ຄະນະພົວພັນຕ່າງປະເທດສູນກາງພັກ

ມອບ-ຮັບໜ້າທີ່ ຫົວໜ້າຄະນະພົວພັນຕ່າງປະເທດສູນກາງພັກ

ເຜີຍແຜ່ໂດຍ: moderator ເວລາ: 22/11/2024 13:59:25 ຈຳນວນຢ້ຽມຊົມ 193 ຄັ້ງ

ໃນຕອນເຊົ້າຂອງວັນທີ 22 ພະຈິກ 2024 ຢູ່ທີ່ ສຳນັກງານຄະນະພົວພັນຕ່າງປະເທດສູນກາງພັກ (ຄຕພ)ໄດ້ມີພິທີມອບ-ຮັບໜ້າທີ່ ລະຫວ່າງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ (ຜູ້ເກົ່າ) ກັບ ສະຫາຍ ບຸນເຫຼືອ ພັນດານຸວົງ, ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ໂດຍການໃຫ້ກຽດເປັນປະທານ ຂອງ ສະຫາຍ ນາງ ສີໃສ ລືເດດມູນສອນ, ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີບັນດາການນໍາ ຈາກອົງການຈັດຕັ້ງພັກ ແລະ ອົງການຈັດຕັ້ງມະຫາຊົນ ອ້ອມຂ້າງສູນກາງພັກ, ກະຊວງການຕ່າງປະເທດ, ບັນດາຜູ້ຕາງໜ້າສະມາຄົມມິດຕະພາບລາວກັບຕ່າງປະເທດ, ຄະນະສັນຕິພາບ ແລະ ສາມັກຄີຂອງລາວ, ພ້ອມດ້ວຍ ບັນດາສະມາຊິກພັກ ແລະ ພະນັກງານຂອງ ຄະນະພົວພັນຕ່າງປະເທດສູນກາງພັກ ເຂົ້າຮ່ວມ ຢ່າງພ້ອມພຽງ.

ໃນພິທີ, ສະຫາຍ ສຸລິຍາ ພົມມີສິດ, ຮັກສາການຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຂຶ້ນຜ່ານຄຳສັ່ງຂອງກົມການເມືອງສູນກາງພັກ ສະບັບເລກທີ 12/ກມສພ, ລົງວັນທີ 15/11/ 2024 ວ່າດ້ວຍ ການຍົກຍ້າຍພະນັກງານການນໍາຂັ້ນສູງໄປຮັບໜ້າທີ່ໃໝ່; ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 296/ຄລສພ, ລົງວັນທີ 14/11/2024 ວ່າດ້ວຍການຍົກຍ້າຍພະນັກງານ ການນໍາຂັ້ນສູງໄປຮັບໜ້າທີ່ໃໝ່; ມະຕິຕົກລົງຂອງ ຄະນະເລຂາທິການສູນກາງພັກ ສະບັບເລກທີ 297/ຄລສພ, ລົງວັນທີ 14/11/2024 ວ່າດ້ວຍ ການແຕ່ງຕັ້ງກໍາມະການຄະນະບໍລິຫານງານພັກ ຄະນະພົວພັນຕ່າງປະເທດສູນກາງພັກ ແລະ ມະຕິຕົກລົງຂອງ ຄະນະເລຂາທິການສູນກາງພັກ ສະບັບເລກທີ 298/ຄລສພ, ລົງວັນທີ 14/11/2024 ວ່າດ້ວຍການແຕ່ງຕັ້ງ ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ.

