ຊົມເຊີຍວັນສະຖາປະນາ ສາທາລະນະລັດ ປະຊາຊົນຈີນ ຄົບຮອບ 72 ປີ
ເຜີຍແຜ່ໂດຍ: admin ເວລາ: 11/03/2022 13:19:46 ຈຳນວນຢ້ຽມຊົມ 436 ຄັ້ງ ປີນີ້ເປັນປີທີ່ ລາວ-ຈີນ ສ້າງຕັ້ງການພົວພັນທາງການທູດຄົບຮອບ 60 ປີ ແລະ ເປັນປີມິດຕະພາບ ລາວ-ຈີນ. ປະເທດລາວໄດ້ຮັບກຽດເປັນປະເທດກິດຕິມະສັກຂອງງານວາງສະແດງສິນຄ້າ ຈີນ-ອາຊຽນຄັ້ງທີ 18. ສາລະຄະດີ “ຮ່ວມອຸດົມການ” ທີ່ໂທລະພາບແຫ່ງຊາດລາວ ແລະ ສະຖານີວິທະຍຸໂທລະພາບ ກວາງຊີຈີນຮ່ວມກັນຖ່າຍທຳ ຈະອອກອາກາດຢູ່ໂທລະພາບແຫ່ງຊາດລາວໃນວັນທີ 1 ຕຸລາ 2021.
ສາລະຄະດີເລື່ອງນີ້ໄດ້ສຸມໃສ່ເລື່ອງລາວທີ່ໜ້າຕື້ນຕັນໃຈ ແລະ ເປັນເວລາທີ່ສຳຄັນໃນການໄປມາຫາສູ່ກັນ ລະຫວ່າງ ສອງປະເທດ ລາວ-ຈີນ, ຊຶ່ງມີຄວາມຈິງທີ່ມີຊີວິດຊີວາ ແລະ ການສຳພາດຢ່າງຫຼວງຫຼາຍໂດຍໄດ້ຢັ້ງຢືນທັດສະນະທີ່ວ່າ “ຮ່ວມອຸດົມການ” ຂອງສອງພັກ ສອງລັດ ລາວ-ຈີນ ຕາມເສັ້ນທາງແຫ່ງການພັດທະນາ.
ໃນເຄິ່ງສະຕະວັດກ່ອນ, ປະເທດລາວຖືກຈັກກະພັດຮຸກຮານ, ປະເທດຈີນທີ່ເປັນປະເທດສັງຄົມນິຍົມ ເຊັ່ນກັນໄດ້ໃຫ້ການຊ່ວຍເຫຼືອລາວຢ່າງທັນການ, ນະຄອນນານນິງ ເຂດກວາງຊີ ໄດ້ກາຍເປັນສະຖານທີ່ ທີ່ໃຫ້ການປົກປ້ອງປະຊາຊົນລາວ. ໃນທ້າຍຊຸມປີ 1960, ນາຍຄູ ແລະ ນັກຮຽນຂອງໂຮງຮຽນຫົກສິບເຈັດລາວໄດ້ເລີ່ມການຮຽນການສອນ ແລະ ໄດ້ດຳລົງຊີວິດຢູ່ນະຄອນນານນິງ ເປັນເວລາຍາວນານ, ເດັກນ້ອຍຜູ້ບໍລິສຸດໃນເມື່ອກ່ອນ, ມາເຖິງປະຈຸບັນນີ້ ໄດ້ກາຍເປັນກຳລັງຫຼັກແຫຼ່ງໃນສັງຄົມລາວ. ປະສົບການທີ່ເຄີຍດຳລົງຊີວິດຢູ່ນານນິງ, ໄດ້ກາຍເປັນຄວາມຊົງຈຳຮ່ວມຂອງເຂົາເຈົ້າ. ທ່ານກິແກ້ວ ໄຂຄຳພິທູນ ຮອງນາຍົກລັດຖະມົນຕີລາວ ເປັນນັກຮຽນຂອງໂຮງຮຽນຫົກສິບເຈັດລາວ. ການດຳລົງຊີວິດຕອນນັ້ນຢູ່ຈີນ, ເຮັດໃຫ້ທ່ານມີຄວາມຜູກພັນຢ່າງເລິກເຊິ່ງກັບຈີນ. ທ່ານກ່າວວ່າ: “ພວກເຮົາໄດ້ຮັບການດູແລລ້ຽງເກືອຈົນຮອດຊູ່ມື້ນີ້, ໃຫຍ່ສູງເປັນພະນັກງານ, ນັ້ນແມ່ນເຂົ້າຂອງປະຊາຊົນຈີນ ນ້ຳຂອງປະຊາຊົນຈີນ ເຫື່ອແຮງຂອງຄູອາຈານຈີນ, ກໍຄືການອຸທິດ ທີ່ມີຕໍ່ປະເທດຊາດ ແລະ ການປະຕິວັດຂອງພວກເຮົາ. ຮູ້ບຸນຄຸນຕໍ່ກັບພັກກອມມູນິດຈີນ, ຕໍ່ປະຊາຊົນຈີນ, ພວກເຮົາມີໜ້າທີ່ ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອສາມັກຄີ ມູນເຊື້ອການຮ່ວມມືອັນເປັນມໍລະດົກອັນລ້ຳຄ່າ.”
