ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ຕ້ອນຮັບການເຂົ້າ ຢ້ຽມຂໍ່ານັບຂອງເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈໍາ ສປປ ລາວ.

ເຜີຍ​ແຜ່​ໂດຍ​: moderator ເວ​ລາ: 18/12/2024 15:37:57 ຈຳ​ນວນ​​ຢ້ຽມ​ຊົມ 35 ຄັ້ງ ​

​​     ໃນ​​​ວັນ​ທີ 18 ທັນວາ 2024, ທີ່​​ ສຳນັກງານຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ, ທ່ານ ບຸນເຫຼືອ ພັນດານຸວົງ, ຮັກສາການຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຕ້ອນຮັບການ​ເຂົ້າ​ຢ້ຽມ​ຂໍ່ານັບ​ຂອງ ​ທ່ານ ​ນາງ ມໍ​ຣະ​ກົດ ສີ​ສະ​ຫວັດດີ, ເອກອັກຄະ​ຣາ​ຊະທູດ ວິສາມັນ ຜູ້ມີອໍານາດເຕັມ ແຫ່ງ ຣາຊະອານາຈັກໄທ ປະຈໍາ ສປປ ລາວ.

     ໃນໂອກາດດັ່ງກ່າວ, ທ່ານ ນາງ ມໍຣະກົດ ສີສະຫວັດດີ, ໄດ້ສະ​ແດງ​ຄວາມຍິນດີ ແລະ ​ຊົມ​ເຊີຍຕໍ່ ທ່ານ ບຸນເຫຼືອ ພັນດານຸວົງ ທີ່​ໄດ້​ຮັບ​ມອບ​ໝາຍ​ໜ້າ​ທີ່ອັນສໍາຄັນ​ໃຫ້ດໍາລົງຕໍາແໜ່ງເປັນຮັກສາການ ຫົວໜ້າຄະນະພົວພັນຕ່າງປະເທດສູນກາງພັກ ແລະ ເຊື່ອໝັ້ນວ່າ ດ້ວຍປະ​ສົບ​ການ​ອັນ​ອຸ​ດົມ​ສົມບູນ​ຂອງທ່ານຈະສືບຕໍ່ຊຸກຍູ້ການປະສານສົມທົບ ລະຫວ່າງ ຄະນະພົວພັນຕ່າງປະເທດສູນກາງພັກ ແລະ ​ສະຖານທູດໄທ ເພື່ອປະ​ກອບ​ສ່ວນ​ເຂົ້າໃນ​ການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ໄທ-ລາວ ຖານບ້ານໃກ້ເຮືອນຄຽງໃຫ້ນັບມື້ນັບແໜ້ນແຟ້ນຍິ່ງໆຂຶ້ນ.

     ທ່ານ ບຸນເຫຼືອ ພັນດານຸວົງ ​ໄດ້​ສະແດງຄວາມຂອບໃຈ ແລະ ຕີ​ລາ​ຄາ​ສູງ ​ຕໍ່​ການ​ພົວ​ພັນ​ຮ່ວມ​ມື​ ລາວ-ໄທ ໃນ​ໄລ​ຍະ​ຜ່ານ​ມາ, ແຈ້ງ​ໃຫ້​ຊາບ​ ພາ​ລະ​ບົດ​ບາດ ​ຂອງຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໃນ​ການ​ເປັນ​ເສ​ນາ​ທິ​ການ​ດ້ານ​ການ​ຕ່າງ​ປະ​ເທດໃຫ້​ແກ່​ສູນ​ກາງ​ພັກ ປະຊາຊົນ​ ປະຕິວັດລາວ, ການ​ພົວ​ພັນ​ດ້ານ​ການ​ທູດ​ປະ​ຊາ​ຊົນ ກໍ​ຄື​ ວຽກງານສະ​ມາ​ຄົມ​ມິດ​ຕະ​ພາບ ລາວ-ໄທ ຕະຫຼອດໄລຍະ 3 ທົດສະວັດທີ່ຜ່ານມາ ທີ່ມີ​ບົດບາດ​​ຂະ​ຫຍາຍ​ຕົວ​ເປັນກ້າວໆ ເຊິ່ງໄດ້ປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການເພີ່ມທະວີການ​ພົວ​ພັນ​ຮ່ວມ​ມື ລະ​ຫວ່າງ ​ສອງ​ປະ​ເທດ ກໍຄື ການ​ສ້າງ​ຄວາມ​ເຂົ້າ​ອົກ​ເຂົ້າ​ໃຈ, ການໄປມາຫາສູ່ເພື່ອສົ່ງ​ເສີມ​​ການ​ຄ້າ​, ການ​ລົງ​ທຶນ, ການ​ທ່ອງ​ທ່ຽວ ແລະ ​ອື່ນໆ;  ສະ​ແດງ​ຄວາມຍິນ​ດີ​ ແລະ ໃຫ້​ການ​ສະ​ໜັບ​ສະ​ໜູນ​ທ່​ານ​ທູດ​ ໃນ​ການ​ປະ​ຕິ​ບັດ​ໜ້າ​ທີ່​ການ​ທູດ​ ຢູ່ ສ​ປ​ປ ລາວ, ເພື່ອພ້ອມກັນສືບຕໍ່ປະ​ກອບ​ສ່ວນເຂົ້າ​ໃນ​ການ​ຊຸກ​ຍູ້​ ສາຍ​ພົວ​ພັນ​ມິດ​ຕະ​ພາບ ​ລາວ-ໄທ ໃຫ້​ນັບ​ມື້ນັບ​ມີ​ການ​ຂະ​ຫຍາຍ​ຕົວ​ຍິ່ງໆ​ຂຶ້ນ ເພື່ອ​ນຳ​ເອົາ​ຜົນ​ປະ​ໂຫຍດ​ຕົວ​ຈິງ​ມາ​ສູ່​ປະ​ຊາ​ຊົນສອງ​ຊາດ ລາວ-ໄທ.

​     ໃນໂອກາດນີ້, ສອງຝ່າຍເຫັນດີເປັນເອກະພາບຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືຕະຫຼອດໄລຍະຜ່ານມາ ຊຶ່ງໃນປີ 2025 ນີ້ ຈະໄດ້ຮ່ວມກັນກະກຽມສະເຫຼີມສະຫຼອງຄົບຮອບ 75 ປີ ແຫ່ງການສ້າງຕັ້ງສາຍພົວພັນການທູດໂດຍການສົ່ງເສີມກົນໄກການຮ່ວມມື ລະຫວ່າງສອງປະເທດດ້ວຍຫຼາຍຮູບແບບ, ພິເສດ ແມ່ນ ການກະກຽມເປີດຂົວມິດຕະພາບ ລາວ-ໄທ ແຫ່ງທີ 5 ຊຶ່ງຈະກາຍເປັນຈຸດເຊື່ອມຕໍ່ໃໝ່ຂອງປະຊາຊົນສອງຊາດໃຫ້ມີຄວາມໃກ້ຊິດ, ສະໜິດສະໜົມຍິ່ງຂຶ້້ນຕື່ມ.

---