ການນໍາກະຊວງການຕ່າງປະເທດ ອວຍພອນວັນຊາດ ຫວຽດນາມ ຄົບຮອບ 76 ປີ
ເຜີຍແຜ່ໂດຍ: admin ເວລາ: 11/03/2022 11:39:13 ຈຳນວນຢ້ຽມຊົມ 422 ຄັ້ງ ຄະນະນໍາກະຊວງການຕ່າງປະເທດນໍາໂດຍ ສະຫາຍ ໂພໄຊ ໄຂຄຳພິທູນ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມຄະນະໄດ້ໄປອວຍພອນ ສະຫາຍ ຫງວຽນ ບ໋າ ຮຸ່ງເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ ໃນວັນທີ 1 ກັນຍາ 2021 ທີ່ສະຖານເອກອັກຄະລັດຖະທູດ ສສ ຫວຽດນາມ ປະຈຳ ສປປ ລາວ, ເນື່ອງໃນໂອກາດວັນສະຖາປະນາ ສສ ຫວຽດນາມ ຄົບຮອບ 76 ປີ (2/9/1945-2/9/2021) ແລະ ວັນການທູດ ສສ ຫວຽດນາມ ຄົບຮອບ 76 ປີ (28/8/1945 - 28/8/2021).
ໃນໂອກາດດັ່ງກ່າວ, ສະຫາຍ ໂພໄຊ ໄຂຄຳພິທູນ ໄດ້ຕາງໜ້າໃຫ້ຄະນະພັກ, ຄະນະນໍາ ແລະ ພະນັກງານກະຊວງການຕ່າງປະເທດ ແຫ່ງ ສປປ ລາວ ສະແດງຄວາມຊົມເຊີຍວັນສະຖາປະນາ ສສ ຫວຽດນາມ ແລະ ວັນການທູດ ສສ ຫວຽດນາມ ຄົບຮອບ 76 ປີ ຢ່າງສຸດໃຈ. ພ້ອມນັ້ນ, ກໍໄດ້ສະແດງຄວາມຊົມເຊີຍ ຕໍ່ຜົນສໍາເລັດອັນໃຫຍ່ຫຼວງໃນຫຼາຍດ້ານຂອງ ສສ ຫວຽດນາມ ທີ່ສາມາດຍາດມາໄດ້ຕະຫຼອດ 76 ປີ ຜ່ານມາ. ໂດຍສະເພາະໃນປີນີ້ ໃນຂະນະທີ່ຫຼາຍປະເທດໃນໂລກ ແລະ ໃນພາກພື້ນກໍາລັງປະເຊີນກັບການທົດຖອຍຂອງເສດຖະກິດຈົນເຖິງຂັ້ນຕິດລົບ ຍ້ອນຜົນກະທົບຈາກການແຜ່ລະບາດຂອງພະຍາດ ໂຄວິດ-19, ແຕ່ເສດຖະກິດ ສສ ຫວຽດນາມ ກໍມີການຂະຫຍາຍຕົວ ເພີ່ມຂຶ້ນເຖິງ 6%, ຊີວິດການເປັນຢູ່ຂອງປະຊາຊົນໄດ້ຮັບການພັດທະນາ ແລະ ປັບປຸງໃຫ້ດີຂຶ້ນເປັນກ້າວໆ.
