ຄະນະພົວພັນຕ່າງປະເທດສູນກາງພັກ

ກອງປະຊຸມໃຫຍ່ ຄັ້ງທີ II ຂອງກຳມະບານຮາກຖານ ກົມເອີຣົບ-ອາເມຣິກາ, ຄະນະພົວພັນຕ່າງປະເທດສູນກາງພັກ.

ເຜີຍແຜ່ໂດຍ: moderator ເວລາ: 13/09/2024 08:31:45 ຈຳນວນຢ້ຽມຊົມ 191 ຄັ້ງ

ເພື່ອເປັນການກະກຽມໃຫ້ແກ່ການດຳເນີນ ກອງປະຊຸມໃຫຍ່ ຄັ້ງທີ II ຂອງຄະນະບໍລິຫານງານສະຫະພັນກຳມະບານ ຄະນະພົວພັນຕ່າງປະເທດສູນກາງພັກ (ຄຕພ), ໃນຕອນເຊົ້າຂອງວັນທີ 11 ກັນຍາ 2024, ໜ່ວຍກຳມະບານຮາກຖານ ກົມເອີຣົບ-ອາເມຣິກາ (ອອ) ໄດ້ດຳເນີນກອງປະຊຸມໃຫຍ່ສະມາຊິກກຳມະບານ ຄັ້ງທີ II ຂຶ້ນ ທີ່ສຳນັກງານ ຄຕພ, ພາຍໃຕ້ການເປັນປະທານຮ່ວມຂອງ ສະຫາຍ ນ. ສິຣິພອນ ຄູຫາເທບ, ກໍາມະການຄະນະພັກ, ເລຂາໜ່ວຍພັກກົມ, ຫົວໜ້າກົມເອີຣົບ-ອາເມຣິກາ, ສະຫາຍ ສິງຫານະຄອນ ສີຫາລາດ, ຕາງໜ້າຄະນະບໍລິຫານງານສະຫະພັນກຳມະບານ ຄຕພ ແລະ ສະຫາຍ ຄຳສະແຫວງ ສຸລິຍະມາດ, ປະທານໜ່ວຍກຳມະບານຮາກຖານ ກົມ ອອ; ຕາງໜ້າບັນດາໜ່ວຍກຳມະບານຮາກຖານອ້ອມຂ້າງພາຍໃນ ຄຕພ, ຕາງໜ້າໜ່ວຍຊາວໜຸ່ມ, ແມ່ຍິງ ແລະ ສະມາຊິກກຳມະບານ ກົມ ອອ ກໍເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ຜ່ານ ບົດລາຍງານການເມືອງ ແລະ ບົດສໍາຫຼວດການນໍາພາ ຂອງ ຄະນະໜ່ວຍກຳມະບານຮາກຖານ ກົມ ອອ ສະໄໝທີ I, ເຊິ່ງໄດ້ຕີລາຄາຜົນສຳເລັດ, ຈຸດດີ-ຈຸດຄົງຄ້າງ, ຂໍ້ສະດວກ-ຂໍ້ຫຍຸ້ງຍາກ ໃນການນໍາພາ-ຊີ້ນໍາວຽກງານກຳມະບານຂອງ ກົມ ອອ ໃນໄລຍະ 05 ປີຜ່ານມາ ແລະ ທິດທາງຈຸດສຸມໃນໄລຍະ 05 ປີຕໍ່ໜ້າ. ຜົນງານຂອງ ໜ່ວຍກຳມະບານຮາກຖານກົມ ອອ ແມ່ນຕິດພັນຢ່າງສະໜິດແໜ້ນກັບຜົນງານຂອງໜ່ວຍພັກ ຂອງກົມ ອອ, ຖືເປັນກໍາລັງຫຼັກຂອງໜ່ວຍພັກກົມ ອອ ໃນການເປັນເສນາທິການໃຫ້ ຄະນະພັກ-ຄະນະນຳ ຄຕພ ແລະ ຄະນະບໍລິຫານງານສະຫະພັນກຳມະບານ ໃນການຄົ້ນຄວ້າ, ຕິດຕາມສະພາບການພາກພື້ນ ແລະ ສາກົນ, ສະພາບການຂອງບັນດາພັກການເມືອງ, ຂະບວນການພັກກອມມູນິດ ແລະ ກໍາມະກອນ, ຂະບວນການກ້າວໜ້າໃນທົ່ວໂລກ; ຄົ້ນຄວ້າແຜນຍຸດທະສາດຂອງການພົວພັນ ລະຫວ່າງ ພັກ ປປ ລາວ ກັບພັກການເມືອງໃນໂລກ, ເອົາໃຈໃສ່ເຜີຍແຜ່ແນວທາງ-ນະໂຍບາຍການຕ່າງປະເທດຂອງພັກ ໃນແຕ່ລະໄລຍະ; ເປັນໃຈກາງປະສານງານ ແລະ ອໍານວຍຄວາມສະດວກໃນການຈັດຕັ້ງປະຕິບັດວຽກງານພົວພັນຕ່າງປະເທດ ຂອງພັກ ປປ ລາວ.

ກອງປະຊຸມໃຫຍ່ສະມາຊິກໜ່ວຍກຳມະບານຮາກຖານ ກົມ ອອ ຄັ້ງທີ II ໄດ້ດໍາເນີນປ່ອນບັດເລືອກຕັ້ງເອົາຄະນະໜ່ວຍຊຸດໃໝ່ເຊິ່ງປະກອບມີ 03 ສະຫາຍຄື: ສະຫາຍ ທິດສອນ ສະຫວັນ, ເປັນປະທານກຳມະບານຮາກຖານ; ສະຫາຍ ແລ່ມໂບ້ ບຸນວົງໄຊ, ເປັນຮອງປະທານກຳມະບານຮາກຖານ, ທັງເປັນປະທານກວດກາ ແລະ ສະຫາຍ ນ. ອານົງ ຄ້າທະວີ, ເປັນກໍາມະການ ກຳມະບານຮາກຖານ.

ໃນກອງປະຊຸມ, ສະຫາຍ ນ. ສິຣິພອນ ຄູຫາເທບ, ກໍາມະການຄະນະພັກ, ເລຂາໜ່ວຍພັກກົມ, ຫົວໜ້າກົມເອີຣົບ-ອາເມຣິກາ ແລະ ສະຫາຍ ສິງຫານະຄອນ ສີຫາລາດ, ຕາງໜ້າຄະນະບໍລິຫານງານສະຫະພັນກຳມະບານ ຄຕພ ໄດ້ໃຫ້ກຽດໂອ້ລົມຕໍ່ກອງປະຊຸມ, ໂດຍໄດ້ຊົມເຊີຍຜົນງານທີ່ຄະນະໜ່ວຍ ແລະ ສະມາຊິກກຳມະບານ ກົມ ອອ ຍາດມາໄດ້ໃນສະໄໝຜ່ານມາ, ຮຽກຮ້ອງໃຫ້ຄະນະໜ່ວຍຊຸດໃໝ່ ສືບຕໍ່ນຳພາສະມາຊິກເສີມຂະຫຍາຍມູນເຊື້ອ, ຜົນສໍາເລັດດັ່ງກ່າວ ແລະ ເອົາໃຈໃສ່ແກ້ໄຂຂໍ້ຄົງຄ້າງ ໃຫ້ດີຂຶ້ນເທື່ອລະກ້າວ; ໄດ້ເນັ້ນໜັກໃຫ້ສືບຕໍ່ຍົກສູງດ້ານການເມືອງ-ແນວຄິດ ໃຫ້ໜັກແໜ້ນ ຕາມຄາດໝາຍທີ່ວາງໄວ້.