ຄະນະຜູ້ແທນ ຄະນະພົວພັນຕ່າງປະເທດສູນກາງພັກກອມມູນິດຈີນ ຢ້ຽມຢາມ ແລະ ເຮັດວຽກ ຢູ່ ສປປ ລາວ

ເຜີຍ​ແຜ່​ໂດຍ​: moderator ເວ​ລາ: 19/12/2024 14:38:41 ຈຳ​ນວນ​​ຢ້ຽມ​ຊົມ 58 ຄັ້ງ ​

       ໂດຍປະຕິບັດຕາມແຜນການຮ່ວມມື ລະຫວ່າງ ຄະນະພົວພັນຕ່າງປະເທດ ຂອງ 2 ສູນກາງພັກ ລາວ-ຈີນ ປະຈຳປີ 2024, ຄະນະຜູ້ແທນ ຂອງ ຄະນະພົວພັນຕ່າງປະເທດສູນກາງພັກກອມມູນິດຈີນ ນຳໂດຍ ສະຫາຍ ນາງ ຮວງ ອີ້ຮົວ (Huang Yihua), ຮອງເລຂາໜ່ວຍພັກ, ຜູ້ປະຈໍາການ ຄະນະກໍາມະການວຽກງານພັກ ຂອງ ຄະນະພົວພັນຕ່າງປະເທດສູນກາງພັກກອມມູນິດຈີນ ພ້ອມດ້ວຍຄະນະ ທັງໝົດ 05 ສະຫາຍ ມາຢ້ຽມຢາມ ແລະ ເຮັດວຽກຢູ່ ສປປ ລາວ ແຕ່ວັນທີ 16-19 ທັນວາ 2024.

      ໃນວັນທີ 17 ທັນວາ 2024, ສະຫາຍ ນາງ ຮວງ ອີ້ຮົວ ພ້ອມດ້ວຍຄະນະ ໄດ້ເຂົ້າຢ້ຽມຂໍ່ານັບ ສະຫາຍ ບຸນເຫຼືອ ພັນດານຸວົງ, ຮັກສາການ ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ, ເຊິ່ງໃນໂອກາດດັ່ງກ່າວ ສະຫາຍ ບຸນເຫຼືອ ພັນດານຸວົງ ໄດ້ສະແດງຄວາມຄວາມຍີນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ-ເຮັດວຽກ ຢູ່ ສປປ ລາວ ຂອງຄະນະໃນຄັ້ງນີ້, ໂດຍສະເພາະແມ່ນ ການພົບປະແລກປ່ຽນບົດຮຽນ ກັບກົມກ່ຽວຂ້ອງ ຂອງຄະນະພົວພັນຕ່າງປະເທດສູນກາງພັກ, ຄະນະຈັດຕັ້ງສູນກາງພັກ ແລະ ຄະນະໂຄສະນາອົບຮົມສູນກາງພັກ ປປ ລາວ ກ່ຽວກັບ ການກໍ່ສ້າງພັກ; ໄດ້ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ ລາວ-ຈີນ ໃນໄລຍະຜ່ານມາ, ກໍຄືການປະສານສົມທົບກັນ ລະຫວ່າງ 2 ຄະນະພົວພັນຕ່າງປະເທດສູນກາງພັັກ ລາວ-ຈີນ ທີ່ໄດ້ປະກອບສ່ວນສຳຄັນ ໃນການຈັດຕັ້ງປະຕິບັດແຜນແມ່ບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ, ແຜນການຮ່ວມມື ລະຫວ່າງ ສອງພັກ ແລະ ການຈັດຕັ້ງຜັນຂະຫຍາຍບັນດາເນື້ອໃນຈິດໃຈ ທີ່ການນຳຂັ້ນສູງ ຂອງສອງພັກ, ສອງລັດ ລາວ-ຈີນ ໄດ້ຕົກລົງເປັນເອກະພາບກັນ ໃຫ້ປະກົດຜົນເປັນຈິງ. ສະຫາຍ ບຸນເຫຼືອ ພັນດານຸວົງ ຍັງໄດ້ສະແດງຄວາມໝາຍໝັ້ນທີ່ຈະສືບຕໍ່ຮ່ວມກັນກັບ ຄະນະພົວພັນຕ່າງປະເທດສູນກາງພັກກອມມູນິດຈີນ ໃນການເປັນເສນາທິການດ້ານການຕ່າງປະເທດໃຫ້ແກ່ 2 ສູນກາງພັກ ລາວ-ຈີນ ເພີ່ມພູນຄູນສ້າງສາຍພົວພັນຮ່ວມມືຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ຂອງ 2 ຊາດ ລາວ-ຈີນ ກໍຄື ການຊຸກຍູ້ຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ໃຫ້ເກີດດອກອອກຜົນໃນລະດັບສູງກວ່າເກົ່າ ແລະ ຕາງໜ້າ ພັກ-ລັດລາວ ສະແດງຄວາມຂອບໃຈ ພັກ-ລັດຈີນ ທີ່ໄດ້ໃຫ້ການຊ່ວຍເຫຼືອ ສປປ ລາວ ຕະຫຼອດໄລຍະຜ່ານມາ, ໂດຍສະເພາະໃນການເປັນປະທານອາຊຽນ 2024.

       ສະຫາຍ ນາງ ຮວງ ອີ້ຮົວ, ໄດ້ສະແດງຄວາມຂອບໃຈຕໍ່ ສະຫາຍ ບຸນເຫຼືອ ພັນດານຸວົງ ທີ່ໃຫ້ກຽດຕ້ອນຮັບຄະນະ ແລະ ໄດ້ລາຍງານຜົນການພົບປະ-ເຮັດວຽກ ກັບພາກສ່ວນກ່ຽວຂ້ອງຂອງຝ່າຍລາວ ໃຫ້ຊາບ, ລວມທັງບົດຮຽນຂອງຝ່າຍຈີນ ກ່ຽວກັບ ການກໍ່ສ້າງພັກ ຂອງບັນດາອົງການອ້ອມຂ້າງສູນກາງພັກ; ໄດ້ຕີລາຄາສູງ ຕໍ່ການພົວພັນຮ່ວມມືສອງຝ່າຍໃນໄລຍະຜ່ານມາ ໂດຍສະເພາະແມ່ນ ການພົວພັນຮ່ວມມືທາງດ້ານການເມືອງ ກໍຄື ການຈັດຕັ້ງປະຕິບັດ ແຜນແມ່ບົດວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ ແລະ ແຜນການຮ່ວມມື ລະຫວ່າງ ສອງພັກ ໃຫ້ນັບມື້ນັບແຕກດອກອອກຜົນຍິ່ງໆຂຶ້ນ.

       ໃນໂອກາດມາຢ້ຽມຢາມ ສປປ ລາວ ຄັ້ງນີ້, ສະຫາຍ ນາງ ຮວງ ອີ້ຮົວ ພ້ອມດ້ວຍຄະນະ ຍັງໄດ້ຢ້ຽມຢາມແຂວງຫຼວງພະບາງ, ໂດຍໄດ້ເຂົ້າຢ້ຽມຂໍ່ານັບ ສະຫາຍ ບຸນເລື່ອມ ມະນີວົງ, ກໍາມະການປະຈໍາພັກແຂວງ, ຮອງເຈົ້າແຂວງຫຼວງພະບາງ; ນອກນັ້ນ ຄະນະຍັງໄດ້ທັດສະນະສຶກສາການກໍ່ສ້າງພັກຮາກຖານ ຢູ່ລັດວິສາຫະກິດ ແລະ ບ້ານ ຈໍານວນໜຶ່ງ ຢູ່ນະຄອນຫຼວງວຽງຈັນ ແລະ ແຂວງຫຼວງພະບາງ.

---