ນອກຈາກນັ້ນ, ສະຫາຍ ໂພໄຊ ໄຂຄຳພິທູນ ຍັງໄດ້ສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນຳພາອັນປີຊາສາມາດ ແລະ ສະຫຼາດສ່ອງໃສ ຂອງພັກກອມມູນິດຫວຽດນາມ ກໍຄືລັດຖະບານ ຫວຽດນາມ ແລະ ປະຊາຊົນຫວຽດນາມອ້າຍນ້ອງທົ່ວປະເທດ ທີ່ໄດ້ຮ່ວມແຮງຮ່ວມໃຈກັນສ້າງສາ ແລະ ພັດທະນາປະເທດຊາດ ຈະສາມາດຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ, ໃຫ້ບັນລຸຈຸດໝາຍແຫ່ງການສ້າງ ສສ ຫວຽດນາມ ຮອດປີ 2025 ກາຍເປັນປະເທດກໍາລັງພັດທະນາ, ມີອຸດສາຫະກໍາຕາມທິດທັນສະໄໝ, ຂ້າມຜ່ານລະດັບລາຍໄດ້ສະເລ່ຍປານກາງຕໍ່າ; ຮອດປີ 2030 ກາຍເປັນປະເທດກໍາລັງພັດທະນາ, ເຮັດໃຫ້ມີການພັດທະນາອຸດສາຫະກໍາທັນສະໄໝ, ມີລາຍໄດ້ສະເລ່ຍປານກາງສູງ; ຮອດປີ 2045 ກາຍເປັນປະເທດພັດທະນາ ມີລາຍໄດ້ສູງ. ພິເສດ, ສະຫາຍ ໂພໄຊ ໄຂຄຳພິທູນ ຍັງໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການຮ່ວມມືກັນຢ່າງສະໜິດແໜ້ນ ແລະ ມີປະສິດທິພາບສູງ ລະຫວ່າງ ກະຊວງການຕ່າງປະເທດລາວ ກັບ ສະຖານທູດຫວຽດນາມ ໃນໄລຍະຜ່ານມາ, ເຮັດໃຫ້ສາມາດຊຸກຍູ້ການພົວພັນອັນເປັນມູນເຊື້ອທີ່ດີ ລະຫວ່າງສອງຝ່າຍໃຫ້ຂະຫຍາຍຕົວ ແລະ ມີຜົນສໍາເລັດຫຼາຍດ້ານເຖິງແມ່ນວ່າຫຼາຍກິດຈະກໍາ ແລະ ແຜນການຈະໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ກໍຕາມ, ແຕ່ພວກເຮົາກໍຍັງມີການໄປມາຫາສູ່ກັນຂອງການນໍາຂັ້ນສູງ ໂດຍສະເພາະການເດີນທາງຢ້ຽມຢາມ ສສ ຫວຽດນາມ ໃນທ້າຍເດືອນມິຖຸນາ 2021 ຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ແຫ່ງ ສປປ ລາວ ແລະ ການເດີນທາງຢ້ຽມຢາມ ສປປ ລາວ ໃນກາງເດືອນສິງຫາ 2021 ຜ່ານມາ ຂອງສະຫາຍ ຫງວຽນ ຊວັນ ຟຸກ ປະທານປະເທດ ແຫ່ງ ສສ ຫວຽດນາມ ຊຶ່ງການຢ້ຽມຢາມດັ່ງກ່າວ ແມ່ນການເດີນທາງຢ້ຽມຢາມຕ່າງປະເທດຄັ້ງທໍາອິດຂອງທັງສອງສະຫາຍໃນຖານະປະທານປະເທດ, ສະແດງໃຫ້ເຫັນເຖິງສາຍພົວພັນອັນພິເສດຂອງທັງສອງປະເທດທີ່ບໍ່ວ່າເວລາໃດກໍຖືສໍາຄັນ ແລະ ໃຫ້ບຸລິມະສິດຊຶ່ງກັນ ແລະ ກັນສະເໝີ. ພ້ອມກັນນັ້ນ ສະຫາຍ ໂພໄຊ ໄຂຄຳພິທູນ ໄດ້ຊົມເຊີຍ ແລະ ຕີລາຄາສູງ ຕໍ່ການຊ່ວຍເຫຼືອຢ່າງທັນການ ຂອງ ສສ ຫວຽດນາມ ຕໍ່ ສປປ ລາວ ໃນໄລຍະຜ່ານມາ, ໂດຍສະເພາະໃນໄລຍະການລະບາດຂອງພະຍາດໂຄວິດ-19 ເຖິງວ່າ ຫວຽດນາມ ຈະໄດ້ຮັບຜົນກະທົບຈາກພະຍາດດັ່ງກ່າວເຊັ່ນກັນ ແຕ່ກໍຍັງໃຫ້ການຊ່ວຍເຫຼືອແກ່ ສປປ ລາວ ເປັນຕົ້ນ ໄດ້ສົ່ງຄະນະແພດຊ່ຽວຊານ, ຢາປົວພະຍາດ ພ້ອມທັງອຸປະກອນການແພດມາຊ່ວຍລັດຖະບານລາວ. ພ້ອມນີ້, ສະຫາຍ ໂພໄຊ ໄຂຄຳພິທູນ ຍັງໄດ້ສະແດງຄວາມເຫັນໃຈຕໍ່ ສສ ຫວຽດນາມ ທີ່ຫວ່າງບໍ່ດົນມານີ້ ໄດ້ພົບຜູ້ຕິດເຊື້ອພະຍາດໂຄວິດ-19 ຮອບໃໝ່ ແລະ ໄດ້ສະແດງຄວາມເຊື່ອໝັ້ນຢ່າງໜັກແໜ້ນວ່າ ດ້ວຍຄວາມເອົາໃຈໃສ່ໃກ້ຊິດຂອງພັກ ແລະ ລັດຖະບານ ແຫ່ງ ສສ ຫວຽດນາມ ພ້ອມກັບຄວາມມີລະບຽບວິໄນ ສະຕິສູງ ຂອງປະຊາຊົນ ຫວຽດນາມ, ສສ ຫວຽດນາມ ຈະສາມາດຄວບຄຸມການລະບາດຄັ້ງນີ້ໄດ້ໂດຍໄວ.
ໃນໂອກາດດຽວກັນນີ້, ສະຫາຍເອກອັກຄະລັດຖະທູດ ຫງວຽນ ບ໋າ ຮຸ່ງ ກໍໄດ້ສະແດງຄວາມຂອບໃຈຢ່າງຍິ່ງຕໍ່ການມາອວຍພອນຄັ້ງນີ້ຂອງ ສະຫາຍຮອງລັດຖະມົນຕີ ໂພໄຊ ໄຂຄຳພິທູນ ແລະ ຄະນະ. ສະແດງຄວາມຂອບໃຈ ແລະ ຊົມເຊີຍ ຕໍ່ການໃຫ້ຄວາມສໍາຄັນອັນຈິງໃຈຂອງ ພັກ-ລັດຖະບານ ແຫ່ງ ສປປ ລາວ, ພ້ອມທັງຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ຫວຽດນາມ-ລາວ ໃນໄລຍະຜ່ານມາ ແລະ ຫວັງຢ່າງຍິ່ງວ່າ ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດຫວຽດນາມ-ລາວ ນັບມື້ຈະໄດ້ຮັບການຖະນຸຖະໜອມບໍາລຸງສ້າງ ແລະ ໄດ້ຮັບການເຊີດຊູຢ່າງບໍ່ຢຸດຢັ້ງ.
ໃນຕອນທ້າຍ, ສະຫາຍ ໂພໄຊ ໄຂຄຳພິທູນ ໄດ້ອວຍພອນໃຫ້ ສະຫາຍ ຫງວຽນ ບ໋າ ຮຸ່ງ ພ້ອມດ້ວຍພະນັກງານສະຖານທູດທຸກສະຫາຍ ແລະ ຜ່ານສະຫາຍ ໄປຍັງການນໍາພັກ-ລັດ ຂອງ ຫວຽດນາມ ຈົ່ງມີສຸຂະພາບແຂງແຮງ ແລະ ປະສົບຜົນສໍາເລັດໃໝ່ໃນໜ້າທີ່ອັນມີກຽດຂອງຕົນ, ພ້ອມທັງອວຍພອນແດ່ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ຈົ່ງສືບຕໍ່ໄດ້ຮັບຜົນສໍາເລັດໃໝ່ຍິ່ງໃຫຍ່ກວ່າເກົ່າ ໃນອະນາຄົດ.
ຂ່າວ-ພາບ: ກະຊວງການຕ່າງປະເທດ
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20