ຮອງຫົວໜ້າຄະນະພົວພັນຕ່າງປະເທດສູນກາງພັກ ນໍາພາຄະນະ ເຂົ້າອວຍພອນ ສະຖານທູດ ສປ ຈີນ ປະຈໍາ ສປປ ລາວ ໃນໂອກາດວັນຊາດ ສປ ຈີນ ຄົບຮອບ 75 ປີ

ເຜີຍ​ແຜ່​ໂດຍ​: moderator ເວ​ລາ: 30/09/2024 12:52:07 ຈຳ​ນວນ​​ຢ້ຽມ​ຊົມ 196 ຄັ້ງ ​

       ໃນຕອນບ່າຍວັນທີ 27 ກັນຍາ 2024, ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ນໍາພາຄະນະ ເຂົ້າອວຍພອນ ແລະ ພົບປະກັບ ສະຫາຍ ນາງ ຟາງ ຫົງ, ເອກອັກຄະລັດຖະທູດຜູ້ມີອໍານາດເຕັມ ແຫ່ງ ສປ ຈີນ ປະຈໍາ ສປປ ລາວ ເນື່ອງໃນໂອກາດວັນສະຖາປະນາ ສາທາລະນະລັດ ປະຊາຊົນຈີນ ຄົບຮອບ 75 ປີ.

          ສະຫາຍ ວາລະໄຊ ເລັ່ງສະຫວັດ ໄດ້ຕີລາຄາສູງ ຕໍ່ ຜົນສໍາເລັດອັນໃຫຍ່ຫຼວງ ຮອບດ້ານ ທີ່ພັກ, ລັດຖະບານ ແລະ ປະຊາຊົນຈີນອ້າຍນ້ອງ ຍາດມາໄດ້ໃນຕະຫຼອດໄລຍະ 75 ປີຜ່ານມາ; ຕີລາຄາສູງ ຕໍ່ການພົວພັນຮ່ວມມື ລະຫວ່າງ ສອງພັກ, ສອງລັດຖະບານ ລາວ-ຈີນ ກໍ່ຄື ການພົວພັນປະສານສົມທົບກັນ ລະຫວ່າງ ຄະນະພົວພັນຕ່າງປະເທດສູນກາງພັກ ປປ ລາວ ແລະ ສະຖານທູດ ສປ ຈີນ ເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ແຕກດອກອອກຜົນຢ່າງບໍ່ຢຸດຢັ້ງ. ໃນໂອກາດດັ່ງກ່າວ, ສະຫາຍ ວາລະໄຊ ເລັ່ງສະຫວັດ ຍັງໄດ້ຕາງໜ້າມອບ ສານອວຍພອນ ຈາກ ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ສປປ ລາວ ເຖິງ ສະຫາຍ ສີ ຈິ້ນຜິງ, ເລຂາທິການໃຫຍ່, ປະທານປະເທດ ສປ ຈີນ ແລະ ຈາກ ສະຫາຍ ທອງສະວຫັນ ພົມວິຫານ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ເຖິງ ສະຫາຍ ຫຼິວ ຈ້ຽນຊາວ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ເນື່ອງໃນໂອກາດວັນສະຖາປະນາ ສປ ຈີນ ຄົບຮອບ 75 ປີ.

         ສະຫາຍ ນາງ ຟາງ ຫົງ ໄດ້ສະແດງຄວາມຂອບໃຈ ຕໍ່ການອວຍພອນ ແລະ ຕີລາຄາສູງ ຕໍ່ຜົນສໍາເລັດໃນການສ້າງສາພັດທະນາ ສປ ຈີນ, ພ້ອມທັງສະແດງຄວາມເຫັນດີເປັນເອກະພາບ ຕໍ່ ການຕີລາຄາສູງ ການພົວພັນຮ່ວມມື ລະຫວ່າງ ສອງຝ່າຍ ໃນໄລຍະຜ່ານມາ.

        ສອງຝ່າຍ ໄດ້ລົງເລິກປຶກສາຫາລື ກ່ຽວກັບ ທິດທາງການພົວພັນຮ່ວມມືສອງຝ່າຍ ໃນຕໍ່ໜ້າ, ໂດຍສະເພາະແມ່ນ ການຈັດຕັ້ງປະຕິບັດແຜນການຮ່ວມມື ລະຫວ່າງ ສອງພັກ ລາວ-ຈີນ ໃນໄລຍະທ້າຍປີ 2024 ເພື່ອປະກອບສ່ວນເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ການຮ່ວມມືແບບຄູ່ຮ່ວມຍຸດທະສາດຮອບດ້ານ ໝັ້ນຄົງ ຍາວນານ ຕາມທິດ 4 ດີ ແລະ ການສ້າງເປັນຄູ່ຮ່ວມຊາຕາກໍາ ລາວ-ຈີນ ໃຫ້ແຕກດອກອອກຜົນຍິ່ງໆຂຶ້ນ.

---