ພິທີປາຖະກະຖາ ເນື່ອງໃນໂອກາດວັນຄ້າຍວັນເກີດຂອງປະທານ ກິມ ເຈິງ ອິນ ຄົບຮອບ 82 ປີ (16/2/1942 - 16/2/2024).
ເຜີຍແຜ່ໂດຍ: editor ເວລາ: 12/02/2024 15:57:17 ຈຳນວນຢ້ຽມຊົມ 416 ຄັ້ງ ໃນຕອນເຊົ້າວັນທີ 09 ກຸມພາ 2024, ທີ່ກະຊວງປ້ອງກັນຄວາມສະຫງົບ, ສະມາຄົມມິດຕະພາບ ລາວ - ສປປ ເກົາຫຼີ ແລະ ກະຊວງປ້ອງກັນຄວາມສະຫງົບ ຮ່ວມກັບສະຖານເອກອັກຄະລັດຖະທູດແຫ່ງ ສປປ ເກົາຫຼີ ປະຈໍາ ສປປ ລາວ ໄດ້ຈັດພິທີປາຖະກະຖາ ເນື່ອງໃນໂອກາດວັນຄ້າຍວັນເກີດຂອງປະທານ ກິມ ເຈິງ ອິນ ຄົບຮອບ 82 ປີ (16/2/1942 - 16/2/2024). ໃນງານດັ່ງກ່າວ ຍັງມີການວາງສະແດງຮູບພາບ ແລະ ສາຍວີດີໂອ ກ່ຽວກັບສະພາບການພັດທະນາເສດຖະກິດ-ສັງຄົມ, ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ສປປ ເກົາຫລີ ໃນໄລຍະທີ່ຜ່ານມາ ແລະ ປະຈຸບັນ.
ການຈັດງານປາຖະກະຖາໃນຄັ້ງນີ້ ໃຫ້ກຽດເຂົ້າຮ່ວມມີ: ສະຫາຍ ພົທ ກົງທອງ ພົງວິຈິດ, ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນຄວາມສະຫງົບ; ນາງ ວິລະວອນ ພັນທະວົງ, ຮອງຫົວໜ້າຄະນະໂຄສະນາອົບຮົມສູນກາງພັກ, ຮອງປະທານ ສະມາຄົມມິດຕະພາບ ລາວ - ສປປ ເກົາຫຼີ; ສະຫາຍ ລີ ຢົງ ຊົນ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປປ ເກົາຫຼີ ປະຈຳ ສປປ ລາວ; ສະຫາຍ ວາລະໄຊ ເລັ່ງສະຫວັດ, ຮອງຫົວໜ້າ ຄະນະພົວພັນຕ່າງປະເທດສູນກາງພັກ; ມີບັນດາສະຫາຍການນໍາ, ຄະນະກົມ, ຄະນະພະແນກ, ພະນັກງານ, ນາຍ ແລະ ພົນຕໍາຫຼວດ ແລະ ແຂກທີ່ມາຈາກພາກສ່ວນກ່ຽວຂ້ອງ ມີຈໍານວນປະມານ 400 ສະຫາຍໄດ້ເຂົ້າຮ່ວມ.
ການຈັດປາຖະກະຖາໃນຄັ້ງນີ້ ເປັນນິມິດໝາຍອັນດີງາມທີ່ພັກ ແລະ ລັດຖະບານກໍ່ຄື ປະຊາຊົນ ສປປ ເກົາຫຼີໃນທົ່ວປະເທດ ໄດ້ມີການຈັດຕັ້ງງານສະເຫຼີມສະຫຼອງໂຮມຊຸມນຸມ ເພື່ອລະນຶກວັນທີ່ມີຄວາມໝາຍຄວາມສຳຄັນນີ້, ພັກ ແລະ ລັດຖະບານແຫ່ງ ສປປ ລາວ ໄດ້ມອບໃຫ້ກະຊວງປ້ອງກັນຄວາມສະຫງົບ ແລະ ສະມາຄົມມິດຕະພາບ ລາວ - ສປປ ເກົາຫຼີ ຮ່ວມກັບສະຖານເອກອັກຄະລັດຖະທູດແຫ່ງ ສປປ ເກົາຫຼີ ປະຈໍາ ສປປ ລາວ ເປັນເຈົ້າພາບຈັດປາຖະກະຖາ ເພື່ອລະນຶກເຖິງວັນອັນມີຄວາມໝາຍດັ່ງກ່າວຂອງປະຊາຊົນ ສປປ ເກົາຫຼີ.
ໃນພິທີອັນມີຄວາມໝາຍສໍາຄັນນີ້ ສະຫາຍ ລີ ຢົງ ຊົນ, ເອກອັກຄະລັດຖະທູດຜູ້ມີອຳນາດເຕັມ ແຫ່ງ ສປປ ເກົາຫຼີ ປະຈຳ ສປປ ລາວ ໄດ້ໃຫ້ກຽດຂຶ້ນກ່າວປາຖະກະຖາ ເຊິ່ງໄດ້ຍົກໃຫ້ເຫັນເຖິງບົດບາດການນໍາພາ ແລະ ຜົນງານ ຂອງປະທານ ກິມ ເຈິງ ອິນ, ຜູ້ນໍາທີ່ຍິ່ງໃຫຍ່ຂອງປະຊາຊົນ ສປປ ເກົາຫຼີ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະຜ່ານມາ ກໍ່ຄືການພັດທະນາຂອງ ສປປ ເກົາຫຼີ ໃນປະຈຸບັນພາຍໃຕ້ການນໍາພາ ຂອງພັກແຮງງານເກົາຫຼີ ບົນເສັ້ນທາງສູ່ຈຸດໝາຍສັງຄົມນິຍົມ. ພ້ອມດຽວກັນນີ້ ກໍ່ຍັງໄດ້ຍົກໃຫ້ເຫັນເຖິງສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືລະຫວ່າງສອງພັກ, ສອງລັດ ແລະ ປະຊາຊົນ ສອງຊາດລາວ ແລະ ສປປ ເກົາຫຼີ ທີ່ໄດ້ຮັບການເສີມຂະຫຍາຍ ແລະ ໄດ້ຮັບການພັດທະນາເພີ່ມພູນຄູນສ້າງຢ່າງຕໍ່ເນື່ອງ ນໍາເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ, ທັງເປັນການປະກອບສ່ວນເຂົ້າໃນພະລາກິດເສີມສ້າງສັນຕິພາບ, ມິດຕະພາບ ແລະ ການຮ່ວມມືໃນຂົງເຂດ ແລະ ໃນໂລກ. ຫຼັງຈາກນັ້ນ ກໍ່ໄດ້ຊົມການສະແດງສີລະປະຂອງ ລາວ ແລະ ສປປ ເກົາຫຼີ.
03/09/2024 15:39:45
30/08/2024 09:10:17
29/08/2024 11:16:22
27/08/2024 10:31:49
29/07/2022 15:17:46
13/06/2023 14:17:31
12/07/2023 14:43:30
30/05/2023 10:28:03
30/03/2023 15:30:06
14/07/2022 14:18:48
04/04/2023 15:42:25
14/07/2022 15:49:10
05/09/2022 15:20:13
09/05/2022 10:06:28
16/03/2022 08:33:46
24/05/2022 08:54:20