ໂອກາດດັ່ງກ່າວ, ສະຫາຍ ທອງສະຫວັນ ພົມວິຫານ ໄດ້ກ່າວລາຍງານ ກ່ຽວກັບ ວຽກງານການເຄື່ອນໄຫວໂດຍຫຍໍ້ຂອງ ຄຕພ ນັບແຕ່ປີ 2021 ເປັນຕົ້ນມາ ຊຶ່ງສາມາດຍາດໄດ້ຜົນສຳເລັດສຳຄັນຫຼາຍດ້ານ ໃນການປະຕິບັດໜ້າທີ່ເປັນເສນາທິການ ໃຫ້ແກ່ສູນກາງພັກ ໃນວຽກງານຕ່າງປະເທດຂອງພັກ ແລະ ການທູດປະຊາຊົນ ທັງໃນຂອບສອງຝ່າຍ ແລະ ຫຼາຍຝ່າຍ, ປະກອບສ່ວນຢ່າງຕັ້ງໜ້າ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

ຫຼັງຈາກນັ້ນ, ສະຫາຍ ບຸນເຫຼືອ ພັນດານຸວົງ ໄດ້ຂຶ້ນກ່າວຮັບໜ້າທີ່ ໂດຍໄດ້ຕີລາຄາຜົນສຳເລັດຂອງ ຄຕພ ໃນໄລຍະຜ່ານມາ ພາຍໃຕ້ການຊີ້ນຳ-ນຳພາຂອງສະຫາຍຫົວໜ້າ ຄຕພ ຜູ້ເກົ່າ ແລະ ໄດ້ໃຫ້ຄຳໝາຍໝັ້ນວ່າ ຈະພ້ອມກັບໝູ່ຄະນະ ເພື່ອສືບຕໍ່ປະຕິບັດໜ້າທີ່ ເປັນເສນາທິການ ໃຫ້ແກ່ສູນກາງພັກໃນວຽກງານຕ່າງປະເທດ ເພື່ອປະກອບສ່ວນເຂົ້າໃນການປະຕິບັດແນວທາງຕ່າງປະເທດຂອງພັກ ໃຫ້ມີປະສິດທິຜົນຍິ່ງຂຶ້ນ.

ໃນພິທີດັ່ງກ່າວ, ສະຫາຍ ນາງ ສີໃສ ລືເດດມູນສອນ ໄດ້ຕາງໜ້າໃຫ້ກົມການເມືອງສູນກາງພັກ ແລະ ຄະນະເລຂາທິການສູນກາງພັກ ກ່າວໂອ້ລົມໂດຍໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຜົນງານອັນ ພົ້ນເດັ່ນທີ່ ຄຕພ ຍາດມາໄດ້ ແລະ ໄດ້ສະເໜີໃຫ້ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອ ຄວາມສາມັກຄີເປັນເອກະພາບພາຍໃນຄະນະພັກ ກໍຄືຄະນະນຳທຸກຂັ້ນ ເພື່ອປະຕິບັດພາລະບົດບາດ, ສິດໜ້າທີ່ ຄວາມຮັບຜິດຊອບຂອງຕົນ, ເປັນເຈົ້າການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງລັດ 5 ປີ ຄັ້ງທີ 9 ໃຫ້ປະກົດຜົນເປັນຈິງ; ສືບຕໍ່ເປັນເຈົ້າການຍູ້ແຮງການເຄື່ອນໄຫວວຽກງານການທູດຂອງພັກ ແລະ ການທູດປະຊາຊົນ ໂດຍຖືເປັນວຽກງານປາຍແຫຼມ ໃນການເຄື່ອນໄຫວວຽກງານການຕ່າງປະເທດຂອງພັກ ໃນໄລຍະໃໝ່; ເຊື່ອໝັ້ນວ່າ ສະຫາຍ ຫົວໜ້າ ຄຕພ ຜູ້ໃໝ່ ຈະສືບຕໍ່ພ້ອມກັບໝູ່ຄະນະ ຍົກສູງຄວາມຮັບຜິດຊອບ, ເປັນຫຼັກແຫຼ່ງ, ເປັນຄັນທຸງເຕົ້າໂຮມຄວາມສາມັກຄີເປັນເອກະພາບຢູ່ພາຍໃນ ເພື່ອເຮັດສຳເລັດໜ້າທີ່ ແລະ ນຳພາ ຄຕພ ສືບຕໍ່ກ້າວຂຶ້ນຢ່າງໜັກແໜ້ນ ຕາມທິດທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກ.