ຄະນະພົວພັນຕ່າງປະເທດສູນກາງພັກ ຕ້ອນຮັບເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສສ ຫວຽດນາມ ເຂົ້າອວຍພອນວັນຊາດລາວ ຄົບຮອບ 49 ປີ

ເຜີຍ​ແຜ່​ໂດຍ​: moderator ເວ​ລາ: 26/11/2024 11:01:09 ຈຳ​ນວນ​​ຢ້ຽມ​ຊົມ 148 ຄັ້ງ ​

        ໃນ​ຕອນ​ບ່າຍ​ຂອງ​ວັນ​ທີ 25 ພະ​ຈິກ 2024, ​ທີ່​ ສຳ​ນັກ​ງານ​ຂອງ ຄ​ະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ, ສະ​ຫາຍ ບຸນເຫຼືອ ພັນດານຸວົງ, ຮັກສາການ ຫົວ​ໜ້າຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາ​ງ​ພັກ ໄດ້​ຕ້ອນ​ຮັບ ສະ​ຫາຍ ຫວງຽນ ມິງ ເຕີມ, ເອ​ກ​ອັກ​ຄະ​ລັດ​ຖະ​ທູດວິ​ສາ​ມັນ​ຜູ້​ມີ​ອຳນາດ​ເຕັມ ແຫ່ງ ສ​ສ ຫວຽດ​ນາມ ປະ​ຈຳ  ສ​ປ​ປ ລາວ ພ້ອມ​ດ້ວຍ​ພະ​ນັກ​ງານ​ສະ​ຖານ​ທູດ ທີ່ໄດ້​ມາ​ອວຍ​ພອນ ຄະ​ນະ​ພັກ, ຄະ​ນະ​ນຳ  ແລະ ພະ​ນັກ​ງານ ຄະ​ນະ​ພົວ​ພັນ​ຕ່າງ​ປະ​ເທ​ດ​ສູນ​ກາງ​ພັກ ເນື່ອງ​ໃນ​ໂອ​ກາດ ​ວັນ​ສະ​ຖາ​ປະ​ນາ ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ ປະ​ຊາ​ຊົນ​ລາວ ຄົບ​ຮອບ 49 ປີ.

     ໂອ​ກາດນີ້, ສະ​ຫາຍ ບຸນເຫຼືອ ພັນດານຸວົງ ໄດ້ສະ​ແດງ​ຄວາມ​ປິ​ຕິ​ຊົມ​ຊື່ນ ​ທີ່​ໄດ້​ຕ້ອນ​ຮັບ​ສະ​ຫາຍທູດ ພ້ອມ​ດ້ວຍ​ຄະ​ນະ, ​ເຊິ່ງ​ໄດ້​ນຳ​ເອົາ​ໄມ​ຕີ​ຈິດ​ມິດ​ຕະ​ພາບ​ອັນ​ດູດ​ດື່ມ, ຄວາມ​ສະ​ໜິດ​ສະ​ໜົມ, ຄຳ​ອວຍ​ພອນ​ໄຊ​ອັນ​ປະ​ເສີດ ​ຖານ​ສະ​ຫາຍ​ອ້າຍ​ນ້ອງ ລາວ-ຫວຽດ​ນາມ ມາ​ສູ່​ຄະ​ນະ​ພັກ, ຄະ​ນະ​ນຳ ກໍ່​ຄື ພະ​ນັກ​ງານ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາ​ງ​ພັກ, ເຊິ່ງ​​ເປັນ​ການສະ​ແດງໃຫ້​ເຫັນເຖິງ​ຄວາມ​ມີ​ຊີ​ວິດ​ຊີ​ວາ ​ຂອງ​ສາຍ​ພົ​ວ​ພັນ​ມິດ​ຕະ​ພາບ​ອັນ​ຍິ່ງ​ໃຫຍ່, ຄວາມ​ສາ​ມັກ​ຄີ​ພິ​ເສດ ແລະ ການ​ຮ່ວມ​ມື​ຮອບ​ດ້ານ ລາວ-ຫວຽດ​ນາມ, ພ້ອມທັງທົບທວນຄືນມູນເຊື້ອວັນຊາດ ທີ 2 ທັນວາ ແລະ ສະແດງຄວາມຂອບໃຈໄປຍັງ ພັກ, ລັດ​ຖະ​ບານ ແລະ ປະ​ຊາ​ຊົນ​ຫວຽດ​ນາມ​ ທີ່ໃຫ້ການສະໜັບສະໜູນຊ່ວຍເຫຼືອອັນໃຫຍ່ຫຼວງ, ລໍ້າຄ່າ, ທັນການ ແລະ ມີປະສິດທິຜົນ ແກ່​ພັກ, ລັດ​ຖະ​ບານ ແລະ ປະ​ຊາ​ຊົນ​ລາວ ບັນ​ດາ​ເຜົ່າ ດຳ​ເນີນ​ພາ​ລະ​ກິດ​ຕໍ່​ສູ້​ປົດ​ປ່ອຍ​ປະ​ເທດ​ຊາດ ໃນ​ເມື່ອ​ກ່ອນ ກໍ່​ຄື ​ພາ​ລະ​ກິດປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ​ໃນ​ປັດຈຸ​ບັນ; ຕີ​ລາ​ຄາສູງ ຕໍ່​ການ​​ເຮັດ​ວຽກຢ່າງ​ຫ້າວ​ຫັນ ຂອງ​ສະ​ຫາຍ​ທູດ ແລະ ພະ​ນັກ​ງານສະ​ຖານ​ທູດ ໃນ​ການ​ປະ​ສານ​ສົມ​ທົບ ແລະ ເປັນ​ຂົວ​ຕໍ່​ໃນ​ການ​ພົວ​ພັນ​ຮ່ວມ​ມື ໃນ​ຂົງ​ເຂດ​ຕ່າງໆ, ເຊິ່ງ​ໄດ້​ປະ​ກອບ​ສ່ວນ​ສຳ​ຄັນ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງ​ສາຍ​ພົວ​ພັນ​ມິດ​ຕະ​ພາບ ອັນ​ຍິ່ງ​ໃຫຍ່, ຄວາມ​ສາ​ມັກ​ຄີ​ພິ​ເສດ, ການ​ຮ່ວມ​ມື​ຮອບ​ດ້ານ​ລະ​ຫວ່າງ ສອງ​ພັກ, ສ​ອງ​ລັດ ແລະ​ ປະ​ຊ​າ​ຊົນ​ສອງ​ຊາດ ລາວ-ຫວຽດ​ນາມ.