ຮ່ອງຮອຍທຸກແຫ່ງ ຂອງມິດຕະພາບ ລາວ-ຈີນ ໄດ້ກາຍເປັນມໍລະດົກ ທີ່ລ້ຳຄ່າ, ປະຊາຊົນສອງຊາດໄດ້ຖະນຸຖະໜອມໃນລະດັບສູງ, ໂຮງໝໍຈ່ຽງປິ່ນກວາງຊີທີ່ຕັ້ງຢູ່ ນະຄອນນານນິງ ເຄີຍຕ້ອນຮັບນັກປະຕິວັດລາວຫຼາຍຊຸດທີ່ມາປິ່ນປົວເພື່ອຟື້ນຟູສຸຂະພາບ. ອະດີດພະນັກງານຂອງພະແນກຊ່ວຍເຫຼືອຕ່າງປະເທດ ຂອງໂຮງໝໍຈ່ຽງປິ່ນໄດ້ທົບທວນຄືນປະສົບການທີ່ເຄີຍຊ່ວຍເຫຼືອປິ່ນປົວນັກປະຕິວັດລາວໃນທ້າຍຊຸມປີ 1960 ຫາຕົ້ນຊຸມປີ 1970, ຍັງມີພາບປະທັບໃຈຢ່າງເລິກເຊິ່ງຄືກັບວ່າຫາກໍເກີດຂຶ້ນໃນເມື່ອບໍ່ດົນມານີ້. ໃນເວລານັ້ນ, ທ່ານເສີນຢ້າວປິ່ນ ມີອາຍຸພຽງແຕ່ 20 ປີກວ່າ, ເປັນພໍ່ຄົວຂອງພະແນກຊ່ວຍເຫຼືອຕ່າງປະເທດ, ທ່ານໄດ້ໃຊ້ສີມືໃນການປຸງແຕ່ງອາຫານທີ່ດີເດັ່ນ, ເຮັດໃຫ້ແຂກລາວມີຈິດໃຈດີຂຶ້ນ.
ເດືອນມີນາ ປີ 1976, ທ່ານໄກສອນ ພົມວິຫານ ເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນ ປະຕິວັດລາວ ທັງເປັນນາຍົກລັດຖະມົນຕີລາວ ໃນເວລານັ້ນໄດ້ໄປຢ້ຽມຢາມ ນັກປະຕິວັດລາວ ທີ່ກຳລັງປິ່ນປົວຟື້ນຟູສຸຂະພາບຢູ່ໂຮງໝໍຈ່ຽງປິ່ນ. ທ່ານໄດ້ຍ່າງເຂົ້າໄປໃນຫ້ອງຄົວ ແລະ ຈັບມືກັບ ທ່ານເສີນຢ້າງປິ່ນ ທີ່ກຳລັງເຮັດວຽກຢູ່, ທ່ານໄດ້ສະແດງຄວາມຂອບໃຈ ຕໍ່ການອຸທິດເຫື່ອແຮງ ແລະ ຈິດໃຈຂອງທ່ານເສີນຢ້າວປິ່ນ. ຊຶ່ງມາເຖິງປະຈຸບັນນີ້ ໄດ້ຈາລຶກໄວ້ໃນຄວາມຊົງຈຳຂອງທ່ານເສີນຢ້າວປິ່ນ ຕະຫຼອດໄປ. ທ່ານໄກສອນ ພົມວິຫານ ຍັງໄດ້ປູກຕົ້ນອີ້ລານສອງຕົ້ນ ເພື່ອເປັນສັນຍາລັກ ຂອງມິດຕະພາບ ລາວ-ຈີນ ຢູ່ໂຮງໝໍຈ່ຽງປິ່ນ. ເຖິງວ່າຜ່ານໄປແລ້ວ 45 ປີກໍຕາມ, ແຕ່ຕົ້ນອີ້ລານຍັງຄົງແຕກດອກຫອມຫວນ, ມີໃບທີ່ດົກໜາ, ເໝືອນກັບ ມິດຕະພາບ ລາວ-ຈີນ ທີ່ຂະຫຍາຍຕົວຢ່າງມີຊີວິດຊີວາ.
