ຄະນະພົວພັນຕ່າງປະເທດສູນກາງພັກ

ຄະນະພົວພັນຕ່າງປະເທດສູນກາງພັກ ປາຖະກະຖາ ວັນຊາດທີ 02 ທັນວາ ຄົບຮອບ 49 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ

ເຜີຍແຜ່ໂດຍ: moderator ເວລາ: 19/12/2024 14:27:24 ຈຳນວນຢ້ຽມຊົມ 25 ຄັ້ງ

ໃນວັນທີ 19 ທັນວາ 2024 ຢູ່ທີ່ ສຳນັກງານຄະນະພົວພັນຕ່າງປະເທດສູນກາງພັກ ໄດ້ຈັດ ພິທີປາຖະກະຖາ ວັນສະຖາປະນາ ສປປ ລາວ ຄົບຮອບ 49 ປີ (02 ທັນວາ 1975 – 02 ທັນວາ 2024) ແລະ ວັນຄ້າຍວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ( 13 ທັນວາ 1920 - 13 ທັນວາ 2024). ໃຫ້ກຽດເປັນປະທານ ແລະ ເລົ່າມູນເຊື້ອໂດຍ ສະຫາຍ ບຸນເຫຼືອ ພັນດານຸວົງ, ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ; ມີ ບັນດາສະຫາຍໃນຄະນະບໍລິຫານງານພັກ, ຄະນະກົມ, ຄະນະພະແນກ ແລະ ພະນັກງານວິຊາການ ຂອງ ຄະນະພົວພັນຕ່າງປະເທດສູນກາງພັກ ເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍ ບຸນເຫຼືອ ພັນດານຸວົງ, ໄດ້ຍົກໃຫ້ເຫັນເຖິງມູນເຊື້ອ ແລະ ຄວາມໝາຍສໍາຄັນ ຂອງວັນຊາດທີ 02 ທັນວາ ແມ່ນວັນແຫ່ງໄຊຊະນະອັນຍິ່ງໃຫຍ່ ໃນປະຫວັດສາດ ຂອງຊາດລາວເຮົາ, ແມ່ນວັນທີ່ປະເທດລາວໄດ້ມີເອກະລາດ ຢ່າງສົມບູນ ແລະ ມີອະທິປະໄຕ ຢ່າງຄົບຖ້ວນ ແລະ ມີຖານະເທົ່າທຽມກັບ ປະເທດອື່ນໆ ໃນເວທີປະຊາຄົມໂລກ. ພ້ອມນັ້ນ, ຍັງໄດ້ຍົກໃຫ້ເຫັນເຖິງຜົນສໍາເລັດ ແລະ ຄວາມກ້າວໜ້າ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ຂອງພັກ, ລັດຖະບານ ຂອງ ສປປ ລາວ ຕະຫຼອດໄລຍະ 49 ປີ ທີ່ຜ່ານມາ ທີ່ໄດ້ມີການເຕີບໃຫຍ່ ແລະ ຂະຫຍາຍຕົວຢ່າງຕໍ່ເນື່ອງ.

ໂອກາດດັ່ງກ່າວ, ສະຫາຍ ບຸນເຫຼືອ ພັນດານຸວົງ, ຍັງໄດ້ຫວນຄືນຊີວິດ ແລະ ມູນເຊື້ອການເຄື່ອນໄຫວ ປະຕິວັດ ແລະ ຜົນງານການຊີ້ນໍາ ຂອງ ປະທານ ໄກສອນ ພົມວິຫານ, ຍົກໃຫ້ເຫັນມູນເຊື້ອອັນອົງອາດ ກ້າຫານ, ຄວາມປີຊາສາມາດ, ເພີ່ນແມ່ນນັກຮົບປະຕິວັດ ທີ່ດີເດັ່ນ ທັງເປັນຜູ້ນໍາສູງສຸດ ຂອງການປະຕິວັດ, ເຊິ່ງ ລູກຫຼານ, ຊາວໜຸ່ມຮຸ່ນສືບທອດຈະຕ້ອງຕັ້ງໜ້າຮໍ່າຮຽນເອົາແບບຢ່າງອັນດີງາມ, ຄຸນສົມບັດສິນທຳປະຕິວັດຂອງ ປະທານ ໄກສອນ ພົມວິຫານ.

ການປະຖະກະຖາ ໃນຄັ້ງນີ້, ແມ່ນໄດ້ເຮັດໃຫ້ສະມາຊິກພັກ ແລະ ພະນັກງານ ຄະນະພົວພັນຕ່າງປະເທດສູນກາງພັກ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງເຖິງມູນເຊື້ອປະຫວັດສາດ ແຫ່ງການກຳເນີດ ແລະ ເຕີບໃຫຍ່ ຂະຫຍາຍຕົວ ຂອງພັກ, ຂອງຊາດລາວເຮົາ ໃນການສ້າງສາພັດທະນາປະເທດຊາດ ໃນຕະຫຼອດ 49 ປີ ຜ່ານມາ, ພ້ອມທັງໄດ້ສຶກສາຮໍ່າຮຽນເອົາເປັນແບບຢ່າງ ດ້ານຄຸນທາດການເມືອງ, ຄຸນສົມບັດສິນທຳປະຕິວັດ, ການດໍາລົງຊີວິດແບບລຽບງ່າຍ ແລະ ນໍ້າໃຈຮັກເຊື້ອແພງຊາດ ຂອງ ປະທານ ໄກສອນ ເພື່ອຝຶກຝົນຫຼໍ່ຫຼອມຕົນເອງໃຫ້ກາຍເປັນພະນັກງານມີຄຸນສົມບັດສິນທຳປະຕິວັດ, ມີນ້ຳໃຈເສຍສະຫຼະ, ຄວາມສາມັກຄີ, ມີຄວາມຮູ້ກວ້າງຂວາງ, ສາມາດຕອບສະໜອງໄດ້ ຄວາມຮຽກຮ້ອງຕ້ອງການຂອງໜ້າທີ່ການເມືອງທີ່ໄດ້ຮັບມອບໝາຍໃນໄລຍະໃໝ່.