     ສະ​ຫາຍ ຫງວຽນ ມິງ ເຕີມ, ໄດ້​ສະ​ແດງ​ຄວາມ​ຂອບ​ໃຈຕໍ່ການຕ້ອນຮັບ, ດີ​ໃຈ​ເປັນຢ່າງຍິ່ງທີ່​ໄດ້​ມາ​ ຊົມເຊີຍ ແລະ ອວຍ​ພອນ ຄະ​ນະ​ພັກ, ຄະ​ນະ​ນຳ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໃນ​ໂອ​ກາດ ວັນ​ຊາດ ຄົບ​ຮອບ 49 ປີ ແລະ ໄດ້​ສະ​ແດງ​ຄວາມ​ປິ​ຕິ​ຊົມ​ເຊີຍ ແລະ ຕີ​ລາ​ຄາ​ສູງ​ຕໍ່​ຜົນ​ສຳ​ເລັດ ທີ່​ພັກ, ລັດ ແລະ ປະ​ຊ​າ​ຊົນ​ລາວ ບັນ​ດາ​ເຜົ່າ ​ຍາດ​ມາ​ໄດ້​ຕະຫຼອດໄລຍະຜ່ານ​ມາ ພາຍ​ໃຕ້​ກາ​ນ​ນຳ​ພາ​ອັນ​ສະຫຼາດ​ສ່ອງ​ໃສ ຂອງ​ພັກປະ​ຊາ​ຊົນ​ປະ​ຕິ​ວັດ​ລາວ ໃນ​ພາ​ລະ​ກິດປົກ​ປັກ​ຮັກ​ສາ ແລະ ​ສ້າງ​ສາພັດ​ທະ​ນາ​ປະ​ເທດ​ຊາດ, ເຮັດໃຫ້ ສປປ ລາວ ສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ, ເສດຖະກິດຍັງສືບຕໍ່ມີທ່າອ່ຽງເຕີບໂຕ ແລະ ຂະຫຍາຍຕົວຕໍ່ເນື່ອງ, ບົດບາດຂອງປະເທດໄດ້ຮັບການຍົກສູງພົ້ນເດັ່ນຂຶ້ນ ໃນເວທີພາກພື້ນ ແລະ ສາກົນ.

      ສອງຝ່າຍ ຕ່າງກໍ່ໄດ້ຕີລາຄາສູງຕໍ່ ການພົວພັນຮ່ວມມືລະຫວ່າງ ສອງພັກ, ສອງລັດ ສືບຕໍ່ໄດ້ຮັບການເພີ່ມທະວີຢ່າງບໍ່ຢຸດຢັ້ງ ແລະ ກ້າວສູ່ລວງເລິກໃນທຸກຂົງເຂດວຽກງານ, ສອງຝ່າຍ ມີການແລກປ່ຽນການຢ້ຽມຢາມເຊິ່ງກັນແລະກັນ ລະຫວ່າງ ການນໍາຂັ້ນສູງ ຂອງສອງພັກ, ສອງລັດ ແລະ ຂັ້ນຕ່າງໆ ນັບແຕ່ສູນກາງຈົນເຖິງທ້ອງຖິ່ນ, ມີການແລກປ່ຽນບົດຮຽນທາງດ້ານທິດສະດີ ແລະ ພຶດຕິກໍາ, ວຽກງານກໍ່ສ້າງພັກ, ສ້າງລະບົບການເມືອງໃຫ້ເຂັ້ມແຂງ; ສໍາເລັດການຈັດຊຸດຄົ້ນຄວ້າ ແລະ ແລກປ່ຽນຫົວຂໍ້ສະເພາະ ສໍາລັບພະນັກງານຂັ້ນຕ່າງໆ ປະຈໍາປີ 2024 ຢູ່ ສສ ຫວຽດນາມ.

        ສອງຝ່າຍ ເຫັນດີສືບຕໍ່ຮ່ວມມື ແລະ ປະສານສົມທົບຢ່າງສະໜິດແໜ້ນ ໃນການຊຸກຍູ້ການຈັດຕັ້ງຜັນຂະຫຍາຍ ບັນດາຂໍ້ຕົກລົງຂອງການນໍາຂັ້ນສູງ ພັກ, ລັດ ກໍ່ຄື ບັນດາຖະແຫຼງການຮ່ວມສອງຝ່າຍ, ບັນດາສັນຍາຂໍ້ຕົກລົງຂອງສອງລັດຖະບານ ລາວ-ຫວຽດນາມ ແລະ ບັນດາໂຄງການຮ່ວມມື, ລົງທຶນ ແລະ ຊ່ວຍເຫຼືອ ທີ່ສອງຝ່າຍ ໄດ້ເປັນເອກະພາບກັນ ປະກອບສ່ວນເຂົ້າໃນການ ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ໃຫ້ນັບມື້ຂະຫຍາຍຕົວຢ່າງບໍ່ຢຸດຢັ້ງ.

---