ຄະນະພົວພັນຕ່າງປະເທດສູນກາງພັກ

ຮັກສາການຫົວໜ້າ ຄະນະພົວພັນຕ່າງປະເທດສູນກາງພັກ ຕ້ອນຮັບ ທູດອັງກິດ ຄົນໃໝ່ ປະຈໍາ ສປປ ລາວ ເຂົ້າຢ້ຽມຂໍ່ານັບ

ເຜີຍແຜ່ໂດຍ: moderator ເວລາ: 10/12/2024 13:55:35 ຈຳນວນຢ້ຽມຊົມ 81 ຄັ້ງ

ໃນຕອນເຊົ້າຂອງ ວັນທີ 10 ທັນວາ 2024, ທີ່ ສຳນັກງານ ຄະນະພົວພັນຕ່າງປະເທດສູນກາງພັກ, ທ່ານ ບຸນເຫຼືອ ພັນດານຸວົງ, ຮັກສາການ ຫົວໜ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂ່ຳນັບຂອງ ທ່ານ ນ. ເມວ ບາຣໂລ (Mel Barlow), ເອກອັກຄະລັດຖະທູດ ວິສາມັນ ຜູ້ມີອໍານາດເຕັມ ແຫ່ງ ຣາຊະອານາຈັກອັງກິດ ແລະ ອຽກລັງເໜືອ ໃນໂອກາດມາດໍາລົງຕໍາແໜ່ງເປັນ ເອກອັກຄະຣາຊະທູດຄົນໃໝ່ ປະຈໍາ ສປປ ລາວ, ພ້ອມທັງຊົມເຊີຍ ທ່ານ ບຸນເຫຼືອ ພັນດານຸວົງ ໃນໂອກາດໄດ້ຮັບການແຕ່ງຕັ້ງເປັນ ຮັກສາການ ຫົວໜ້າຄະນະພົວພັນຕ່າງປະເທດສູນກາງພັກ.

ໃນການພົບປະ, ທ່ານ ບຸນເຫຼືອ ພັນດານຸວົງ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທ່ານທູດທີ່ໄດ້ມາປະຕິບັດໜ້າທີ່ຢ່າງຫ້າວຫັນ ຢູ່ ສປປ ລາວ ເປັນເວລາ 01 ປີກວ່າແລ້ວ; ພ້ອມນີ້, ໄດ້ຕີລາຄາສູງຕໍ່ສາຍພົວພັນອັນດີ ລະຫວ່າງ ລາວ ແລະ ອັງກິດ ຕະຫຼອດໄລຍະ 69 ປີ ຜ່ານມາ, ເຊິ່ງໄດ້ປະກອບສ່ວນສໍາຄັນເຂົ້າໃນການສ້າງສາພັດທະນາຂອງສອງປະເທດ; ໄດ້ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊົນອັງກິດ ທີ່ໃຫ້ການຊ່ວຍເຫຼືອແກ່ ລັດຖະບານ ແລະ ປະຊາຊົນລາວ ໂດຍສະເພາະ ຂະແໜງການສຶກສາ, ສາທາລະນະສຸກ, ການເກັບກູ້ລະເບີດທີ່ບໍ່ທັນແຕກ (UXO), ພະລັງງານສະອາດ ລວມທັງການຮ່ວມມື ກ່ຽວກັບ ບັນຫາການປ່ຽນແປງສະພາບດິນຟ້າອາກາດ ແລະ ອື່ນໆ. ໄດ້ສະແດງຄວາມເຊື່ອໝັ້ນວ່າ ໃນໄລຍະທ່ານທູດມາປະຕິບັດໜ້າທີ່ ຢູ່ ສປປ ລາວ ຈະມີການຮ່ວມມືກັນຢ່າງໃກ້ຊິດ ກັບ ຄະນະພົວພັນຕ່າງປະເທດສູນກາງພັກ ກໍຄື ພາກສ່ວນຕ່າງໆຂອງຝ່າຍລາວ ເພື່ອປະກອບສ່ວນເຂົ້າໃນການສົ່ງເສີມສາຍພົວພັນຮ່ວມມື ລະຫວ່າງ ສອງປະເທດ ລາວ-ອັງກິດ ໃຫ້ເຕີບໃຫຍ່ຂະຫຍາຍຕົວຍິ່ງໆຂຶ້ນ.

ທ່ານ ນ. ເມວ ບາຣໂລ ໄດ້ສະແດງຄວາມຂອບໃຈຢ່າງຈິງໃຈຕໍ່ ທ່ານ ບຸນເຫຼືອ ພັນດານຸວົງ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງຊົມເຊີຍການເຂົ້າມາຮັບໜ້າທີ່ໃໝ່ຂອງທ່ານ ແລະ ໄດ້ຕີລາຄາສູງຕໍ່ຜົນສຳເລັດຂອງ ສປປ ລາວ ໃນການເປັນເຈົ້າພາບກອງປະຊຸມສຸດຍອດອາຊຽນ ຄັ້ງທີ 44-45 ແລະ ກອງປະຊຸມສຸດຍອດທີ່ກ່ຽວຂ້ອງ. ພ້ອມນັ້ນ, ທ່ານທູດ ໄດ້ຢືນຢັນວ່າຈະສືບຕໍ່ປະສານງານ ແລະ ຮ່ວມມືກັບພາກສ່ວນຕ່າງໆທີ່ກ່ຽວຂ້ອງຂອງຝ່າຍລາວ ເພື່ອເສີມຂະຫຍາຍການຮ່ວມມືໃຫ້ປະສົບຜົນສໍາເລັດຕາມຄາດໝາຍ ເພື່ອຜົນປະໂຫຍດຂອງສອງຝ່າຍ ກໍຄື ເພື່ອພາລະກິດ ສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາຢູ່ໃນພາກພື້ນ ແລະ ໃນໂລກ.