ປະເທດຈີນ ແລະ ປະເທດລາວ ມີພູຜາ ແມ່ນ້ຳທີ່ຕິດຈອດກັນ, ມິດຕະພາບອັນເປັນມູນເຊື້ອໄດ້ສືບທອດກັນມາເປັນເວລາດົນນານແລ້ວ. ໂດຍສະເພາະນັບແຕ່ສອງປະເທດໄດ້ສ້າງສາຍພົວພັນທາງການທູດ ເປັນຕົ້ນມາ, ການນຳພັກ ແລະ ລັດຖະບານ ຮຸ່ນອາວຸໂສຂອງສອງປະເທດ ຈີນ-ລາວໄດ້ສ້າງພື້ນຖານທີ່ໜັກແໜ້ນໝັ້ນແກ່ນໃຫ້ແກ່ມິດຕະພາບຖານບ້ານໃກ້ເຮືອນຄຽງ. ຫຼັງຈາກເຂົ້າສູ່ຍຸກໃໝ່ແລ້ວ, ພາຍໃຕ້ການຊຸກຍູ້ສົ່ງເສີມ ຂອງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”, ຈີນ ແລະ ລາວໄດ້ມີການຮ່ວມມື ທີ່ກ້າວສູ່ລວງເລິກ ໃນຂົງເຂດການຕ້ານກັບພະຍາດໂຄວິດ-19, ເຊື່ອມຈອດເຊື່ອມໂຍງກັນ, ການຫຼຸດຜ່ອນຄວາມທຸກຍາກ, ກະສິກຳ, ການແພດແລະ ຢາພື້ນເມືອງ, ການກໍ່ສ້າງພື້ນຖານໂຄງລ່າງຂະໜາດໃຫຍ່ ແລະ ອື່ນໆ. ການຮ່ວມມືລະຫວ່າງສອງປະເທດໄດ້ນຳເອົາຜົນປະໂຫຍດຕົວຈິງມາໃຫ້ແກ່ປະຊາຊົນສອງຊາດ.
ສາລະຄະດີ “ຮ່ວມອຸດົມການ” ໄດ້ໃຊ້ສະຕິພາລະກຳແບບທຳມະຊາດ ແລະສາຍຕາທີ່ກວ້າງໄກທາງດ້ານປະຫວັດສາດ, ສະຫຼຸບ ແລະ ພັນລະນາເລື່ອງລາວທີ່ໜ້າປະທັບໃຈ ແລະ ເຫດການສຳຄັນໃນຂະບວນການທີ່ສອງປະເທດ ລາວ-ຈີນຮ່ວມກັນກ້າວໄປໜ້າ ແລະ ພັດທະນາຮ່ວມກັນໃນໄລຍະ 60 ປີທີ່ຜ່ານມາ, ເພື່ອໂຄສະນາກ່ຽວກັບມິດຕະພາບຂອງສອງພັກສອງລັດລາວ-ຈີນທີ່ມີມາແຕ່ບູຮານນະການ, ຄວາມພະຍາຍາມຂອງປະຊາຊົນສອງຊາດໃນການສ້າງຄູ່ຮ່ວມຊາຕາກຳລາວ-ຈີນ ແລະ ຜົນສຳເລັດທີ່ຍາດມາໄດ້.
