ຫົວໜ້າ ຄຕພ ຕ້ອນຮັບ ທູດແຫ່ງ ອິນເດຍ ເຂົ້າຢ້ຽມຂໍ່ານັບ

ເຜີຍ​ແຜ່​ໂດຍ​: admin ເວ​ລາ: 11/03/2022 11:41:40 ຈຳ​ນວນ​​ຢ້ຽມ​ຊົມ 472 ຄັ້ງ ​

ທ່ານ ທອງສະຫວັນ ພົມວິຫານ ກຳ​ມະ​ການ​ສູນ​ກາງ​ພັກ ຫົວໜ້າຄະນະພົວພັນຕ່າງປະເທດສູນກາງພັກ (ຄຕພ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ດິນກາ ອາດທານາ (DinkarAsthana) ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສາທາລະນະລັດ ອິນເດຍ (ສ ອິນເດຍ) ປະຈໍາ ສປປ ລາວ ເຂົ້າຢ້ຽມຂໍ່ານັບ ໃນຕອນເຊົ້າຂອງວັນທີ 7 ກັນຍານີ້ທີ່ຫ້ອງຮັບແຂກ ຄຕພ.

ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ທີ່ທ່ານທູດໄດ້ມີການເຄື່ອນໄຫວໃນການປະຕິບັດໜ້າທີ່ການທູດຂອງຕົນຢ່າງຫ້າວຫັນ ຊຶ່ງໄດ້ປະກອບສ່ວນສຳຄັນເຂົ້າໃນການເສີມສ້າງສາຍພົວພັນມິດຕະພາບທີ່ເປັນມູນເຊື້ອ ລະຫວ່າງ ສອງປະເທດ ສປປ ລາວ- ສ ອິນເດຍ; ພ້ອມທັງຊົມເຊີຍຕໍ່ບັນດາຜົນສໍາເລັດຫຼາຍດ້ານທີ່ລັດຖະບານ ແລະ ປະຊາຊົນອິນເດຍຍາດມາໄດ້ໃນການພັດທະນາປະເທດ ໃນຕະຫຼອດໄລຍະທີ່ຜ່ານມາກໍຄືປັດຈຸບັນ ໂດຍສະເພາະການຮັບມືກັບການແຜ່ລະບາດຂອງພະຍາດໂຄວິດ-19 ທີ່ລັດຖະບານອິນເດຍ ໄດ້ດໍາເນີນມາດຕະການຕ່າງໆຢ່າງມີປະສິດທິຜົນ ແລະ ໄດ້ຮັບຜົນສໍາເລັດເປັນກ້າວໆມາ.

ທ່ານຫົວໜ້າ ຄຕພ ຍັງໄດ້ຕີລາຄາສູງຕໍ່ ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມື ລະຫວ່າງ ສປປ ລາວ ແລະ ສ ອິນເດຍ ຕະຫຼອດກວ່າ 6 ທົດສະວັດຜ່ານມາ, ໄດ້ສະແດງຄວາມຂອບໃຈຢ່າງຈິງໃຈຕໍ່ ລັດຖະບານ ແລະ ປະຊາຊົນອິນເດຍ ເປັນຕົ້ນແມ່ນການເຄື່ອນໄຫວຂອງທ່ານທູດ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອແກ່ ສປປ ລາວ ໃນການຈັດຕັ້ງປະຕິບັດໂຄງການຮ່ວມມືສອງຝ່າຍ ເປັນຕົ້ນແມ່ນ ສາທາລະນະສຸກ, ການສຶກສາ, ການຄ້າ-ການລົງທຶນ, ວັດທະນະທໍາ ແລະ ອື່ນໆ ອັນເປັນການປະກອບສ່ວນອັນສໍາຄັນເຂົ້າໃນການພັດທະນາພື້ນຖານໂຄງລ່າງ, ເສດຖະກິດ-ສັງຄົມຂອງ ສປປ ລາວ ໃນປັດຈຸບັນ. ນອກນັ້ນ ຍັງໄດ້ແຈ້ງກ່ຽວກັບ ທີ່ຕັ້ງ ແລະ ພາລະບົດບາດຂອງ ຄຕພແລະ ຍິນດີຈະຮ່ວມກັບທ່ານທູດອິນເດຍ ໃນການຊຸກຍູ້ການພົວພັນຮ່ວມມື ລະຫວ່າງ ສປປ ລາວ ແລະ ສ ອິນເດຍ ເປັນຕົ້ນໃນສາຍພັກ ແລະ ອົງການຈັດຕັ້ງມະຫາຊົນ ໃຫ້ນັບມື້ໄດ້ຮັບການພັດທະນາຍິ່ງໆຂຶ້ນແລະ ຫວັງ​ວ່າທ່ານ​ທູດ​ຈະ​ປະ​ສົບຜົນສຳເລັດໃນການສືບຕໍ່ເປັນຂົວຕໍ່ໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືລະຫວ່າງສອງປະເທດ ສປປ ລາວ - ສ ອິນເດຍ ເພື່ອ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດເພື່ອສັນຕິພາບ, ມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ.

      ທ່ານ ດິນກາ ອາດທານາ ໄດ້ສະແດງຄວາມຊົມເຊີຍຕໍ່ ທ່ານ ທອງສະຫວັນ ພົມວິຫານ ທີ່ໄດ້ຮັບເລືອກຕັ້ງໃຫ້ດໍາລົງຕໍາແໜ່ງເປັນກໍາມະການສູນກາງພັກ ແລະ ຫົວໜ້າ ຄຕພ ຄົນໃໝ່; ຊົມເຊີຍຕໍ່ຜົນສໍາເລັດໃນການຈັດຕັ້ງປະຕິບັດມາດຕະການປ້ອງກັນ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຂອງພັກ, ລັດຖະບານ ແລະ ປະຊາຊົນລາວ; ຕີລາຄາສູງ ຕໍ່ການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ - ສ ອິນເດຍ ແລະ ໃຫ້ຄໍາໝັ້ນສັນຍາວ່າຈະສືບຕໍ່​ເສີມ​ຂະ​ຫຍາຍສາຍພົວພັນຮ່ວມມື ລະຫວ່າງ ສປປ ລາວ - ສ ອິນເດຍ ໃຫ້ມີການຂະຫຍາຍຕົວຢ່າງຕໍ່ເນື່ອງ ໂດຍສະເພາະການຊຸກຍູ້ການສ້າງຕັ້ງ ສະມາຄົມມິດຕະພາບ ອິນເດຍ-ລາວ ເພື່ອເສີມຂະຫຍາຍການພົວພັນ ລະຫວ່າງປະຊາຊົນສອງປະເທດ ແລະ ຢືນຢັນຄວາມມຸ່ງຫວັງຂອງຕົນ ທີ່ຈະສືບຕໍ່ເຮັດວຽກຮ່ວມມືກັບພາກສ່ວນຕ່າງໆຂອງ ສປປ ລາວ ເພື່ອສົ່ງເສີມການພົວພັນຮ່ວມມືທີ່ດີ ລະຫວ່າງ ສອງປະເທດ ໃຫ້ແຕກດອກອອກຜົນຍິ່ງໆຂຶ້ນ.

ຂ່າວ: ຄ​ຕ​ພ-ພາບ: ສຸກ​ສະ​ຫວັນ

---