະຊວງ-ອົງການ ແລະ ທ້ອງຖິ່ນ ແມ່ນໃຫ້ກຸ້ມຕົນເອງ.

7) ການນຳພາຈັດຕັ້ງປະຕິບັດຕົວຈິງ ທັງໝົດທຸກບັນຫາທີ່ກ່າວມານັ້ນ ແມ່ນຢູ່ພາຍໃຕ້ການນຳພາ-ຊີ້ນຳ ຂອງຄະນະພັກ ເປັນຕົ້ນ ຄະນະປະຈຳພັກກະຊວງ-ອົງການ ແລະ ທ້ອງຖິ່ນ ໂດຍມີການແຕ່ງຕັ້ງຄະນະຮັບຜິດຊອບວຽກງານດັ່ງ​ກ່າວນີ້ ຢູ່ຂັ້ນຂອງຕົນ ເພື່ອເປັນເສນາທິການຊ່ວຍຄະນະພັກ ຄົ້ນຄວ້າຜັນຂະຫຍາຍຈັດຕັ້ງປະຕິບັດຕົວຈິງ.

ຂ່າວ-ພາບ: ຫ້ອງວ່າ​ການ​ສູນ​ກາງ​ພັກ

---