ນັບແຕ່ເກີດມີການແຜ່ລະບາດຂອງພະຍາດໂຄວິດ-19ເປັນຕົ້ນມາ, ໜ່ວຍງານຊ່ຽວຊານແພດໝໍຂອງຈີນ ໄດ້ເດີນທາງມາປະເທດລາວສອງເທື່ອ, ເພື່ອຊ່ວຍເຫຼືອລາວຕ້ານກັບພະຍາດໂຄວິດ-19. ນັບມາຮອດເດືອນກໍລະກົດປີ 2021, ວັກຊິນປອ້ງກັນໂຄວິດ-19 ທີ່ຈີນໄດ້ຊ່ວຍເຫຼືອລາວ ມີເຖິງ1ລ້ານ9ແສນ2ພັນໂດສ, ເທົ່າກັບ89% ຂອງວັກຊິນປ້ອງກັນໂຄວິດ-19 ທີ່ລາວໄດ້ຮັບການຊ່ວຍເຫຼືອຈາກຕ່າງປະເທດ. ທີມງານທີ່ປະກອບດ້ວຍຊ່ຽວຊານຂອງ ລາວ ແລະ ຈີນເກືອບ 100 ທ່ານໄດ້ໃຊ້ເວລາ 2 ປີ, ເກັບໂຮມຢາພື້ນເມືອງ 160 ຊະນິດ, ສູດຢາສຳເລັດຮູບ 40 ສະບັບ, ແລະ ໄດ້ສຳເລັດການຮຽບຮຽງ ແລະ ພິມຈຳໜ່າຍ “ວັດຈະນານຸກົມພືດເປັນຢາຂອງລາວ” ທີ່ເປັນພາສາລາວເຫຼັ້ມທຳອິດ. ຊຶ່ງເລື່ອງລາວກ່ຽວກັບການຮ່ວມມືທາງດ້ານສາທາລະນະສຸກ ລະຫວ່າງ ລາວ-ຈີນ ເຫຼົ່ານີ້ລ້ວນແຕ່ໄດ້ຖືກຈັດເຂົ້າໃນສາລະຄະດີເລື່ອງນີ້.
ຢູ່ພາກສະໜາມກໍ່ສ້າງທາງລົດໄຟ ລາວ-ຈີນ, ແລະ ເຂື່ອນໄຟຟ້ານ້ຳອູຂອງລາວ, ໄດ້ເກັບພາບຜູ້ກໍ່ສ້າງທາງລົດໄຟທັງສອງຊາດ ລາວ-ຈີນ ພະຍາຍາມສູ້ຊົນທີ່ມີວິໄສທັດຮ່ວມກັນ. ໃນເວລາໃຫ້ສຳພາດຕໍ່ນັກຂ່າວ, ທ່ານ ພັນຄຳ ວິພາວັນ ນາຍົກລັດຖະມົນຕີລາວ ກ່າວວ່າ: “ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນ” ແມ່ນເອກະສານການເມືອງ ສະບັບທຳອິດ ຂອງສອງປະເທດ ທີ່ຜູ້ນຳຂັ້ນສູງຂອງພວກເຮົາໄດ້ເຊັນນຳກັນໃນປີ 2019, ແລະ ເປັນການເປີດສັງກາດໃໝ່ຂອງການພົວພັນຮ່ວມມືລະຫວ່າງສອງພັກ ສອງລັດ ກໍຄືປະຊາຊົນສອງຊາດລາວ-ຈີນ, ໃນສະເພາະໜ້າແລະຍາວນານ, ເນື້ອໃນຂອງແຜນແມ່ບົດໄດ້ກວມເອົາຮອບດ້ານ, ນັບແຕ່ດ້ານການເມືອງ, ຄວາມໝັ້ນຄົງ, ເສດຖະກິດ, ວັດທະນະທຳສັງຄົມ, ແລະບັນຫາສິ່ງແວດລ້ອມ.”
ສາລະຄະດີ “ຮ່ວມອຸດົມການ” ເປັນໝາກຜົນຂອງການຮ່ວມມື ລາວ-ຈີນ. ປີ 2021 ມີຄວາມໝາຍສຳຄັນສຳລັບ ລາວແລະຈີນ. ສະນັ້ນໂທລະພາບແຫ່ງຊາດລາວ ແລະ ສະຖານີວິທະຍຸໂທລະພາບກວາງຊີຈີນຍິ່ງມີຄວາມປາຖະໜາສູງໃນການຮ່ວມມືກັນ. ເຖິງວ່າ ພະຍາດໂຄວິດ-19 ຍັງແຜ່ລະບາດຢ່າງຮຸນແຮງກໍຕາມ, ແຕ່ສອງສະຖານີໄດ້ຜ່ານຜ່າຄວາມຫຍຸ້ງຍາກນາໆປະການ, ໄດ້ສຳເລັດການຜະລິດສາລະຄະດີ ທີ່ສ່ອງແສງເຖິງມິດຕະພາບ ລາວ-ຈີນ ຢ່າງເຕັມສ່ວນ, ໃຊ້ການກະທຳຕົວຈິງເພື່ອເປັນສ່ວນຮ່ວມເຂົ້າໃນການສ້າງຄູ່ຮ່ວມຊາຕາກຳລາວ-ຈີນ. ນັບແຕ່ປີ 2016 ມາຮອດປະຈຸບັນ, ໂທລະພາບແຫ່ງຊາດລາວ ແລະ ສະຖານີວິທະຍຸໂທລະພາບກວາງຊີຈີນ ໄດ້ຮ່ວມກັນຜະລິດ ແລະ ອອກອາກາດສາລະຄະດີຫຼາຍເລື່ອງທີ່ສ່ອງແສງໃຫ້ເຫັນເຖິງ ມິດຕະພາບລາວ-ຈີນ, ເຊັ່ນ: “ເທັບບັນທຶກພາບຄືນິທານແຫ່ງການເວລາ”, “ບ້ານເມືອງໃນທ່າມກາງພູຂຽວນໍ້າໃສ - ເພື່ອອຸດົມການອັນດຽວກັນ”, “ບ້ານເມືອງໃນທ່າມກາງພູຂຽວນໍ້າໃສ-ຊີວິດການເປັນຢູ່ທີ່ດີກວ່າເກົ່າ”, “ການຮ່ວມມື ແມ່ນໍ້າລ້ານຊ້າງ-ແມ່ນໍ້າຂອງ ແຕກດອກອອກຜົນ” “ບັ້ນຕ້ານກັບພະຍາດຂອງໂຮງໝໍແຫ່ງໜຶ່ງ” ແລະອື່ນໆ. ໃນວັນທີ 25 ຫາວັນທີ 27 ເມສາປີ 2021, ເພື່ອສະເຫຼີມສະຫຼອງການສ້າງຕັ້ງສາຍພົວພັນທາງການທູດຄົບຮອບ 60 ປີ ລະຫວ່າງລາວ-ຈີນ, ໂທລະພາບແຫ່ງຊາດລາວໄດ້ອອກອາກາດສາລະຄະດີ “ບ້ານເມືອງໃນທ່າມກາງພູຂຽວນໍ້າໃສ-ຊີວິດການເປັນຢູ່ທີ່ດີກວ່າເກົ່າ” ທີ່ແນະນຳໝາກຜົນແຫ່ງການລຶບລ້າງຄວາມທຸກຍາກຢ່າງຖືກຕ້ອງກັບເປົ້າໝາຍທີ່ແນ່ນອນ ຂອງຈີນເປັນເວລາ 3 ມື້ລຽນຕິດ. ສາລະຄະດີ “ຮ່ວມອຸດົມການ” ແມ່ນສາລະຄະດີເລື່ອງທີ 2 ທີ່ໂທລະພາບແຫ່ງຊາດລາວ ແລະ ສະຖານີວິທະຍຸໂທລະພາບກວາງຊີຈີນຮ່ວມມືກັນຜະລິດໃນປີນີ້. ເຖິງວ່າໄດ້ປະສົບກັບຜົນກະທົບຈາກການແຜ່ລະບາດຂອງພະຍາດໂຄວິດ-19 ກໍ່ຕາມ, ແຕ່ສອງສະຖານີໄດ້ຮ່ວມມືກັນຜະລິດສາລະຄະດີສຳເລັດ 2 ເລື່ອງພາຍໃນປີດຽວ, ຊຶ່ງໄດ້ເພີ່ມບັນຍາກາດທີ່ຄຶກຄື້ນ ແລະ ມີຄວາມໝາຍຄວາມສຳຄັນຍິ່ງຂຶ້ນໃຫ້ແກ່ການສ້າງຕັ້ງສາຍພົວພັນທາງການທູດຄົບຮອບ 60 ປີລະຫວ່າງລາວ-ຈີນ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20